သျှမ်းပြည်အရှေ့ပိုင်း သျှမ်းနှင့်ထိုင်း လူထုများအပြင် တိုင်းမှူးအဆက်ဆက် ယုံကြည် ကိုးကွယ်သည့် တာချီလိတ်မြို့ မကာဟိုခမ်းရပ်ကွက်ရှိ မဟာမြတ်မုနိဘုရားကြီး မှဆရာတော် ဘဒ္ဒန္တ ပညာသာမိ ဘဝနတ်ထံပျံလွန်တော်မူလေရာ အန္တိမ အဂ္ဂိစျာပနအခမ်းအနားကို အောက်တိုဘာလကုန်တွင် ပြုလုပ်မည်ဟု သတင်းရရှိသည်။

တာချီလိတ်မြို့ မဟာမြတ်မုနိ ဘုရားကြီး စာသင်တိုက် ပဓာန နယက ဆရာတော် အဂ္ဂမဟာ သဒ္ဓမ္မ ဇောတိကဓဇ ဘဒ္ဒန္တပညာသာမိ သက်တော် (၈၅) နှစ်၊ ဝါတော် (၆၅) ဝါ သည် စက်တင်ဘာ (၇) ည ၈ နာရီကျော်တွင် ဘဝနတ်ထံ ပျံလွန်တော်မူခဲ့ပြီဖြစ်သည်။

ဆရာတော်၏ အန္တိမ  အဂ္ဂိ စျာပနအခမ်းအနား ကို အောက်တိုဘာ ၃၀ ရက်နေ့တွင် ဇာတိဖြစ်သော တာချီလိတ်မြို့နယ် မိုင်းကိုးကျေးရွာ အုပ်စု၊ ဆီလီငေါ့ကျေးရွာ တွင် ပြုလုပ်မည် ဖြစ်ကြောင်း သျှမ်းပြည်နယ် အရှေ့ပိုင်း သံဃာ့အဖွဲ့ မှ ဘဏ္ဍာရေးတာဝန်ခံ ဆရာတော် ဦးကုလိသ က သျှမ်းသံတော်ဆင့် သို့ ပြောသည်။

“ ဆရာတော်က သက်ကြီးရောဂါနဲ့ဘဲပျံလွန်တော်မူပါတယ်။ ရုပ်ကလပ်ကိုတော့ ဆရာတော်ထိုင်တဲ့ ကျောင်းမှာ ၄၅ ရက်ထားပြီး၊ အဲဒီနောက်မှာတော့ ဆရာတော်ရဲ့ ဇာတိမြေမှာပဲ ယူသွားသဂြိုလ်ပါမယ်” ဟု ဦးကုလိသ က ဆိုသည်။

ဆရာတော်သည် သျှမ်းပြည်နယ်လုံးဆိုင်ရာသံဃာ့အဖွဲ့ချုပ် ၏ အနုနာယက ဖြစ်ပြီး၊သျှမ်းပြည်နယ် အရှေ့ပိုင်းတွင် ဒုတိယ ဂိုဏ်းချုပ် ဆရာတော်(၂) လည်းဖြစ်သည်။

ဆရာတော် ကို သျှမ်းပြည်နယ် အရှေပိုင်း ပြည်သူများ သာမက စစ်ဘက်ဆိုင်ရာ အရာရှိများဖြစ်သည့် ကာကွယ် ရေး ဦးစီချုပ် ဗိုလ်ချုပ်မှူးကြီး မင်းအောင်လှိုင်၊ သမ္မတဟောင်း ဦးသိန်းစိန် ၊ တြိဂံစစ်တိုင်းမှူးများ အဆက်ဆက်မှ ယနေ့တိုင်းမှူး ဗိုလ်ချုပ် ခင်လှိုင် တို့ ယုံကြည်ကိုးကွယ်ခဲ့ကြသည့်ဆရာတော်တပါး ဖြစ်သည်။

ထို့အပြင် ထိုင်းနိုင်ငံဘက်ခြမ်းမှ အစိုးရ ဌာနဆိုင်ရာများ၊ ပြည်သူများလည်း ဆရာတော်ကို ယုံကြည် ကိုးကွယ်ကြ သည်။

“ ဆရာတော်မှာ ဒကာတွေတော့များတယ်။ မနေ့က တော့ တိုင်းမှူးခင်လှိုင်နဲ့ ဌာနဆိုင်ရာတွေ လည်းလာတယ်။ သမ္မတဟောင်း ဦးသိန်းစိန် လည်း ဒကာဖြစ်ခဲ့တယ်။နောက် မင်းအောင်လှိုင်လည်း ဖြစ်တယ်။ ထိုင်းကလည်း ဆရာတော် ဒကာတွေရှိတယ်” ဆရာတော် ဦးကုလိသ  က သျှမ်းသံတော်ဆင့် သို့ ပြောသည်။

ဆရာတော် ဘဒ္ဒန္တပညာသာမိသည် ၁၉၃၆ ခုနှစ်က တာချီလိတ်မြို့နယ် မိုင်းကိုးကျေးရွာ အုပ်စု ဆီလီငေါ့ ကျေးရွာ ဇာတိ ဖြစ်ပြီး ငယ်နာမည် မှာ စိုင်းဖတ် ဖြစ်သည်။

စိုင်းဖတ်သည် အသက် ၁၁ နှစ် အရွယ်တွင် ယန်းခမ်း ဆရာတော် အရှင် သောဘိတမထေရ် ထံ တွင် ကိုရင်ဝတ် ပြီး သာသနာ့ဘောင်အတွင်း စတင်ဝင်ရောက်ခဲ့သည်။

၁၉၆၈ ခုနှစ်တွင် တာချီလိတ်မြို့ မဟာမြတ်မုနိဘုရားကြီး ကျောင်းတိုက်တွင် စတင်ဖွင့်လှစ်သည့် ဒမ္မောဒယ ပရိယတ္တိစာသင်တိုက်တွင် စာချ အဖွဲ့ ခေါင်းဆောင်အဖြစ် သာသနာ့ တာဝန်ထမ်းဆောင်ရင်း ၁၉၇၈ ခုနစ် ဧပြီ(၃) ရက်နေ့တွင် ရဟန်းသက် (၁၈) ဝါ တွင် ကျောင်းထိုင်ဆရာတော် အဖြစ် ကျောင်းအပ်နှံခံရရာမှ ယနေ့တိုင်လူထုယုံကြည်အားကိုးရသောဆရာတော်တပါး ဖြစ်ပါသည်။