သျှမ်းပြည် လောက်ကိုင်မြို့တွင် ကိုးကန့်တပ်ဖွဲ့ MNDAA က ရာဇဝတ်မှုကျူးလွန်သူ (၂၁) ဦးကို လူအများရှေ့တွင် ပြစ်ဒဏ်စီရင်ခဲ့ပြီး (၇) ဦးကို သေဒဏ်ချမှတ်ခဲ့ကြောင်း သတင်းသိရသည်။
ယမန်နေ့ (ဒီဇင်ဘာလ ၅ ရက်) နံနက် ၈ နာရီမှ စတင်ပြီး ကိုးကန့်တပ်ဖွဲ့ MNDAA ထိန်းချုပ်ထားသည့် လောက်ကိုင်မြို့ရှိ မြန်မာ-တရုတ် နယ်ခြားမှတ်တိုင် BP-(၁၂၅) အနီးတွင် ပြန်ပေးဆွဲမှု၊ ငွေညှစ်မှုနှင့် လူသတ်မှုတို့ဖြင့် သံသယရှိသူ (၂၁) ဦးတို့ကို လူအများ ရှေ့မှောက်တွင် သေဒဏ်အပါအဝင် ပြစ်ဒဏ်စီရင်ခဲ့ကြောင်း MNDAA က သတင်းထုတ်ပြန်သည်။
၎င်းတို့အထဲမှ (၇) ဦးကို စစ်သားအယောင်ဆောင်ကာ လက်နက်ကိုင် ဓားပြတိုက်မှု၊ ပြန်ပေးဆွဲမှုနှင့် ရည်ရွယ်ချက်ရှိရှိ လူသတ်မှုတို့အပေါ် MNDAA က သေဒဏ်ချမှတ်ခဲ့ပြီး (၆) ဦးကို ကွပ်မျက်ရေးကွင်းသို့ ခေါ်ဆောင်သွားကာ ချက်ချင်း သေဒဏ်ပေးခဲ့ကြောင်း ထုတ်ပြန်ချက်တွင် ဆိုသည်။
“မနေ့က (၁၂၅) ကျောက်တိုင်ကွင်းဘက် လူစုလူဝေးနဲ့ အပြစ်ပေးတာ။ ကားတင်ခေါ်လာတာ ၁၄ ယောက် ရှိတယ်၊ အဲ့ထဲမှာ မိန်းကလေးတစ်ယောက်လည်း ပါတယ်။ သေဒဏ်ချတာက ၆ ယောက်”ဟု လောက်ကိုင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အလားတူ စာသင်ကျောင်းတွင် ကလေးအများအပြားကို လိင်ပိုင်းဆိုင်ရာ နှောင့်ယှက်စော်ကားမှု၊ (၁၄) နှစ်အောက် မိန်းကလေးကို ကိုယ်ဝန်ရသွားသည့်တိုင် အချိန်အတော်ကြာ လိင်ပိုင်းဆိုင်ရာ စော်ကားမှုနှင့် သေနတ်များ ဝှက်ထားပြီး လုယက်မှု ကျူးလွန်ရန် ကြံစည်သည့် သံသယရှိသူ အခြား( ၁၄) ဦးကို လမ်းမကြီးတလျှောက် လှည့်လည်ပြသပြီး စီရင်ချက်ချမှတ်ခဲ့ကြောင်း သိရသည်။
လောက်ကိုင်မြို့တွင် MNDAA က ပြုလုပ်ခဲ့သည့် လူစုလူဝေးရှေ့ ပြစ်ဒဏ်စီရင်ချမှတ်ခြင်းကို ကျောင်းသားကျောင်းသူများနှင့် ပြည်သူ (၁၀၀၀) ကျော် တက်ရောက်ခဲ့ကြောင်း ဒေသခံများက ပြောသည်။
လောက်ကိုင်မြို့တွင် ကိုးကန့်တပ်ဖွဲ့ MNDAA က လူစုလူဝေးရှေ့မှောက် သေဒဏ်အပါအဝင် ပြစ်ဒဏ်စီရင်ခြင်းမှာ ဒုတိယအကြိမ်ဖြစ်ပြီး ဧပြီလအတွင်းကလည်း ပြစ်မှုကျူးလွန်သူ (၁၀) ဦးကို သေဒဏ်ချမှတ်ခဲ့ဖူးသည်။
ပြီးခဲ့သည့် ဧပြီလအတွင်း ကိုးကန့်တပ်ဖွဲ့ MNDAA က ပြစ်မှုကျူးလွန်သူ (၁၀) ဦးကို လောက်ကိုင်မြို့တွင် အများပြည်သူရှေ့မှောက် သေဒဏ်ချမှတ်ခဲ့စဉ်က ဥရောပသမဂ္ဂ EU မှ အပြင်းထန်ဆုံး ရှုတ်ချပြီး သေဒဏ်ချမှတ်မှုကို ပြင်းပြင်းထန်ထန် ဆန့်ကျင်ကန့်ကွက်ကြောင်း မြန်မာနိုင်ငံဆိုင်ရာ ဥရောပသမဂ္ဂရုံးက ဧပြီလ ၂၆ ရက်တွင် ထုတ်ပြန်သည်။
ထို့အပြင် အောက်တိုဘာလ ၃၀ ရက်တွင် ‘ဝ’တပ်ဖွဲ့ UWSA ထိန်းချုပ်ထားသည့် ဟိုပန်မြို့၌ ပြည်သူ့တရားစီရင်ရေး အခမ်းအနားဟု ခေါင်းစဉ်တပ်ပြီး လူစုလူဝေး ရှေ့မှောက်တွင် ရာဇဝတ်မှု ကျူးလွန်ကြောင်း ဖော်ထုတ်ခံရသူ (၇)ဦးကို လူသတ်မှုအတွက် သေဒဏ်နှင့် မုဒိမ်းမှုကို ထောင်ဒဏ် (၁၅) နှစ်စီ အသီးသီး ချမှတ်ခဲ့သည်။
Leave a Comments