သျှမ်းပြည် မြောက်ပိုင်း ကွတ်ခိုင်မြို့နယ် ပန်ကူစစ်ရှောင်စခန်းတွင်နေထိုင်သည့် အမျိုးသားတဦး မြေမြုပ်မိုင်းနင်းမိကာ ထိခိုက်ဒဏ်ရာ ပြင်းထန် ရရှိကြောင်း သတင်းရရှိသည်။
အောက်တိုဘာ ၂၃ ရက် နေ့လည် ၁ နာရီ ဝန်းကျင်အချိန် ပန်ကူကျေးရွာ ဟောင်း အနီးပတ်ဝန်းကျင်ရှိ တောင်ယာတွင် ကျွဲသွားရှာ စဉ် တိုက်မိုင်း နင်းမိသဖြင့်အသက် ၂၆ နှစ်အရွယ်အိုက်ယေ့ သည် မိုင်းထိမှန် ဒဏ်ရာရရှိရာ ဒဏ်ရာ စိုးရိမ်ရသည့် အခြေအနေဖြစ်နေကြောင်း ကွတ်ခိုင်မြို့နယ် တအာင်း စာပေ ယဉ်ကျေးမှု ဒုတိယ ဥက္ကဌ ဦးထွန်းအောင် က သျှမ်းသံတော်ဆင့် သို့ပြောသည်။
“ လင်မယား ၂ ယောက် တောင်ယာမှာ ကျွဲသွားရှာရင်း အမျိုးသားဖြစ်တဲ့သူက တိုက် မိုင်း နင်းမိတာ။ ပေါင် မှာကျည်စ ဖောက် ၀င်တယ်။ လက်ထိတယ်။ မနေ့က ကွတ်ခိုင် ဆေးရုံ ရောက်လာတယ်။ ဒဏ်ရာက ပြင်းတော့ လားရှိုးပို့လိုက်တယ်” ဟု ဦးထွန်းအောင် က ဆိုသည်။
ကျည်စသည် ပေါင်အားစိုက်ဝင်သဖြင့် အရိုး ထိသွားရာ ဒဏ်ရာပြင်းထန်ကြောင်း၊ စိုးရိမ်ရသည့် အခြေအနေရှိကြောင်း လည်း ဦးထွန်းအောင် က ပြောသည်။
အဆိုပါ ပန်ကူစစ်ရှောင်စခန်းတွင် နေထိုင်သည့် စစ်ဘေးရှောင်များသည် စားဝတ်နေရေး အတွက် ယခင် နေထိုင်ခဲ့သည့် ပန်ကူကျေးရွာ ဟောင်းတွင်သာ သွားရောက် နေရသည်။
ထို ကွတ်ခိုင်မြို့နယ် ပန်ကူကျေးရွာ တွင် မြန်မာ့တပ်မတော် နှင့် တအာင်း (ပလောင်) အမျိုးသားလွတ်မြောက်ရေး တပ်မတော်(TNLA) တို့လှုပ်ရှားသည့်နေရာဖြစ်သည့် အလျောက် မြေမြုပ်များလည်း ရှိကြောင်း ဒေသခံများ က ပြောသည်။
“ပြည်သူတွေက စစ်ရှောင်စခန်းမှာ နေရင်လည်း ဘာထောက်ပံ့မှု မှ မရတော့၊ ဝင်ငွေရမယ့် နေရာကို သွားအလုပ်လုပ်ရတယ်။ လုပ်ပြန်တော့လည်း အသက်အန္တရာယ်တွေရတယ်။ ၀မ်းရေးအတွက် မရှာလို့လည်း မရ” ဟု ဦးထွန်းအောင် က ပြောသည်။
လက်ရှိ သျှမ်းမြောက်ဒေသခံ ပြည်သူများ လယ်ယာလုပ်ငန်းခွင်၊ တောတောင်ဒေသ ထွက်စာရှာစားရန် အတွက် မိုင်းအန္တရာယ် သည် ခြိမ်းခြောက်မှု တခုဖြစ်နေကြောင်း သိရသည်။
Leave a Comments