သျှမ်းပြည်တောင်ပိုင်း လွိုင်လင်ခရိုင် လဲချားမြို့နယ်အတွင်း အခြေစိုက်နေထိုင်သည့် ပြည်သူ့စစ်တပ်စခန်း တခု အား ခိုလမ်အခြေစိုက်ရလခ တိုင်းမှူးကိုယ်တိုင် ဦးစီးသည့် စစ်အင်အား ရာဂဏန်းက ရှောင်တခင် သွားရောက်စစ်ဆေးကာ ခေါင်းဆောင်ဖြစ်သူအား ထိန်းသိမ်း စစ်ဆေးနေကြောင်းသိရှိရသည်။
၂၀၁၉ ခု သြဂုတ်လ ၂၃ ရက်နေ့က လဲချားမြို့ အရှေ့တောင်ဘက် ခိုလမ် – လဲချား မြို့နယ်ကြား နားပွဲကျေးရွာအုပ်စု နမ့်ဟူး ဖရားထမ့် (ရွာ) ဌာနေပြည်သူ့စစ်တပ် အား အရှေ့အလယ်ပိုင်းတိုင်းစစ်ဌာနချုပ် ရလခ တိုင်းမှူး ဗိုလ်ချုပ်မြင့်လှိုင်ကိုယ်တိုင်ဦးစီးသည့် စစ်အင်အား ၁၀၀ ခန့်က တပ်စခန်းအတွင်း စစ်ဆေး မှု ပြုလုပ်နေကြောင်း၊ ခေါင်းဆောင်ဖြစ်သူ စိုင်းတ နှင့် စစ်ဦးစီး စိုင်းဒေါန အား ခေါ်ယူစစ်ဆေးနေ ကြောင်း အမည်မဖေါ်လိုသည့် တပ်တွင်းအရာရှိတဦးက သျှမ်းသံတော်ဆင့်သို့ ပြောသည်။
“တိုင်းမှူးကိုယ်တိုင်လာတော့ အကောင်းဘဲလာတယ်ထင်တယ်။ မနေ့ကတည်းက ရောက်တာလေ။ အခုက စစ်သားအများကြီးနဲ့လာတော့ သိပ်မသင်္ကာချင်ဘူးဖြစ်နေတယ်။ တပ်မှူး ဗိုလ်ကြီးစိုင်း ညွှန့်တော့ ရှောင်ထားတယ်။ အဘ စိုင်းတ နဲ့ ခူးဒေါန တော့ တိုင်းမှူးကခေါ်ထားတယ် ”- ဟု သျှမ်းသံတော်ဆင့်သို့ပြောသည်။
ရလခ တိုင်းမှူးကိုယ်တိုင် ကွပ််ကဲ ပြီး နမ့်ဟူးဖရားထမ့် ဌာနေပြည်သူ့စစ်တပ် အား ရှောင်တခင် ၀င်ရောက်စစ်ဆေးမှု သည် သြဂုတ်လ ၁၆ ရက် လွိုင်လင်မြို့အထွက် တောင်ကြီးအသွားလမ်းတွင် ကျပ်သိန်းပေါင်း တသိန်း ကျော် တန်ဖိုး ရှိမူးယစ်ဆေးဝါး ဖမ်းဆီးရမှု နှင့် ပတ်သက်ဆက်နွယ်သည်ဟု သီးခြားအတည်ပြုချက်ရသည့် သတင်းအရသိရသည်။
တပ်မဟာ ရ၅၈ သည် ၂၀၀၅ ခုနှစ်က ဗိုလ်မှူးကြီး မိန်းစင့် ဦးစီးပြီး သျှမ်းပြည်တပ်မတော် RCSS/SSA မှ ခွဲထွက်ကာ စစ်အစိုးရထံလက်နက်ချပြီး ၀မ်ပန်ဌာနေ ပြည်သူ့စစ်အဖြစ်ပြောင်းပြီး နမ့်စန်မြို့နယ် နားပွဲကျေးရွာအုပ်စု နမ့်ဟူးရွာတွင်လည်းကောင်း၊ လဲချားမြို့နယ် ၀မ့်ဟိုင့်အုပ်စု ၀မ့်ပန်ရွာတွင်လည်းကောင်း အခြေစိုက်နေထိုင်လာခဲ့သည်။
၂၀၀၉ မေ ၂၄ ရက် က တပ်မတော် စစ်ယာဉ်တန်းနဲ့ အတူ ခရီးထွက်စဉ် ခြုံခိုတိုက်ခိုက်ခံရပြီး တပ်မတော်အရာရှိစစ်သည်များနှင့် အတူ ဗိုလ်မှူးကြီးမိန်းစင့် ကွယ်လွန်သွားခဲ့သည်။ ၂၀၁၂ ခု နှစ်က လည်း ၄င်းတို့ တပ်စခန်းအား RCSS/SSA မှ ၀င်ရောက်သိမ်းပိုက်စဉ် မူးယစ်ဆေးဝါး နှင့် ချက်လုပ်ရေးဆိုင်ရာပစ္စည်းများအများအပြား သိမ်းဆည်းရမိခဲ့ပါသေးသည်။
