သီပေါမြို့တွင် အမျိုးသား တဦး သေနတ်ပစ်ခံရ

0

သျှမ်းပြည်နယ် မြောက်ပိုင်း သီပေါမြို့ပန်းတိမ်တောင်ရပ်ကွက် ဘိုးတော်ကျောင်း အနီးတွင် အသက် ၅၀ ဝန်းကျင် အမျိုးသား တဦး သေနတ် ပစ်ခံရကြောင်း သတင်းရရှိသည်။

Photo Shar Htet Paing- သေနတ်ပစ်ခံရသည့် တာလုံဒေသခံ ဦးစိုင်းဇောတိက အား နယ်စည်းမခြား ပရဟိတအသင်း သီပေါ မှ ဆေးရုံသို့ သယ်ပို့ပေးစဉ်

စက်တင်ဘာလ ၁ ရက် ည ၈ နာရီ ဝန်းကျင် က သေနတ်ပစ်ခံရသူမှာ သီပေါမြို့ တာလုံကျေးရွာ တွင် နေထိုင်သည့် အသက် ၅၄ နှစ်အရွယ် ရှိ ဦးဇောတိက ဖြစ်ကြောင်း၊ ဇယ်ခုံတွင် ဇယ်တောက်နေစဉ် အမည်မသိ အမျိုးသားတဦးက သေနတ်ဖြင့်လာပစ်သွားကြောင်း သီပေါမြို့ ဒေသခံ စိုင်းဝင်း က သျှမ်းသံတော်ဆင့် ကို ပြောသည်။

“ သူ( ဦးဇောတိက) က ပန်းတိမ်တောင်ရပ်ကွက် မှာ နေတဲ့ သူ့မိတ်ဆွေဆီကိုလာလည်တာ။ သူတို့ ဇယ်ခုံမှာဇယ်တောက်နေကြရင်း လူတယောက်က ၀င်လာပြီး သူ့နာမည်ခေါ်တယ်။ သူပြန်ထူးတော့ သူ့ကိုသေနတ်နဲပစ်သွားတယ်။ ပေါင်နဲ့ ခါး ထိတယ်” ဟု စိုင်းဝင်း ကဆိုသည်။

တာလုံရွာသည် လက်ရှိ အထက်ရဲရွာ ရေကာတာ တည်ဆောက်နေသည့် နေရာ တခုဖြစ်ပြီး ရွာသားများနှင့် စီမံကိန်းကြား ပြသနာဖြစ်နေသောနေရာဖြစ်သည်။

“ တာလုံ ကတော့ ရေကာတာ ဆောက်တဲ့နေရာပါ။ ဦးဇောတိက က စီမံကိန်းနဲ့ပတ်သက်တာလားဘာလား ဆိုတာတော့ အသေအချာမသိရပါဘူး။ ဘာအကြောင်းရှိကြလို့လည်းတော့မသိပါဘူးခင်ဗျ ” ဟု စိုင်းဝင်း က ထပ်လောင်းပြောသည်။

အဆိုပါ သေနတ်ပစ်ခတ်မှု ကို မည်သည့်အဖွဲ့ က ပစ်ခတ်သည်ကို မသိရှိကြောင်း၊ မည်သည့် ကိစ္စ ကြောင်း ပစ်ခတ်သည်ကိုလည်း အတိအကျ မသိရကြောင်း နယ်စည်းမခြား ပရဟိတ အသင်း(သီပေါ) က ပြောသည်။

“ ဒဏ်ရာကတော့ ပြင်းတယ်။ ည ၁၀နာရီ မှာတော့ သီပေါ ဆေးရုံ က နေ လားရှိုး ဆေးရုံ ကို ကျနော်တို့ အဖွဲ့ က ပို့ပေးတယ်” ဟု နယ်စည်းမခြား ပရဟိတအသင်း (သီပေါ) မှ ကိုမျိုး က သျှမ်းသံတော်ဆင့် သို့ ပြောသည်။

သီပေါမြို့နယ် အတွင်း မကြာခဏ အရပ်သား များ သေနတ်ပစ်ခံရပြီး တရားခံ မပေါ်ခဲ့ပေ။

သီပေါမြို့နယ် တွင် တိုင်းရင်းသား လက်နက်ကိုင် အဖွဲ့များ၊ ပြည်သူ့စစ်များ နှင့် မြန်မာ့တပ်မတော်တို့ လှုပ်ရှား နေသည့် ဒေသ ဖြစ်သည်။

Leave a Comments

SHARE