သျှမ်းပြည်မြောက်ပိုင်း ကျောက်မဲမြို့နယ် မိုင်းငေါ့မြို့နယ်ခွဲ ပန်တမော့ ကျေးရွာတွင် သီတင်းကျွတ်လပြည့်နေ့က သံဃာတော် ၃ ပါး မိုင်းနင်းမိကြောင်း သတင်းရရှိသည်။
အောက်တိုဘာ ၁၃ ရက် ည ၇ နာရီ ဝန်းကျင်အချိန်က သံဃာတော် ၃ ပါးသည် နမ့်ဆန်မြို့နယ် လွယ်ခလေးရွာ တွင် ပြုလုပ်မည့် သံဃာတော်များ ပူဇော်ပွဲအတွက်ကြွရာ လမ်းတွင် လက်လုပ်မိုင်းနင်းမိကာ ထိခိုက်ဒဏ်ရာရရှိခဲ့သည်။
“ မနေ့ည ၇ နာရီမှာဖြစ်တာ။ ကျနော်တို့ဒီမနက် မှ သွားခေါ်နိုင်ခဲ့တယ်။ အခု သံဃာ ၃ပါး စလုံးက ကျောက်မဲပြည်သူ့ဆေးရုံ ပို့ဆောင်ပေးထားတယ်” ဟု အိုမ်တမောဝ် လူမှု ကူညီရေး အသင်း မှ အဘမ်း က သျှမ်းသံတော်ဆင့် သို့ ပြောသည်။
မိုင်းနင်းမိပြီး ထိခိုက်ဒဏ်ရာရသည့် သံဃာတော်များမှ သက်တော် ၂၈ နှစ် ဝါတော် ၈ ဝါ ရှိသည့် ဦးသောဘိတ သည် မျက်လုံး နှင့် ရင်ဘတ်ဒဏ်ရာရရှိကြောင်း၊ သက်တော် ၂၇ နှစ် ဝါတော် ၇ ဝါ ရှိသည့် ဦးစန္ဒိမာ သည် နာရွက် ၊ ပေါင် နှင့် လက်များ ထိခိုက်ဒဏ်ရာရရှိကြောင်း ၊ သက်တော် ၂၆ နှစ် ဝါတော် ၆ ဝါ ရှိ ဦးခေမိန္ဒ သည် ညာဘက် ခြေဖမိုး၊ ပေါင် တို့တွင်ထိခိုက်ကာ ဒဏ်ရာ မစိုးရိမ်ရကြောင်း အဘမ်း ကပြောသည်။
ယခုအောက်တိုဘာလအတွင်း ကျောက်မဲခရိုင်အတွင်း မြေမြုပ်မိုင်းနင်းမိသူများမှာ သံဃာတော် ၃ ပါးအပြင် အရပ်သား ၄ ဦး စုစုပေါင်း ၇ ဦး ရှိပြီး ၎င်းတို့အနက် အရပ်သား ၂ ဦး (အမျိုးသမီးများ) မှာသေဆုံးခဲ့ကြောင်းသိရသည်။
ကျောက်မဲခရိုင် အတွင်း စက်တင်ဘာ နှင့် အောက်တိုဘာ လဆန်း အတွင်း မြေမြုပ်မိုင်းနင်းမိသူ ၁၀ ဦးအထက် ရှိသွားပြီ ဖြစ်ကြောင်း သိရသည်။
Leave a Comments