သျှမ်းပြည်နယ် မြောက်ပိုင်း ကွတ်ခိုင်မြို့နယ် အတွင်း လက်နက်ကြီးများ ကျသဖြင့် အရပ်သားများ သေဆုံးသည့် ကိစ္စ နှစ်ဖက်တပ် အပြန်အလှန်စွပ်စွဲနေကြသည်။
သြဂုတ် ၃၁ ရက် မနက် ၉ နာရီ ကျော် ကွတ်ခိုင်မြို့နယ် မော်ဟိတ်စုစည်းကျေးရွာ တွင် လက်နက်ကြီးကျကာ အမျိုးသမီး များနှင့် လသားကလေးငယ် အပါအဝင် ၅ ဦး သေဆုံးမှုသည် ညီနောင် မဟာမိတ် (၃)ဖွဲ့ ၏ လက်ချက် ဟု တပ်မတော် ကာကွယ်ရေးဦးစီးချုပ်ရုံး မှ စက်တင်ဘာ ၂ ရက်နေ့ က ထုတ်ပြန်ခဲ့သည်။
ညီနောင် မဟာမိတ် (၃) ဖွဲ့သည် သြဂုတ် ၃၁ ရက် မနက် ၉ နာရီ မှ ၁၁ နာရီ အထိ ကွတ်ခိုင်မြို့တွင် နှင့် နယ်မြေခံတပ်ရင်း ဌာနချုပ် နေရာ ၂နေရာ မှ လက်နက်ကြီးများဖြင့် လာရောက် နှောက်ယှက် ပစ်ခတ်ခဲ့ရာ မော်ဟိတ်စုစည်း ရွာ အတွင်း ကျရောက် ပေါက်ကွဲမှုကြောင့် အမျိုးသမီးများနှင့် ကလေးငယ် အပါအဝင် ၅ဦး သေဆုံးပြီး ၃ဦး ဒဏ်ရာ ရရှိကြောင်း ထုတ်ပြန်ချက်တွင်ရေးသားထားသည်။
တဖက်တွင်လည်း တအာင်း(ပလောင် ) အမျိုးသားလွတ်မြောက်ရေး တပ်မတော်(TNLA) ၏ သတင်းဝက်ပ်ဆိုဒ်တွင် ကွတ်ခိုင်အခြေစိုက် မြန်မာ့စစ်တပ် ခလရ ၂၄၁ မှ မမ ၁၂၂ လက်နက်ကြီးပစ်ခတ်မှုကြောင့် မော်ဟိတ် စုစည်း ရွာ အတွင်း ပေါက်ကွဲရာ အပြစ်မဲ့ ပြည်သူ ၅ဦးထိမှန်သေဆုံးခဲ့ကြောင်း စက်တင်ဘာ (၂)ရက်နေ့တွင် ထုတ်ပြန်ကြေညာခဲ့သည်။
သျှမ်းပြည်နယ် မြောက်ပိုင်း ပြည်ထောင်စု လမ်းမတလျှောက် ဖြစ်ပွါးသော တိုက်ပွဲများတွင် အရပ်သား ထိခိုက်၊ သေဆုံးမှု များ နှင့် ပတ်သက်ပြီး မည်သည့်လက်နက်ဖြစ်ကြောင်း ကြည့်ရုံဖြင့် သိနိုင်သည်ဟု နိုင်ငံတော် သမ္မတ ပြောရေး ဆိုခွင့်ရှိသူ ဦးဇော်ဌေး က သြဂုတ် ၃၁ ရက့် သတင်းစာရှင်လင်းပွဲတွင် ပြောဆိုထားသည်။
“ လက်နက်တွေ ကြည့်လိုက်ရင် သိနိုင်ပါတယ်။ အဲ့ဒါဘယ်ဟာက တိုက်တဲ့ဟာလဲဆိုတာ ကြည့်လိုက်ပါ။ ဓာတ်ပုံတွေ၊ ဗီဒီယိုတွေ ရှိတယ်။ ကြည့်လိုက်ရင် ဘယ်သူ့လက်ချက် ဆိုတာ သိလိမ့်မယ်” ဟု ဦးဇော်ဌေး က သတင်းထောက်များ မေးမြန်းချက်ကို ပြန်လည် ဖြေကြားခဲ့သည်။
ဆက်လက်ပြီး ရက္ခိုင်တပ်မတော်(AA) ဒု စစ်ဦးစီးချုပ် ဒေါက်တာ ညိုထွန်းအောင် က လည်း“ ကျနော်တို့ ပြည်သူတွေဒုက္ခရောက်အောင် ဘယ်တော့မှမလုပ်ဘူး။ ရခိုင်မှာဆို ရခိုင်လူမျိုးတွေဖြစ်တယ်။ တအာင်းမှာဆို တအာင်းလူမျိုးတွေဖြစ်တယ်။ ကချင်မှာဆို ကချင်လူမျိုးတွေဖြစ်တယ်။ ကိုယ့်လူမျိုးတွေ ကိုသတ်တဲ့ အဖွဲ့အစည်း မဟုတ်ပါဘူး” ဟု သြဂုတ် ၃၁ရက် ကျိုင်းတုံ တွေ့ဆုံဆွေးနွေးအပြီး မီဒီယာများ မေးမြန်းချက်ကို ပြန်လည်ဖြေကြားပေးခဲ့သည်။
တိုက်ခိုက်နေကြသည့် နှစ်ဘက်တပ်များမှ အပြစ်မဲ့သော အရပ်သားများ ထိခိုက်နစ်နာဆုံးရှုံးမှု များကို တာဝန်ယူမှု၊ တာဝန်ခံမှု ရှိစေရန် သျှမ်းမြောက် လူသားချင်းစာနာ ထောက်ထားမှု ပူးပေါင်း အဖွဲ့ မှ လည်း ပြောဆိုထားသည်။
လက်ရှိ သျှမ်းပြည်နယ် မြောက်ပိုင်း ကွတ်ခိုင်မြို့နယ်တွင် လက်နက်ကြီးကြောင့် အရပ်သားများ သေဆုံးမှု၊ ထိခိုက်ဒဏ်ရာ ရရှိမှုသည် ပိုင်ရှင်မဲ့ လက်နက်ကြီးများလား ဟုလည်း ဒေသခံများက မေးခွန်းထုတ် ပြောဆိုလိုက်သည်။
Leave a Comments