သျှမ်းပြည် မြောက်ပိုင်း တရုတ်-မြန်မာ နယ်စပ် ကိုးကန့်ကိုယ်ပိုင်အုပ်ချုပ်ခွင့်ရဒေသ လောက်ကိုင်မြို့နယ်တွင် မြန်မာရဲ ယောင်ဆောင်ပြီး ခိုးဝင်လာသည့် တရုတ် နိုင်ငံသား ၅ ဦး ဖမ်းဆီးရမိကြောင်း သတင်းရရှိသည်။
အောက်တိုဘာ ၁၅ ရက် ညနေပိုင်းတွင် လောက်ကိုင်မြို့ ရွှေဆင်နယ်မြေ အတွင်းသို့ အဆိုပါ တရုတ်နိုင်ငံသား ၅ ဦး အားဖမ်းဆီးရမိခြင်းဖြစ်ကြောင်း သျှမ်းပြည်နယ် ရဲတပ်ဖွဲ့ ရုံး မှ စုံစမ်းသိရသည်။
“ တရုတ် နိုင်ငံသား ၅ ဦး ခိုးဝင်လာတာ ဖမ်းဆီးရမိတယ်ဆိုတဲ့သတင်းတော့ ရတယ်။ ရဲဝတ်စုံ နဲ့ ဆိုတာ ဟုတ်၊မဟုတ်တော့ ကျနော် လည်း သေချာ မသိသေးဘူး” ဟု သျှမ်းပြည်နယ် ရဲတပ်ဖွဲ့ မှ ရဲမှူးချုပ် ဇော်ခင်အောင် က သျှမ်းသံတော်ဆင့် သို့ပြောသည်။
မြန်မာဘက်ခိုးဝင်လာသည့် တရုတ်နိုင်ငံသား ၅ ဦးမှာ ကျုံးကြယ်ကျင်း၊ ဖူးတုန်း၊ စူးထိုက်ကျွင်း၊ လူပေါက်ကျန်း နှင့် ဖန်ရွှီဖိန် တို့ဖြစ်ကြောင်းသိရသည်။
ထို့အပြင် မြန်မာနိုင်ငံရဲတပ်ဖွဲ့ ဝတ်စုံ ၂ စုံ၊ ကျည်ကာအကျီ ၁ ထည်၊ လက်ထိပ် ၅ စုံ၊ ဖိုက်ဘာဖြင့် ပြုလုပ်ထားသည့် ၉ မမ ပစ္စတို(အတု/ ကျည်မပါ ) ၂လက် M22 အနက် ရောင် သေနတ် (အတု) တို့ကိုလည်း သိမ်းဆည်းရမိသည်။
အဆိုပါ ဖမ်းဆီးရသည့် တရုတ်နိုင်ငံသား ၅ ဦးကို လောက်ကိုင်မြို့မ ရဲစခန်း တွင် (ပ) ၂၅/ ၂၀၁၉ ရာဇာသတ်ကြီး ပုဒ်မ ၁၇၀ တို့ ဖြင့် အမှုဖွင့် စစ်ဆေးနေကြောင်း သတင်းရရှိသည်။
Leave a Comments