မတ်လ ၁ ရက်နေ့မှာကျရောက်တဲ့ သျှမ်းလူငယ်များနေ့မှာ သျှမ်းလူငယ်ကွန်ယက်TYN ကနေ တောင်ကြီးခရိုင်ရပ်စောက်မြို့နဲ့ သီပေါမြို့နယ်တို့မှာ သျှမ်းလူငယ်များနေ့အထိမ်းအမှတ် လှုပ်ရှားမှုပြု လုပ်မှာဖြစ်ပါတယ်။

သျှမ်းပြည်တောင်ပိုင်း တောင်ကြီးခရိုင် ရပ်စောက်မြို့မှာ လူငယ်တွေ့ဆုံပွဲတရပ်ပြုလုပ်မှာဖြစ်ပြီး သျှမ်း လူငယ်များနေ့ အထိမ်းအမှတ် ပထမဆုံးအကြိမ်လှုပ်ရှားမှုအဖြစ် စာပေဟောပြောပွဲကို ပါပြုလုပ် မှာဖြစ် ကြောင်းသိရပါတယ်။

“TYN အဖွဲ့ဝင်ဖြစ်တဲ့ ရပ်စောက်လူငယ်တွေကနေ ဖိတ်ခေါ်လို့ လာပြီးဟောပြောရတာဖြစ်တယ်။ ဟော ပြောမှာ ကတော့ လားရှိုးခရိုင် ကျားခေါင်းပါတီရဲ့ အမျိုးသားလွှတ်တော်ကိုယ်စားလှယ်စိုင်းဝမ်းလျန်းခမ်းနဲ့ သျှဲန်ပိုင်းဂျာနယ် အယ်ဒီတာ ခွန်ယုံးချိုတို့ဖြစ်ပါတယ်။ သျှမ်းလူငယ်တွေ စည်းလုံးညီညွတ်ရေး၊ ပညာရေးပိုင်းဆိုင်ရာမှာ တိုးတက် မြင့် မားအောင်ဟောပြောကြမှာပါ။ ပြီးတော့ သျှမ်းပြည်အမျိုးသားတေးသီချင်း ရေးစပ်သီကုံးသူ ဒေါက်တာ ဘဉာဏ်ရဲ့ အတ္ထုပ္ပတ္တိကို ဟောပြောကြမှာပါ။ ဘာလိုလဲဆိုတော့ သျှမ်းလူငယ်များနေ့က သူ့ရဲ့မွေးနေ့ (မတ်လ ၁ ရက်နေ့) ကိုအစွဲပြုပြီး သတ်မှတ်ထားတယ်ဆိုတော့လေ။” – လို့ သျှမ်းလူငယ်များကွန်ယက် TYN ပြောရေး ဆိုခွင့် ရှိသူ စိုင်းဆုကပြောပါတယ်။

ပြီးခဲ့တဲ့ ဒီဇင်ဘာလက ပဲခူးတိုင်းဒေသကြီး သပြေတန်းရွာမှာ ပြုလုပ်တဲ့ မြန်မာနိုင်ငံလုံး ဆိုင်ရာသျှမ်း လူငယ်ကွန်ယက်ညီလာခံကြီးကနေ မတ်လ ၁ ရက်နေ့ စာဆိုတော်ကြီး ဒေါက်တာဘဉာဏ်ရဲ့မွေးနေ့ကို သျှမ်းလူငယ်များနေ့အဖြစ်သတ်မှတ်ဖို့ ဆွေးနွေးသဘောတူခဲ့ကြပြီးတဲ့နောက် အခု လှုပ်ရှားမှုဟာ သျှမ်းလူငယ် များ နေ့အထိမ်အမှတ် ပထမဆုံးအကြိမ် လှုပ်ရှားမှုဖြစ်ကြောင်းသိရပါတယ်။ ဒေါက်တာဘဉာဏ် ဟာ သျှမ်းပြည် အမျိုးသားတေးသီချင်းရေးစပ်သီကုံးခဲ့သူဖြစ်ပြီး သျှမ်းစာပေကိုအထူးမြတ်နိုးတဲ့ပုဂ္ဂိုလ်တဦးဖြစ်ပါတယ်။

လူငယ်တွေဒေါက်တာဘဉာဏ်လို မိမိဘာသာစာပေချစ်မြတ်နိုးတတ်ဖို့ ဒေါက်တာဘဉာဏ်ရဲ့သမိုင်း ကိုပြန် လည်ပြောပြမှာဖြစ်ပါတယ် – ဟုလည်း သီပေါ မြို့ကျားခေါင်းပါတီဥက္ကဌ စိုင်းသိန်းကပြောပါတယ်။

သျှမ်းပြည်မြောက်ပိုင်း သီပေါမြို့မှာတော့ သီပေါမြို့ကျားခေါင်းပါတီဥက္ကဌ စိုင်းသိန်းနဲ့ သျှမ်းစာပေ ယဉ်ကျေး မှုအဖွဲ့က ပူးပေါင်းပြီး ကမကထပြု ရှင်းလင်း မွမ်းမံထားတဲ့ ဒေါက်တာဘဉာဏ်နဲ့ ဇနီးဖြစ်သူတို့ရဲ့အုဋ်ဂူ ရှေ့မှာလူငယ်တွေတွေ့ဆုံပြီး ဒေါက်တာဘဉာဏ်ရဲ့ အတ္တုပ္ပတ္တိအကြောင်းဟောပြောကြမယ်လို့သိရပါတယ်။