၂၀၂၀ ရွေးကောက်ပွဲသည် ငြိမ်းချမ်းရေး လုပ်ငန်းစဉ် အပေါ် ရိုက်ခတ် သက်ရောက် နိုင်သည့်အတွက် သတိ ဖြင့် ဆောင်ရွက်ရန် PPST ယာယီ ခေါင်းဆောင် ဗိုလ်ချုပ်ကြီး ယွက်စစ် က ပြောကြားလိုက်သည်။

ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST) အစည်းအဝေးကို ယနေ့ အောက်တိုဘာ ၁၀ ရက်နေ့ မှ စတင်ကာ အောက်တိုဘာ ၁၂ ရက်ထိ ထိုင်းနိုင်ငံ ချင်းမိုင် မြို့ တွင် ကျင်းပသွားမည် ဖြစ်ကြောင်း သိရသည်။

“ ၂၀၂၀ ရွေးကောက်ပွဲ ဟာ ငြိမ်းချမ်းရေး လုပ်ငန်းစဉ် အပေါ် အနည်းနဲ့ အများ ရိုက်ခတ် သက်ရောက်နိုင်တဲ့ အတွက် ဒီကာလ တွေမှာ ငြိမ်းချမ်းရေး လုပ်ငန်းစဉ် ဆောင်ရွက်တဲ့အပေါ် အသိ၊ သတိ နဲ့ ဆောင်ရွက်ဖို့ အထူးလိုအပ်ပါတယ်” ဟု ဗိုလ်ချုပ်ကြီး ယွက်စစ် က မိန့်ခွန်းတွင် ပြောကြားသည်။

၂၀၂၀ တွင် အထွေထွေ ရွေးကောက်ပွဲ ကျင်းပရန် ရှိနေသည့် အတွက် ရွေးကောက်ပွဲ မတိုင်မီ ငြိမ်းချမ်းရေး လုပ်ငန်းစဉ် နှင့် ဖက်ဒရယ် ပြည်ထောင်စု တည်ဆောက်ရေး အတွက် လိုအပ်သည့် အခြေခံအုဋ်မြစ်များ ၂၁ ရာစု ပင်လုံတွင် ချမှတ်အတည်ပြုထားရန် လိုအပ်ကြောင်းလည်း ဗိုလ်ချုပ်ကြီး ယွက်စစ် က မိန့်ခွန်းတွင် ထည့်သွင်းပြောကြားခဲ့သည်။

အပစ်ခတ်ရပ်စဲရေး သဘောတူညီ စာချုပ် ( NCA) တွင် ပြဌာန်းထားသည့်အတိုင်း ပြည်ထောင်စု သဘောတူစာချုပ် အရ ဖွဲ့စည်းပုံ အခြေခံ ဥပဒေ ပြင်ဆင်ပြီး ဖက်ဒရယ် ပြည်ထောင်စု ကို တည်ဆောက်သွားရမည် ဖြစ်ပြီး၊ NCA နိုင်ငံရေး လမ်းပြမြေပုံ (၇)ဆင့် တိုင်း ဆောင်ရွက်သွားရမည်ဟုလည်း ဗိုလ်ချုပ်ကြီး ယွက်စစ် က ထပ်လောင်း ပြောသည်။

လွှတ်တော်တွင်း ဆောင်ရွက်နေသည့် ၂၀၀၈ ဖွဲ့စည်းပုံ အခြေခံ ဥပဒေပြင်ဆင်ရေးနှင့် NCA လမ်းကြောင်းအရ ဆောင်ရွက်နေသည့် ဖွဲ့စည်းပုံ အခြေခံ ဥပဒေ ပြင်ဆင်ရေး တို့သည် လိုက်လျောညီထွေဖြစ်ရန် လိုအပ်ကြောင်းလည်း ပြောကြားခဲ့သည်။

၃ ရက်ကြာ ကျင်းပမည့် PPST အစည်းအဝေးတွင် ငြိမ်းချမ်းရေး လုပ်ငန်းစဉ် လမ်းကြောင်းမှန်ပေါ် ပြန်လည် ရောက်ရှိရေး၊ တရားဝင် ဆွေးနွေးပွဲများ ပြန်လည် ကျင်းပနိုင်ရေး ၊ ၂၀၂၀ အတွင်း စတုတ္ထအကြိမ် ၂၁ ရာစု ပင်လုံ ကျင်းပနိုင်ရေးတို့ကို ရည်မှန်းပြီး တစ်ဆို့မှု ကျော်လွှားရေး အတွက် အစိုးရ ညှိနှိုင်းရေး အဖွဲ့ နှင့် NCA-S-EAO ညှိနှိုင်းရေး အဖွဲ့ တို့ဆွေးနွေးပွဲ နှင့် အကြောင်းအရာများကို ဆွေးနွေးသွားမည် ဖြစ်ကြောင်း သိရသည်။

ထို့ပြင် ဥပရော ခရီးစဉ်အတွင်း ပြုလုပ်ခဲ့သည့် NCA-S-EAO ကိုယ်စားလှယ်များနှင့် အစိုးရ ကိုယ်စားလှယ်များ၏ အလွှတ်သဘော တွေ့ဆုံမှု ရလဒ်များ၊ NCA (၄) နှစ်ပြည့် အခမ်းအနားကျင်းပရေး၊ ငြိမ်းချမ်းရေး လုပ်ငန်းစဉ် နှင့် ဆက်စပ်သည့် အခြားအရေး စသည့် အကြောင်း အရာများကို လည်း ဆွေးနွေးသွားရန် ရှိကြောင်း သိရသည်။

PPST အစည်းအဝေးတက်ရောက်သည့် NCA လက်မှတ်ရေးထိုးသည့် တိုင်းရင်းသား လက်နက်ကိုင် ၁၀ဖွဲ့ မှာ ကရင် အမျိုးသား အစည်းအရုံး(KNU) ၊ သျှမ်းပြည်ပြန်လည်ထူထောင်ရေးကောင်စီ (RCSS/SSA) ၊ ပအိုဝ်း အမျိုးသား လွတ်မြောက်ရေး အဖွဲ့ချုပ်(PNLO) ၊ ချင်း အမျိုးသား လွတ်မြောက်ရေး ပါတီ(CNF) ၊ မြန်မာ နိုင်ငံလုံး ဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF) ၊ ရခိုင်ပြည် လွတ်မြောက်ရေး ပါတီ (ALP) ၊ ဒီမိုကရေစီ အကျိုးပြု ကရင့် တပ်မတော်(DKBA) ၊ ကရင်ငြိမ်းချမ်းရေး ကောင်စီ (KNU/KNLA-PC) ၊ မွန်ပြည်သစ်ပါတီ(NMSP) နှင့် လားဟူ ဒီမိုကရက်တစ် အစည်းအရုံး(LDU) တို့ ဖြစ်ကြောင်း သိရသည်။