ကျောက်မဲမြို့နယ် အတွင်း ဆိုင်ကယ်ဈေးသည်များပစ်သတ်ခံနေရ လုံခြုံရေးအတွက် စိုးရိမ်နေ

0

သျှမ်းပြည်နယ် မြောက်ပိုင်း မိုင်းငေါ့မြို့နယ် အတွင်း ဆိုင်ကယ် ဈေးသည် တဦး သေနတ် ပစ်ခံ ရပြီးနောက် ဈေးသည်များ စိုးရိမ်ထိတ်လန့်မှုဖြင့် ဈေးရောင်းနေရကြောင်း သတင်းရရှိသည်။

Photo by SHAN/ ကျောက်မဲမြို့အတွင်း ဆိုင်ကယ်ဈေးသည်များထံ ဈေးဝယ်သည့်ပုံ

အောက်တိုဘာ ၂ ရက်နေ့က ကျောက်မဲမြို့နယ် မိုင်းငေါ့မြို့နယ်ခွဲ ဟဲခမ်းနှင့် နားယ ကျေးရွာ ကြား အသက် ၃၂ နှစ် အရွယ်ရှိ ဆိုင်ကယ် ဈေးသည် ဦးစိုင်းခမ်းကို အမည်မသိ လက်နက်ကိုင် တပ်ဖွဲ့ က   ပစ်သတ်ခဲ့ကြောင်း၊ အဆိုပါအခင်းဖြစ်ပွါးပြီးနောက် ဈေးသည် များအနေဖြင့် ကျေးရွာသို့ ဈေးသွားရောင်းရန် စိုးရိမ်ထိတ်လန့်နေကြကြောင်း ကျောက်မဲမြို့နေ ဈေးသည် အသိုင်း အဝိုင်း က ပြောဆိုကြသည်။

“ အစကတည်း က ဒီနယ်ပယ်မှာ တိုက်ပွဲတွေဖြစ်တော့ အလိုလို စိုးရိမ်နေရတာ။ အခု ကျနော်တို့ ဈေးသည် တဦး သေနတ်ပစ်ခံရတော့ ပိုပြီး ကြောက်နေရတယ်။ စိုးရိမ်နေရတယ်” ဟု ကျောက်မဲမြို့နယ် အသက် ၄၀ ဝန်းကျင်ရှိ စိုင်းယီ က သျှမ်းသံတော်ဆင့် သို့ ပြောသည်။

Photo by SHAN/ ကျောက်မဲမြို့အတွင်း ဆိုင်ကယ်ဈေးသည်များ

အဆိုပါ သေနတ်ပစ်ခံရပြီး သေဆုံးသွားသည့် ဦးစိုင်းခမ်းတွင် အသက် ၆ လအရွယ် ကလေး အပါဝင် ကလေး ၃ ဦး ၊ ဇနီးနှင့် အသက် ၆၀ကျော် အရွယ် မိခင်အိုအား ရှာဖွေ ကျွေးမွေးနေသူ တဦးဖြစ်ကြောင်း သိရသည်။

“ အခု သူမရှိတော့ သူ့အမျိုးသမီးနဲ့ ကလေးငယ်တွေ အတွက် စားဝတ်နေရေး ခက်ခဲမယ်။ သူက မိသားစုကို ရှာဖွေ ကျွေးမွေးတဲ့သူတယောက်ပါ။ အပြစ်မဲ့ ပြည်သူကို ပစ်တာတွေ မလုပ်သင့်ဘူး” ဟု စိုင်းယီ က ပြောပြသည်။

ကျောက်မဲမြို့နယ်အတွင်း နေထိုင်သူ အများစုသည် မနက် ၂ နာရီ အချိန် ကတည်းက ကျောက်မဲဈေးအတွင်း ဆိုင်ကယ်ဖြင့် ဟင်းများသွားရောက်ဝယ်ယူပြီး၊ တရွာဝင်တရွာထွက်လှည့်ပတ်ရောင်းချကြောင်း  ၊ ကျောက်မဲမြို့နေထိုင်သည့် သာမာန်လူတန်းစားနှင့် စစ်ဘေးရှောင်များစုစုပေါင်း  ၉၀ ရာခိုင်နှုန်းသည် ဆိုင်ကယ် ဈေးသည်များသာ ဖြစ်ကြကြောင်းသိရသည်။

“ ကျောက်မဲမှာနေတဲ့သူတွေ အမျိုးသား၊ အမျိုးသမီး အားလုံးနီးပါး ဈေးသည်တွေပါ။ ယောက်ျားတွေကတော့ မြို့နဲ့ ဝေးတဲ့နေရာတွေမှာ ရောင်းကြတယ်။ အန္တရာယ်ဆိုတာတော့ ဘာမှ ပြောလို့တော့မရဘူးပေါ့နော်။ ဘုရားတ ပြီး သွားနေရတယ်” ဟု ကျောက်မဲမြို့ နမ့်ဟူးတောင်း ကျေးရွာ ဈေးသည်တဦးဖြစ်သည် ပါ့မြ က သျှမ်းသံတော်ဆင့် သို့ ပြောသည်။

ယခုကဲ့သို့ ဈေးသည် တဦး သတ်ခံရသည့် အတွက် ကျောက်မဲမြို့ နယ် အတွင်း လိုက်လံ ရောင်းချနေသည့် ဈေးသည်များအတွက် နောက်ကျောမလုံသည့်ဘဝ ဖြစ်နေကြောင်း၊ စားဝတ်နေရေးရှာဖွေနေရသည့် အပြစ်မဲ့ ပြည်သူများကို သေနတ်ဖြင့် ပစ်ခတ်ခြင်း မပြုလုပ်ရန် ပါ့မြ က တောင်းဆိုလိုက်သည်။

ကျောက်မဲမြို့နယ်အတွင်း လက်နက်ကိုင်တပ်ဖွဲ့ပေါင်းစုံ လှုပ်ရှားနေထိုင်သဖြင့် ထိုသို့သောပစ်ခတ်ခံရခြင်းလည်းမကြာခဏဖြစ်ပွါးရာ ဆိုင်ကယ်ဈေးသည်ပစ်ခတ်ခံရမှုသည် ၁၀ ဦးထက်မနည်းရှိပြီဖြစ်ကြောင်း၊ လက်သည်မသိရဖြင့် မည်သည့်အာဏာပိုင်အဖွဲ့မှလည်း အရေးတယူဆောင်ရွက်ပေးခြင်းမျိုးမရှိခဲ့ကြောင်း  ဈေးသည်များအသိုင်းအဝိုင်းကပြောဆိုပါသည်။

 

ဢုပ်ႇဢူဝ်း ၽူႈတွႆႇႁွၵ်ႈ

SHARE