သျှမ်းပြည်တောင်ပိုင်း တောင်ကြီးမြို့ တွင် မိုးသည်းထန်ရွာသွန်းမှုကြောင့် ရေကြီး ကာ အသက် ၁၇ နှစ်အရွယ် အမျိုးသား တဦး မြောင်းထဲပြုတ်ကျသေဆုံးကြောင်း သိရသည်။

စက်တင်ဘာလ ၄ ရက်နေ့က တောင်ကြီးမြို့တွင် မိုးသည်းထန်စွာရွာသွန်းသဖြင့် ရေကြီးကာ လမ်းမတော် ရပ်ကွက် ရေမြောင်းတခုအတွင်း အသက် ၁၇ နှစ် အရွယ် အမျိုးသား တဦး ကျွံကျပြီး ရေစီးဖြင့်မျောပါ သေဆုံးသွားကြောင်း ဒေသခံများ ပြောပြချက် အရ သိရသည်။

ရေမြောင်းနှင့်မျောပါသွားသည့် ခွန်အောင်သိန်း ၏ရုပ်အလောင်းကို တောင်ကြီးမြို့ နှင့် ရမိုင်ခန့် ဝေးကွာသည့် အေးသာယာ အဆင်း ရေချောင်းတွင် ပြန်လည် ရှာဖွေတွေ့ရှိခဲ့သည်။

“ အဓိက တောင်ပေါ်ကျလာတဲ့ရေတွေက ရေစီးသန်တယ်။ ရေမြောင်း ကြံ့ခိုင်မှုကလည်း မကောင်းတော့ ကျွံသွားတာ။ ရေစီးနဲ့ အတူ ရေမြောင်းထဲ မျောပါသွားတယ်” ဟု တောင်ကြီး ဒေသခံ စိုင်းနေလင်း က သျှမ်းသံတော်ဆင့် သို့ ပြောသည်။

တောင်ကြီးမြို့တွင် မိုးသည်းထန်စွာ ရွာသွန်းပါက တနှစ်ထက် တနှစ် ရေကြီးမှုများကာ အနိမ့်ပိုင်း ရပ်ကွက်နေအိမ်ခြံထဲသို့ ရေဝင်ရောက်မှု ရှိလာကြောင်းလည်း စိုင်းနေလင်း က ပြောပြသည်။

“ ဒီနှစ်ထဲမှာ ၂ ခါ ရှိပြီ နေအိမ်ထဲကို ရေဝင်တာ။ မနေ့က တော့ ရေက ခြံထဲမှာ ၄ ပေလောက်ရှိတယ်။ ကျမ ရင်ညွန့်လောက်ထိရှိတယ်” ဟု နေအိမ်ထဲ ရေဝင်သည့် ညောင်ပင်သာရပ်ကွက် မှ မသန္တာဦး က သျှမ်းသံတော်ဆင့် သို့ပြောသည်။

တောင်ကြီး ရေကြီးရသည့် အကြောင်းရင်းမှာ ရေမြောင်းများ စနစ်တကျ မဖော်ခြင်း၊ တချို့မှာ ရေမြောင်းဘက်ကိုနယ်ကျွံကာ အုတ်တံတိုင်းများ တည်ဆောက်ခြင်းကြောင့် တောင်ကြီး အနိမ့်ပိုင်းရပ်ကွက်များ မိုးရွာသွန်းတိုင်း ရေကြီးနေရခြင်းဖြစ်သည် ဟု မသန္တာဦး က ပြောသည်။

“ အရင်တုန်းက မြေပုံ အရမြောင်း ဧရိယာက ပေ ၂၀ ပေ ၃၀ ရှိတယ်။ အခု က ၆ ပေ ရ ပေ ပဲရှိတယ်။ ရေမြောင်း ရဲ့ ဘေးတဖက် တချက်မှာလည်း အိမ်တွေက ကျူးကျော်ထားတာရှိတယ်။ နောက် ရေမြောင်းထဲမှာ မြေဖို့ထားတွေကြောင့် အောက်ကို မစီးတော့ဘဲ ရေကြီးနေတာပါ” ဟု မသန္တာဦးက ဆိုသည်။

တောင်ကြီးမြို့ တမြို့လုံး ရှိရေမြောင်းများ ပြန်လည်ပြုပြင်ခြင်း၊ ရေမြောင်းတလျှောက် အမှိုက်များ မြေများ ပြန်လည် ဆယ်ယူခြင်း မပြုလုပ်ပါက တောင်ကြီး အနိမ့်ပိုင်း ရပ်ကွက် ရေထပ် ကြီးနိုင်ကြောင်း လည်း တောင်ကြီးဒေသခံများက ပြောသည်။

“ ဟိုအရင် က တောင်အောက်ကို ရေတွေ ဘယ်လို စီးဆင်းမလဲဆိုတာ ကို ရေမြောင်း ပညာရှင်တွေ ရှိတယ်။ သူတို့နဲ့ စနစ်တကျပြန်ဖော်ဖို့လိုတယ်။ မဟုတ်ရင် ဒီနေရာမှာ ပဲ လာစုရင်တောင်ပေါ်မှာ ရေကြီးတာနဲ့ မြို့သစ်တွေ ရွှေညောင်တွေမှာလည်း ရေကြီးမယ်။ အကျိုးဆက်က ဒီတနေရာတည်း မဟုတ်ဘူးလေ” ဟု မသန္တာဦး ကပြောဆိုလိုက်သည်။

သြဂုတ် လ ၁၈ ရက်နေ့ကလည်း တွင် တောင်ကြီးမြို့ပေါ် ရှိ ရပ်ကွက် တချို့တွင် ရေကြီးရေလျှံမှု ဖြစ်ပွားက အသက် (၆၀) အရွယ် အမျိုးသား တဦး သေဆုံးခဲ့ကြောင်း သိရသည်။