ပြည်သူ့စစ်တပ်ဖွဲ့သည် အရပ်သားအဖွဲ့အစည်းများဖြစ် ဟု ကာကွယ်ရေးဝန်ကြီးဌာနပြော

ပြည်သူ့စစ် တပ်ဖွဲ့သည် တပ်မတော်သား အဖွဲ့အစည်း မဟုတ်၊ အရပ်သားအဖွဲ့အစည်းများ ဖြစ်ကြောင်း ကာကွယ်ရေးဝန်ကြီး ဌာန ဒုတိယဝန်ကြီး ဗိုလ်ချုပ်မြင့်နွယ် က ပြောကြားသည်။

စက်တင်ဘာ ၁၁ရက်နေ့ ဒုတိယ အကြိမ် ပြည်သူ့လွှတ်တော် (၁၃)ကြိမ်မြောက် ပုံမှန် အစည်းအဝေး (၁၉) ရက်နေ့ ပေါင်မဲဆန္ဒနယ် ပြည်သူ့လွှတ်တော် ကိုယ်စားလှယ် ဒေါ်မိကွန်ချမ်း မေးမြန်းသည့် ပြည်သူ့စစ်များကို မည်သည့် အတွက် ကြောင့်ထားရှိပြီး၊ ပြည်သူ့စစ်များ လုပ်ဆောင်ချက်များနှင့် ပြည်သူ့စစ်အဖွဲ့များကို မည်သည့် ဌာနအဖွဲ့အစည်းတွင် တာဝန်ခံ မည်ကို သိလိုခြင်း နှင် စပ်လျဉ်း ပြီး ဗိုလ်ချုပ် မြင့်နွယ် က ပြောကြားခဲ့သည်။

ပြည်သူ့စစ်များသည် မိမိတို့ တပ်မတော်သား အဖွဲ့ အစည်း မဟုတ်ကြောင်း၊ အရပ်ဘက် အဖွဲ့အစည်းများသာဖြစ်ကြောင်း၊ ထို့ကြောင့် ရဲစခန်း၊ ပြည်သူ့ရဲ၊ ရဲဘက်ဆိုင်သည့် နယ်ဘက် အမှုသာ ဖြစ်ကြောင်းဗိုလ်ချုပ်မြင့်နွယ် က ပြောသည်။

ပြည်သူ့စစ်များသည် တိုင်းစစ်ဌာနချုပ် တွင် ကြီးကြပ်ကွပ်ကဲ ကာ ဖွဲ့စည်းခြင်း၊ လေ့ကျင့်ပေးခြင်း နှင့်တာဝန်ခွဲဝေပေးပြီး အမှုအခင်းဖြစ်ပါက နယ်ဘက်တရားဥပဒေဖြင့် အရေးယူနိုင်ရေး အတွက် ဆောင်ရွက်ကြောင်း ဗိုလ်ချုပ်မြင့်နွယ်က ပြည်သူ့လွှတ်တော် အစည်းအဝေးတွင် ပြန်လည်ဖြေကြားခဲ့သည်။

ပြည်သူ့စစ် ဌာနေ အဖွဲ့များ အား တပ်မတော် တပ်ရင်း အသီးသီးမှ တပ်ဖွဲ့များမှ ဖွဲ့စည်းရေး၊ လေ့ကျင့်ရေး ၊ လက်နက်တပ်ဆင်ရေး နှင့် တာဝန်ခွဲဝေ သတ်မှတ်ပေးရေး အပိုင်းကို တာဝန်ယူ ဆောင်ရွက်ရှိသည်။

နယ်မြေအလိုက် ဖွဲ့စည်းထားသည့် ပြည်သူ့စစ်အဖွဲ့ များကို ကြီးကြပ်ကွပ်ကဲပြီး တနိုင်ငံလုံး အတိုင်းအတာ ဖြင့် ပြည်သူ့စစ် နယ်ခြားတပ်များ ညွှန်ကြားရေးမှူးရုံး က ကြီးကြပ် ကွပ်ကဲလျက်ရှိကြောင်းလည်း ဗိုလ်ချုပ်မြင့်နွယ်က ပြန်လည်ဖြေကြားခဲ့သည်။

ပြည်သူ့စစ် ဖွဲ့စည်းမှု သည် စစ်မက် အရေးအခင်းများ အရေးပေါ် ဖွဲ့စည်းထားခြင်းမဟုတ်ဘဲ အမျိုးသားကာကွယ် ရေး ကို အချိန်မရွေး အသင့်ဖြစ်စေရန် ဖွဲ့စည်းလေ့ကျင့်ပေးထားခြင်းဖြစ်သည်။

တိုင်းရင်းသား ပြည်သူလူထု အတွင်း ဖွဲ့စည်းထားသည့် ပြည်သူ့စစ်အဖွဲ့ဝင် များသည် မြို့နယ်၊ ကျေးရွာ များ လုံခြုံရေး အတွက် ကာကွယ်စောင့်ရှောက်နေကြသူများဖြစ်သည်။

တပ်မတော် ၏ ကြီးကြပ်ကွပ်ကဲမှုဖြင့် တိုင်းစစ်ဌာနချုပ်နယ်မြေများတွင် ရပ်ကွက်၊ ကျေးရွာ၊ စက်ရုံ၊အလုပ်ရုံ လုပ်ငန်းခွင် စသည့် အချက်အချာ ကျနေရာများ တွင်စစ်ရေး လိုအပ်ချက် အရ ပြည်သူ့စစ်ဌာနေ အဖွဲ့များ ဖွဲ့စည်းထားသည်။

တိုင်းစစ်ဌာနချုပ် နယ်မြေ အသီးသီးတွင် ပြည်သူ့စစ်ဌာနေအဖွဲ့များ ဖွဲ့စည်းထားခြင်းသည် ပြည်တွင်း လက်နက်ကိုင် သောင်းကျန်းမှု အန္တရာယ်ကို ချေမှုန်းနိုင်ရေး အတွက် ရေတို ရည်မှန်းချက် အရ ဖွဲ့စည်းထားခြင်းဖြစ်ကြောင်း လည်း ဗိုလ်ချုပ်မြင့်နွယ် က ပြောသည်။

မြန်မာနိုင်ငံ တနိုင်ငံလုံး ပြည်သူ့စစ် အဖွဲ့ပေါင်း ၆၀၅ဝဖွဲ့ ရှိကြောင်း သိရသည်။

သျှမ်းပြည်နယ် အတွင်းတွင် ပြည်သူ့စစ် နာမည်ဖြင့်မူးယစ်ဆေးဝါး ရောင်းဝယ်ဖောက်ကားခြင်း၊ လောင်းကစားရုံဖွင့်လှစ်ခြင်း နှင့် ဒေသခံများကို နိုင်ထက်စီးနင်း ပြုလုပ်နေသည်ဟု ဆုိကာဒေသခံ များ ပြည်သူ့စစ်များကို စိုးရိမ်ထိတ်လန့်နေရသည်။