လားရှိုးမြို့ရှိ ဘုန်းကြီးကျောင်းများကစစ်ရှောင်များ စိုးရိမ်ထိတ်လန့်မှုကြားက နေရပ်ပြန်ရ

0

 

တိုက်ပွဲကြောင့် သျှမ်းပြည်နယ် မြောက်ပိုင်း လားရှိုးမြို့ သီရိမင်္ဂလာ မန်ဆူ ဘုန်ကြီးကျောင်းသို့ရောက်ရှိခိုလှုံသည့် စစ်ဘေးရှောင်များမှာ စိုးရိမ် ထိတ်လန့်မှု ကြား နေရပ်ပြန်သွားကြရကြောင်း သိရသည်။

Credit to Sai Tiger Tai- ဘုန်းကြီးကျောင်းရှိ စစ်ဘေးရှောင်ကလေးများ

လက်ရှိ လားရှိုးမြို့နယ်အတွင်း တိုက်ပွဲများငြိမ်သက်နေပြီဖြစ်သဖြင့် သီရိမင်္ဂလာ မန်ဆူ ဘုန်းကြီးကျောင်းသို့ ရောက်ရှိခိုလှုံနေကြသော စစ်ဘေးရှောင် များ နေရပ်သို့ စိုးရိမ်စိတ်ဖြင့် ပြန်သွားကြပြီဖြစ်ကြောင်း စစ်ဘေးရှောင်များကူညီပေးနေသည့် သျှမ်းလူငယ်များ အဖွဲ့ မှ စိုင်းဟန် က သျှမ်းသံတော်ဆင့် သို့ ပြောသည်။

“ တကယ်တော့ လားရှိုးမြို့ နယ် အနီးတဝိုက်မှာတိုက်ပွဲတွေမရှိပါဘူး။ တပ်မတော်ကို ကြောက် လို့့သူတို့ထွက်ပြေးကြတာပါ။ ခုလည်း စစ်ကြောင်းတွေက ရွာတွေနားရှိနေသေးတယ်။ ကြောက်လည်း ပြန်ရမှာပဲလေ လယ်ယာဝင်ရတော့မှာကိုး မတတ်နိုင်ဘူးလေ။ နောက် တပ်က လက်နက်ကြီး ပစ်ချင်တဲ့ နေရာပစ်လေ့ရှိတယ်ဆိုတော့ လုံးအေး လို့ထိမှာလည်း ကြောက်ကြတယ်
” ဟု စိုင်းဟန် က ဆိုသည်။

နယ်မြေရှင်းလင်းရေးဟုဆိုကာ လားရှိုးမြို့နယ်ရှိ ကျေးရွာများတွင် တပ်မတော် များရှိသေးကြောင်း၊ ၄င်းတို့ ရွာအတွင်းဝင်ရောက်မည်ကို ဒေသခံများ စိုးရိမ်နေကြကြောင်း စိုင်းဟန်က ဆိုသည်။

လားရှိုးမြို့အရှေ့မြောက်ဘက်ရှိ ကုန်းဆာကျေးရွာ နှင့် မတ်ချီနူ ဒေသခံများလည်း ခိုလှုံသည့်ဘုန်းကြီးကျောင်းမှ ရပ်ရွာနေအိမ်သို့ ယမန်နေ့က ပြန်သွားကြပြီဖြစ်ကြောင်းသိရသည်။

ကုန်ဆာကျေးရွာ လက်နက်ကြီး ထိမှန်ပြီး သေဆုံးသွားသည့် လုံအေး အမျိုးသမီး နန်းကိန် က “ ကျမတို့ ကြောက်လည်း ပြန်ရမှာပဲ။ ဆုတောင်းပြီး နေရမှာပဲ။ အိမ်ပြန်ရောက်ရင် ကျမ အမျိုးသားအတွက် အလှူလည်း လုပ်ပေးရအုံးမယ်” ဟု သျှမ်းသံတော်ဆင့် သို့ ပြောသည်။

သျှမ်းပြည်နယ် မြောက်ပိုင်း တွင် တိုက်ပွဲများ ရပ်တန့်ခြင်းမရှိသေးသဖြင့်စစ်ရှောင်များ မိမိနေရပ်သို့ ပြန်သော်လည်း စိုးရိမ် ထိတ်လန့်မှု မျိုးစုံဖြင့် ပြန်ရကြောင်း၊ တိုက်ပွဲများ ချုပ်ငြိမ်းပြီး လယ်ယာ စိုက်ပျိုးရေး ပြန်လည် ပြုလုပ်လိုကြောင်းလည်း စစ်ရှောင်များက ပြောသည်။

လက်ရှိ သျှမ်းပြည်နယ်မြောက်ပိုင်း ကွတ်ခိုင် မူဆယ် ပြည်ထောင်စု လမ်းမပေါ်တွင် တိုက်ပွဲများပြင်းထန်နေသေးရာ ကွတ်ခိုင်မြို့နယ်တွင်လည်း စစ်ဘေးရှောင်များ ရှိနေသေးသည်ဟုသိရသည်။

ဢုပ်ႇဢူဝ်း ၽူႈတွႆႇႁွၵ်ႈ

SHARE