သျှမ်းပြည် အရှေ့ပိုင်း မိုင်းဆတ်မြို့နယ်တွင် ကျပ်သိန်းပေါင်း ၇၀၀ ကျော်တန်ဖိုးရှိ မူးယစ်ဆေးနှင့် လက်နက်ခဲယမ်းများ သိမ်းဆည်းရမိကြောင်း သတင်းရရှိသည်။

စက်တင်ဘာလ ၂၄ ရက်နေ့ မနက် ၇ နာရီတွင် မိုင်းဆတ်မြို့နယ် ဝမ်မိုင်(အာခါ) ကျေးရွာနေ အသက် ၄၆ နှစ်ရှိ  လော်ဘယ် ဆိုသူ၏နေအိမ်သို့  အစိုးရအာဏာပိုင်များဝင်ရောက်ရှာဖွေရာ စိတ်ကြွဆေးပြား ၃၆၀၀၀ (ကာလပေါက်ဈေး ၃၆၉သိန်း)၊ စိတ်ကြွဆေးမှုန့် ၄ကီလို (ကာလပေါက်ဈေးကျပ်သိန်း ၄၀၀  )နှင့် လက်နက်ခဲယမ်းများကို သိမ်းဆည်းရမိကြောင်း မူးယစ်ရဲတပ်ဖွဲ့ ထုတ်ပြန်ချက် အရသိရသည်။

အဆိုပါ သိမ်းဆည်းရမိသည့် လက်နက်ခဲယမ်းများမှာ ပွိုင့် ၂၂ သေနတ် ၁ လက်၊ M22 သေနတ် ၁ လက်၊ အရှည် ၂ ပေ ၄ လက်မ ရှိ သေနတ် ၁ လက်၊ M 22 ကျည် ၈၀ တောင့် နှင့် ၅.၅၆ ကျည် ၁၂၀ တောင့်တို့ ဖြစ်ကြောင်း သိရသည်။

ထိုမူးယစ်ဆေးဝါး သိမ်းဆည်းခံရမှုနှင့် ပတ်သက်ပြီး မိုင်းတွမ်းနယ်မြေရဲစခန်းတွင် မူးယစ်ဆေးဝါး နှင့် စိတ်ကို ပြောင်းလဲ စေသော ဆေးဝါးများ ဆိုင်ရာ ဥပဒေ ဖြင့် အမှုဖွင့်အရေးယူပြီး ကွင်းဆက်များဖော်ထုတ်စစ်ဆေးလျက်ရှိကြောင်း သတင်းရရှိသည်။

ထိုနည်းတူ စက်တင်ဘာ ၂၄ ရက် ညနေပိုင်းက သျှမ်းပြည်မြောက်ပိုင်း ကွတ်ခိုင်မြို့ အိုရီယန် တယ် တိုးဂိတ်တွင် အသက် ၂၆ နှစ် အရွယ် ချမ်းငြိမ်းအောင် မောင်းနှင်လာသည့် ဆိုင်ကယ်ကို စစ်ဆေးရာ ဘိန်းစိမ်း ၂၅.၅ ကီလို (ကာလပေါက်ဈေး ၂၅၅) သိန်း နှင့် လက်ကိုင်ဖုန်းကို သိမ်း ဆည်းရမိကြောင်း မူးယစ်ရဲ သတင်းအရ သိရသည်။

တာချီလိတ်မြို့နယ် မယ်ခေါင်ကျေးရွာ အနီးတွင်လည်း စက်တင်ဘာလ ၁၆ ရက်က အသက်  ၇၃  နှစ် အားဖာနေအိမ်တွင် စိတ်ကြွဆေးပြားနှင့် လက်နက်ခဲယမ်းများကို ဖမ်းဆီးရမိခဲ့သည်။