ကျောက်မဲ နောင်ပိန်တွင် အမျိုးသမီးတဦး သတ်ခံရ ၊အလောင်း ပိုင်ရှင်မဲ့ဖြစ်နေ

0

သျှမ်းပြည်နယ် မြောက်ပိုင်း ကျောက်မဲမြို့နယ် နောင်ပိန်ကျေးရွာ အနီးတွင် အမျိုးသမီး တဦး အသတ်ခံရပြီး၊ ယနေ့အချိန်ထိ အလောင်းမှာ ပိုင်ရှင်မဲ့ ဖြစ်နေကြောင်း သိရသည်။

Photo Credit to ကမ်းလင့်လက်များ လူမှူကူညီရေးအသင်း အောင်ဓမ္မာရုံ နောင်ပိန်- ပိုင်ရှင်မဲ့အမျိုးသမီးအလောင်းအား ဆွေမျိုးများသိစေရန် သက်ဆိုင်ရာအာဏာပိုင်များ ဖြန့်ဝေထားသည့် လက်ကမ်းစာစောင်

ဖြစ်စဉ်မှာ စက်တင်ဘာလ ၁၅  ရက်နေ့က အသက် ၃၀ ဝန်းကျင် အမျိုးသမီး တဦးသည် ကျောက်မဲမြို့နယ် နောင်ပိန်ရဲစခန်းအပိုင် လွိုင်လန်း လမ်းတွင် သတ်ခံထားရပြီး၊ လက်ရှိ အချိန်ထိအလောင်းမှာ ပိုင်ရှင်မဲ့ဖြစ်နေကြောင်း၊ သတ်ခံရသည့် အမျိုးသမီး၏ ဆွေမျိုးများကို ရှာဖွေနေကြောင်း နောင်ပိန်ရဲစခန်း မှ ရဲအုပ်သန်းထွန်းက သျှမ်းသံတော်ဆင့်သို့ပြောသည်။

“ အင်္ဂတေ နဲ့ ရိုက်ခံထားရတာ။ ဦးခေါင်းထိတယ်။ မျက်စိထိထားတယ်။ ဘယ်ရွာ က လဲဆိုတာတော့ မသိသေးဘူး။ ဓာတ်ပုံတွေနဲ့ ရွာတွေလိုက်ဖြန့်ထားတယ်။ နောင်ပိန် ပတ်ဝန်းကျင်က ဟုတ်၊ မဟုတ် မသိသေးဘူး။ တရားခံကိုလည်း စုံစမ်းစစ်ဆေးနေပါတယ်” ဟု ရဲအုပ် သန်းထွန်း က ဆိုသည်။

Photo Credit to Citizen Journalist- ကျောက်မဲမြို့အဝင်ဆိုင်းဘုတ်

လွိုင်လန်းလမ်း က ချုံပုတ်အတွင်း သေဆုံးနေသည့် အဆိုပါအမျိုးသမီးအလောင်းကို ကျောက်မဲ နမ့်ခုံး ပရဟိတ အသင်းမှ  ကျောက်မဲ ပြည်သူ့ဆေးရုံ ရင်ခွဲရုံ သို့ ပို့ဆောင်ထားကြောင်း၊ ထိုအလောင်း ပိုင်ရှင်များ သိရှိစေရန် လည်း နီးစပ်ရာ လူမှု အဖွဲ့အစည်း၊ ကျေးရွာ အုပ်ချုပ်ရေးမှူး တို့ကို ပုံ နှင့်တကွ ဖြန့်ဝေပေးထားကြောင်း ကမ့်လင့်လက်များ လူမှုကူညီရေးအသင်း မှ ဦးနေအောင် ကပြောသည်။

“ အမျိုးသမီး တဦး အသတ်ခံရတာဟုတ်ပါတယ်။ အခု အလောင်းပိုင်ရှင်တွေ သိဖို့ အတွက် ကျနော်တို့ ဓာတ်ပုံတွေလိုက်ကူဖြန့်ပေးနေတယ်။ ဘယ်က အမျိုးသမီး ဆိုတာတော့ ပြောလို့မရသေးဘူး” ဟု ဦးနေအောင်ကပြောသည်။

အဆိုပါ အမျိုးသမီး သတ်ခံရသည့် အမှု နှင့် ပတ်သက်ပြီး နောင်ပိန်နယ်မြေ ရဲစခန်း တွင် (ပ) ၂၂/ ၂၀၁၉ ရာဇသတ်ကြီး ပုဒ်မ ၃၀၂ အရ အမှု ဖွင့်ထားပြီး အမှု အား ရဲအုပ်သန်းထွန်းမှ အသေးစိတ် စစ်ဆေးလျှက် ရှိကြောင်း သိရသည်။

ဢုပ်ႇဢူဝ်း ၽူႈတွႆႇႁွၵ်ႈ

SHARE