သျှမ်းမြောက် တွင် ၃ လ အတွင်း ရုပ်ပိုင်းဆိုင်ရာ လူ့အခွင့်အရေး ချိုးဖောက်ခံရသူ ၇၀ ဦးရှိ

0

သျှမ်းပြည် မြောက်ပိုင်းတွင် ၃ လ အတွင်း နည်းမျိုးစုံဖြင့်ရုပ်ပိုင်းဆိုင်ရာ လူ့အခွင့်အရေး ချိုးဖောက်ခံရမှု ၇၀ ဦး ခန့် ရှိကြောင်း တအာင်း လူမှု အဖွဲ့အစည်းက ပြောဆိုလိုက်သည်။

 

Photo Credit to Koong Sar Youth- သြဂုတ်လ ၁၈ ရက် ညပိုင်းက လားရှိုးမြို့နယ် ကုန်းဆာရွာအတွင်းလက်နက်ကြီးကျည်ကျရောက်ပေါက်ကွဲ ဒေသခံတဦးအား ထိမိ ပွဲချင်းပြီးသေဆုံး

မြန်မာ့တပ်မတော်နှင့် တအာင်း(ပလောင်) အမျိုးသားလွတ်မြောက်ရေး တပ်မတော် TNLA တို့တိုက်ပွဲဖြစ်ပွားသည့် သျှမ်းပြည်နယ် မြောက်ပိုင်း ကျောက်မဲ၊ သီပေါ၊ မန်တုံ၊ ကွတ်ခိုင် နှင့် လားရှိုး တဝိုက်တို့တွင် ဒေသခံ ပြည်သူလူထု လူ့အခွင့်အရေး နည်းမျိုးစုံ ချိုးဖောက်ခံနေရကြောင်း ဆိုပါသည်။

အဆိုပါ လူ့အခွင့်အရေး ချိုးဖောက်ခံရမှုတွင် အများစုမှာ မြေမြုပ်မိုင်း၊ လက်နက်ကြီး ထိခိုက်ဒဏ်ရာရခြင်း၊ ပြည်သူလူထုအား အတင်းအဓမ္မဖမ်းဆီးကာ လမ်းပြအဖြစ်ဆောင်ရွက်ခိုင်းခြင်း တို့အများဆုံးဖြစ်ကြောင်း တအာင်း အမျိုးသမီး အဖွဲ့အစည်း TWO မှ သတင်းပြန်ကြားရေး လွေးချီ့ဆငါး က သျှမ်းသံတော်ဆင့် သို့ပြောသည်။

“ လူ့အခွင့်အရေး ချိုးဖောက်ခံရတာ အမျိုးသားနဲ့ အမျိုးသမီး ဦးရေ က တူတူလောက်ပါပဲ။ အမျိုးသမီးများစုက မြေမြုပ်မိုင်းဒဏ်ထိတယ်။ အမျိုးသားတွေက တော့ တပ်က ဖမ်းဆီးနှိပ်စက်တာတွေ ပေါ်တာဆွဲတာတွေ ဖြစ်တယ်” ဟု လွေးချီ့ဆငါး က ဆိုသည်။

Photo Kutkai Youth- လက်နက်ကြီးထိမှန်သည့်နေအိမ်

လက်ရှိ ကောက်ယူရရှိထားသည့်အချက်အလက်အရ လူ့အခွင့်အရေးချိုးဖောက်ခံရမှုသည် လက်နက်ကြီးကြောင့် နေအိမ်ပျက်စီးဆုံးရှုံးခြင်း၊ ပစ္စည်းများ ခိုးယူခံရခြင်း၊ဖျက်ဆီးခံရခြင်း များ မပါဝင်ကြောင်း အဓိက ရုပ်ပိုင်းဆိုင်ရာ ထိခိုက်ခံရသည့် လူ့အခွင့်အရေး ချိုးဖောက်မှုသာ ကောက်ယူထားကြောင်းလည်း လွေးချီ့ဆငါး က ထပ်လောင်းပြောသည်။

“ သျှမ်းမြောက် ဆိုရင် ဒီလောက်မက ဘူး။ တချို့အပိုင်း လက်လှမ်းမမီတာ တချို့ရှိတယ်။ အိုးအိမ်တွေ ပစ္စည်းတွေဖျက်ဆီးခံရတာ အဓမ္မယူဆောင်သွားခြင်းခံရတာ အချက်အလက်တချို့ မဖော်ပြထားဘူး” ဟု လွေးချီ့ ဆငါး က ဆိုသည်။

၃ လအတွင်း လူ့အခွင့်အရေး ချိုးဖောက်ခံရမှု ရ၀ ဦးထက် များနိုင်ကြောင်း၊ လက်ရှိ ကောက်ထားသည့် စာရင်းသည် လက်လှမ်းမီသည့် နေရာသာ ကောက်ထားကြောင်းလည်း တအာင်း ဥပဒေရေးရာ ထောက်ကူပြု အဖွဲ့မှ မိုင်းမျိုးအောင်က သျှမ်းသံတော်ဆင့် သို့ပြောသည်။

“ လူ့အခွင့်အရေး ချိုးဖောက်ခံရတာ ဒီထက်များနိုင်တယ်။ ဒါက လက်လှမ်းမီးတဲ့နေရာပဲ ရှိသေးတယ်” ဟု မိုင်းမျိုးအောင် က ပြောသည်။

လူ့အခွင့်အရေး ချိုးဖောက်ခံရသည့် သူများ စာရင်းနှင့် အချက်အလက် သက်သေများကို စုကာ သက်ဆိုင်ရာသို့ စာတင်သွားမည် ဟုု လည်း မိုင်းမျိုးအောင်က ပြောသည်။

လက်နက်ကြီးကြောင့် ပျက်စီးသွားသည့် အဆောက်အဦးများ လျော်ကြေး ပြန်ရရန် ထက် လူ့အခွင့်အရေး ချိုးဖောက်ခံရသည့် ပြည်သူများ တရားမျှတမှု ရရှိရန် အရေးကြီးကြောင်းလည်း တအာင်း လူ့အခွင့်အရေး တက်ကြွလှုပ်ရှားသူများက တောင်းဆိုလိုက်သည်။

ထို့ပြင် လူ့အခွင့်အရေး ချိုးဖောက်ခံသည့် ပြည်သူများ အတွက် တစုံတရာ ကုစားပေးမှု ကို ပြုလုပ်ပေးစေလိုကြောင်း၊ ပြည်သူများကို ဦးတည်ပြီး တိုက်ပွဲဖြစ်ခြင်း၊ လူ့အခွင့်အရေး ချိုးဖောက်ခြင်း ဆက်လက်မပြုလုပ်ရန်လည်းတိုက်တွန်း ပြောဆိုလိုက်သည်။

လက်နက်ကြီးပစ်ခတ်ခြင်းနှင့် မြေမြုပ်မိုင်းကြောင့် ဒေသခံ (၁၀)ဦး၊ ဒဏ်ရာရရှိသူ (၂၃) ဦး၊တပ်မတော် မှလမ်းပြအဖြစ် ခေါ်ဆောင်ခံရသူ (၂၃) ဦး၊ ဖမ်းဆီးချုပ်နှောင်ခံရသူ (၃)ဦး၊ တပ်သားသစ်စုဆောင်းခံရသူ (၁၀)ဦး နှင့် ညှင်းပန်းနှိပ်စက်ခံရသူ (၁)ဦး တို့ဖြစ်ကြောင်း သိရသည်။

ဢုပ်ႇဢူဝ်း ၽူႈတွႆႇႁွၵ်ႈ

SHARE