သျှမ်းပြည်နယ် မြောက်ပိုင်း လားရှိုးမြို့နယ် နားကွန်းလုံ ကျေးရွာ အုပ်စု မန်ကောင်းကျေးရွာ၏ ကျေးရွာ အုပ်ချုပ်ရေးမှူးအား အမည်မသိလက်နက်ကိုင်အဖွဲ့က ပစ်ခတ်ခဲ့ကြောင်းသိရသည်။
အောက်တိုဘာ ၁၅ ရက် မနက်ပိုင်းက အသက် ၆၀ အရွယ် မန်ကောင်းကျေးရွာ အုပ်ချုပ်ရေးမှူး( ရွာသူကြီး) ဦးမာကူးအား အ မည်မသိ လက်နက်ကိုင် တဦးက သေနတ်ဖြင့် ၆ ချက် ပစ်သတ်ခဲ့ကြောင်း သိရသည်။
“ မနေ့က ကျနော်တို့ကို နေ့လည် ၁၂ နာရီ မှာ အကြောင်းကြားလာလို့သွားခေါ်တာပါ။ အဲ့နေရာက သွားရခက် တယ်။ မိုးကလည်း ရွာတော့ လမ်းတွေလည်း ဆိုးတယ်။ အလောင်းကိုတော့ လားရှိုး ရင်ခွဲရုံ ကို ပို့ထားတယ်” ဟု လားရှိုးလူငယ် လူမှုကူညီရေး အသင်းမှ စိုင်းဝသုန်ထွန်း က သျှမ်းသံတော်ဆင့် သို့ပြောသည်။
ဦးမာကူး၏ နဖူးအလယ်တည့်တည့်တွင် သေနတ်ဒဏ်ရာ တချက်၊ လည်ပင်း တွင် တချက်၊ ရင်ဘတ်တွင် ၂ချက် နှင့် တင်ပါးတွင် ၂ ချက် ပစ်ခတ်ထားသည်ကိုတွေ့ရကြောင်း လည်း သိရသည်။
ဦးမာကူး အား ပစ်ခတ်သွားသည့် အမည်မသိ လက်နက်ကိုင် ကို စုံစမ်းနေဆဲဖြစ်ပြီး လားရှိုးမြို့မရဲစခန်းတွင် (ပ) ၄၁၄/၁၉ ရာဇသတ်ကြီး ပုဒ်မ ၃၀၂ တို့ဖြင့် အမှုဖွင့် အရေးယူထားကြောင်း သိရသည်။
