သျှမ်းပြည်မြို့တော် တောင်ကြီးမြို့တွင် စစ်ကော်မရှင်လက်အောက်ခံ ဌာနဆိုင်ရာ ပူးပေါင်းအဖွဲ့များမှ ရှောင်တခင် ဧည့်စာရင်း ဝင်ရောက်စစ်ဆေးပြီး ပေါ်တာဆွဲ ဖမ်းဆီးမှုများ ရှိနေကြောင်း သတင်းရရှိသည်။

ဖေဖော်ဝါရီလ ဒုတိယပတ်မှ စတင်ပြီး တောင်ကြီးမြို့ပေါ် ရပ်ကွက်များရှိ အမျိုးသားအဆောင်များကို စစ်ကော်မရှင်လက်အောက်ခံ ဌာနဆိုင်ရာ ပူးပေါင်းအဖွဲ့များမှ ရှောင်တခင် ဧည့်စာရင်း ဝင်ရောက်စစ်ဆေးပြီး ဖမ်းဆီးမှုများ ရှိနေကြောင်း၊ ညအချိန်တွင်လည်း လမ်းပေါ် မထင်မှတ်ဘဲ ပေါ်တာဆွဲခြင်းများ ရှိနေကြောင်း တောင်ကြီးဒေသခံများက ပြောသည်။

“ညဘက်ဆို ယောကျ်ားလေးတွေ နေတဲ့ အဆောင်ဆို ပိုပြီး ဧည့်စာရင်း ဝင်စစ်တာ များတယ်။ နောက်ပြီး ညဘက်ဆို လမ်းမပေါ်၊ လမ်းကြားတွေမှာလည်း စစ်သားတွေက ကင်းလှည်ပြီး ဖမ်းတာရှိတယ်။ နယ်ဘက်က တက်တာတဲ့သူကို ဉီးတည်ဖမ်းနေတာ” ဟု အသက် ၂၅ နှစ်အရွယ် လူငယ်အမျိုးသားတစ်ဉီးက သျှမ်းသံတော်ဆင့်ကို ပြောသည်။

လက်ရှိအချိန်သည် တက္ကသိုလ်တက်နေသည့် အချိန်ဖြစ်ပြီး၊ တောင်ကြီးတက္ကသိုလ် အနီးတဝှိုက်တွင် အမျိုးသားအဆောင် နှစ်ဆယ်ခန့် ရှိခြင်းကြောင့် ထိုအဆောင်များတွင် နေထိုင်သည့် ကျောင်းသားများသည် ညအချိန် စိုးရိမ်စိတ်ဖြင့် အိပ်စက်နေရကြောင်း ၎င်းအမျိုးသားက ပြောသည်။

“သူတို့ (စစ်ကော်မရှင်) က ဝင်စစ်ချင်တဲ့ အဆောင်ကို ဝင်စစ်တာ ဆိုတော့ ကြောက်ရတယ်။ နောက်ပြီး ကိုယ်က ပါသွားရင် မိဘတွေ မသိလိုက်မှာ ကြောက်တာ၊ ညညဆိုရင် ကောင်းကောင်း မအိပ်ရဘူး” ဟု တောင်ကြီးတက္ကသိုလ်အနီး အဆောင်နေ ကျောင်းသားတစ်ဦးက ပြောဆိုသည်။

ထို့အပြင် အခြားမြို့နယ်မှ တောင်ကြီးမြို့ပေါ်သို့ လာရောက် ကျောင်းတက်သူများ အနေဖြင့် အသွားအလာ ဆင်ခြင်ရန် လိုအပ်ကြောင်း၊ လက်ရှိ စစ်ကော်မရှင်တပ်သည် နယ်မှလာသည့် ရွှေ့ပြောင်းလုပ်သားများကိုလည်း ဉီးတည် ဖမ်းဆီးမှုများ ရှိနေကြောင်း တောင်ကြီးမြို့သို့ ကျောင်းလာတက်သည့် ကျောင်းသူတစ်ဦးက သျှမ်းသံတော်ဆင့် ကိုပြောသည်။

“ကျမတို့က နယ်က ကျောင်းလာတက်တာ၊ ညပိုင်းဆို အပြင်ထွက်တာ မျိုးရှိတယ်။ အခုနောက်ပိုင်းတော့ မထွက်ရဲတော့ဘူး၊ ထွက်လည်း တစ်ယောက်တည်း မထွက်ရဲဘူး။ ကိုယ်ပေါ်တာဆွဲခံရရင် ဘယ်သူမှ သိလိုက်မှာ မဟုတ်လို့၊ အဆွဲခံရရင် နယ်ကဆိုတော့ လိုက်ရခက်တယ်လေ။ မိဘတွေ စိတ်ပူရုံပဲ တတ်နိုင်မှာလေ”ဟု အဆိုပါ ကျောင်းသူက ပြောဆိုသည်။

အလားတူ ညောင်ရွှေမြို့ပေါ် ရပ်ကွက်များတွင်လည်း ပေါ်တာဆွဲ ဖမ်းဆီးခံရသူ အယောက် (၃၀) ကျော် ပါသွားကြောင်း သိရပြီး ပေါ်တာဆွဲခံရသူများကို ရပ်စောက်ဘက်သို့ ပို့ဆောင်နေကြောင်း သတင်းရင်းမြစ်များက ပြောသည်။

စစ်ကော်မရှင်တပ်သည် ၂၀၂၄ ခုနှစ်တွင် ပြည်သူ့စစ်မှုထမ်းဥပဒေကို အသက်သွင်းခဲ့ပြီးနောက် စစ်မှုထမ်းသင်တန်းအတွက် အသက် (၁၈) နှစ်မှ (၂၇)နှစ် အတွင်း အမျိုးသမီးများနှင့် အသက် (၁၈)နှစ်မှ (၃၅) နှစ်ကြား အမျိုးသားများကို သတ်မှတ်ခေါ်ဆောင်နေကြောင်း သိရှိရသည်။

အလားတူ စစ်ကော်မရှင်၏ ရွေးကောက်ပွဲကာလအတွင်း စစ်မှုထမ်းခေါ်ယူမှု ရပ်နားထားသော်လည်း ပြီးခဲ့သည့် ဇန်နဝါရီလအတွင်း ရွေးကောက်ပွဲပြီးနောက် ယခုလ ဖေဖော်ဝါရီလ ပထမပတ်မှ စပြီး စစ်မှုထမ်း အမှတ်စဉ် (၂၀)ကို အင်းလေးဒေသတွင် ထပ်မံခေါ်ယူနေသည်။