သျှမ်းပြည်နယ်မြောက်ပိုင်းတွင် တကျော့ပြန် တိုက်ပွဲများပြန်လည် ပြင်းထန်လာသဖြင့် စစ်ဘေးရှောင် ၅၀၀၀ ကျော် တိုးများလာကြောင်း သိရသည်။
စစ်ဘေးရှောင် ၅၀၀၀ကျော်သည် သျှမ်းပြည်နယ် မြောက်ပိုင်း လားရှိုးမြို့နယ်၊ ကွတ်ခိုင်မြို့နယ်၊ သိန္နီမြို့နယ်နှင့် နမ့်ခမ်းအတွင်းရှိ ဘုန်းကြီးကျောင်းများ၊ ဆွေမျိုးအိမ်များတွင် ခိုလှုံနေထိုင်နေကြကြောင်း သျှမ်းပြည်နယ် မြောက်ပိုင်း လူမှု အဖွဲ့အစည်းများ ကောက်ခံထားသည့် စာရင်းများအရ သိရသည်။
စစ်ဘေးရှောင်များအတွက် အဓိက လိုအပ်ချက်မှာ နေရာထိုင်ခင်း၊ အဝတ်အစား ၊ သောက်သုံးရေ နှင့် အခြေခံ စားသောက်ကုန်များ ဖြစ်ကြောင်း လားရှိုးမြို့နယ် အမျိုးသားလွှတ်တော် ကိုယ်စားလှယ် စိုင်းဝမ်းလျန်းခမ်း က သျှမ်းသံတော်ဆင့် ပြောသည်။
“ စစ်ရှောင် အတွက် လိုတာကတော့ အကုန်ပါပဲ။ တချို့ဆိုရင် ထော်လဂျီပေါ် ကားပေါ်ပဲမှာပဲ အိပ်ရတယ်။ ဘာမှ မပါလာကြဘူး။ နောက် ကွတ်ခိုင်ဘက်ဆိုရင် တိုက်ပွဲ က ဖြစ်နေတုန်းဆိုတော့ သွားလှူဖို့က အရမ်းခက်နေ သေးတယ်” ဟု စိုင်းဝမ်းလျန်းခမ်း က ဆိုသည်။
တိုက်ပွဲကြောင့် မြို့ထဲသို့ထွက်ပြေးတိမ်းရှောင်လာသည့် စစ်ရှောင်များအတွက် လိုအပ်ချက် သိပ်မရှိသော်လည်း လားရှိုး နှင့်ဝေးသည့်ဒေသ တိုက်ပွဲ ဖြစ်နေသည့် ကြားတွင် နေထိုင်သည့် စစ်ရှောင်များအတွက် လိုအပ်ချက် များရှိနေကြောင်း စိုင်းဝမ်းလျန်းခမ်း က ပြောသည်။
တိုက်ပွဲကြောင့် ကလေးများလည်း စစ်ရှောင်နေရသဖြင့် ကျေးရွာတွင် ကျောင်းများပိတ်ထားရကြောင်း၊ စစ်ပွဲကြောင့် ပညာရေး၊ ကျန်းမာရေး ၊ စိုက်ပျိုးရေး လုပ်ငန်းများလစ်ဟင်းရသဖြင့် ပြည်သူလူထု စိုးရိမ်ပူပန်မှု များရင်ဆိုင်နေရကြောင်း စိုင်းဝမ်းလျန်းခမ်းက ဆိုသည်။
“ လတ်တလောကတော့ စစ်ရှောင်တွေ အတွက် နေစရာရှိပေမယ့် သူတို့ အတွက် အစားအသောက်၊ရေ၊နဲ့ အိပ်ယာတွေ လိုအပ်ပါတယ်” ဟု တအာင်း အမျိုးသမီး အဖွဲ့မှ လွေးပိုးညူဝ်း က သျှမ်းသံတော်ဆင့် သို့ပြောသည်။
လက်ရှိတွင် တိုက်ပွဲအတွင်း ပိတ်မိနေလျက်ရှိသော ကျေးလက်ပြည်သူများအား အမြန်ဆုံးကယ်ထုတ်နိုင်ရန် လိုအပ်ကြောင်း လည်း လွေးပိုးညူဝ်းက ပြောသည်။
သြဂုတ် ၁၅ရက်နေ့ မှစတင်ကာ မြောက်ပိုင်းမဟာမိတ်(၃)ဖွဲ့ ဖြစ်သည့် တအာင်း(ပလောင်) အမျိုးသားလွတ်မြောက်ရေး တပ်မတော်၊ ကိုးကန့် ( MNDAA) တပ်၊ ရက္ခိုင်တပ် (AA) တို့မှ ပြင်ဦးလွင်မြို့တပ်မတော်နည်းပညာ တက္ကသိုလ် (DSTA) အပါအဝင် နေရာ ၅နေရာကို စတင်တိုက်ခိုက်ခဲ့သည်။
ထို့နောက် မြန်မာ့တပ်မတော်နှင့် မြောက်ပိုင်းမဟာမိတ် (၃)ဖွဲ့တို့သည် ကျောက်မဲ၊ လားရှိုး၊ သိန္နီ၊ကွတ်ခိုင်၊မူဆယ်နှင့် ကွမ်းလုံ စသည့် လမ်းတလျောက်တွင် အပစ်ရပ်ကာလ မကုန်ဆုံးမီ ယနေ့ထိ တိုက်ပွဲ ပြင်းထန်စွာဖြစ်ပွားနေသဖြင့် ငြိမ်းချမ်းရေး လုပ်ငန်းစဉ် ထိခိုက်မည် ကို တအာင်းအရပ်ဖက် အဖွဲ့အစည်း များမှ စိုးရိမ်နေကြောင်း ထုတ်ပြန်ချက် တွင် ရေးသားထားသည်။
ထို့နည်းတူ လက်ရှိဖြစ်ပွားနေသည့် စစ်ပွဲများ အမြန်ဆုံး ရပ်တန့်ပြီး၊ စစ်ဘေးရှောင်များ နေရပ်ပြန်နိုင်ရေး နှင့် စစ်ပွဲ ပိတ်မိပြည်သူများ အတွက် ၂ဖက်တပ်များ အမြန်ဆုံး ညှိနှိုင်း ဆောင်ရွက်ပေးရန် လည်း သျှမ်း ပြည်နယ်မြောက်ပိုင်း အရပ်ဖက်အဖွဲ့အစည်းများ နှင့် တက်ကြွလှုပ်ရှားသူများက သြဂုတ် ၂၁ရက်နေ့တွင် ထုတ်ပြန်ထားသည်။
တိုက်ပွဲကြောင့် စစ်ရှောင် အများစု သည် အမျိုးသမီး၊ ကလေး ငယ်နှင့် သက်ကြီး ရွယ်အိုများသာဖြစ်သည်။
“ စစ်ရှောင်တွေရဲ့ အဓိက လိုအပ်ချက်က အစားအသောက်ပဲ။နောက် အခု တချို့ စစ်ရှောင်တွေမှာ မွေးဖွားခါနီး ကိုယ်ဝန်သည်တွေရှိတယ်။နောက် မွေးဖွားစ မိခင်တွေရှိတော့ သူတို့ အတွက် ခက်ခဲတယ်” ဟု သျှမ်းလူမှုအဖွဲ့အစည်း မှ နန်းမွေနွံလျန်း က သျှမ်းသံတော်ဆင့် သို့ပြောသည်။
တိုက်ပွဲဖြစ်ပါက ပြည်သူလူထု သာ အများဆုံး ထိခိုက်နစ်နာကြောင်း၊ ပြည်သူလူထု ထိခိုက်နစ်နာမှု နည်းအောင် ၂ဖက် လက်နက်ကိုင် များအနေဖြင့် ဆင်ခြေ ပေးစေရန် နန်းမွေနွံလျန်းက ပြောဆိုလိုက်သည်။
ဆက်လက်ပြီး အစိုးရနှင့် မြန်မာ့တပ်မတော် အနေဖြင့် တိုင်းရင်းသား များလိုချင်သည့် အချက်များကို ညှိနှိုင်းပြီး ငြိမ်းချမ်းရေး အတွက် ကြိုးစားစေချင်ကြောင်းလည်း သျှမ်းပြည်နယ်မြောက်ပိုင်း လူမှု အဖွဲ့ အစည်းများ က ပြောဆိုလိုက်သည်။
တိုက်ပွဲဖြစ်ပွားနေခြင်း ပြည်သူလူထု၏ အသက်အိုးအိမ် ကို ဦးတည် တိုက်ခိုက်ခြင်း တို့ မှ ရပ်တန့်ပြီး နိုင်ငံရေး ပြသာနာ ကို စစ်ရေးဖြင့် ဖြေရှင်းခြင်းမပြုဘဲ တွေ့ဆုံဆွေးနွေး အဖြေရှာသည် လမ်းကြောင်း ကို ယုံကြည် အကောင်အထည်ဖော်ကြရန် လည်း တောင်းဆိုလိုက်သည်။
