သျှမ်းပြည်နယ် မြောက်ပိုင်း သီပေါမြို့နယ် နမ္မတူမြစ်ပေါ် ရေကာတာတည်ဆောက်ခြင်းမပြုစေရေး၊ နမ္မတူမြစ်ဖျက် ဆီးမခံရရေးအတွက်ရည်ရွယ်ကာ သီပေါမြို့နယ် ဒေသခံ ရ၀၀ ကျော်က ရပ်ရွာဇာတာဆက် (ကံထပ်ကံမြှင့်) ခြင်း အလှူပြုဆုတောင်းပွဲ တရပ်ပြုလုပ်ခဲ့ကြောင်း သျှမ်းပြည်နယ် မြစ်ချောင်းများ ကွန်ရက် ထုတ်ပြန်ချက် အရ သိရသည်။
ဆုတောင်းပွဲကို သြဂုတ်လ ၂၁ ရက် ယနေ့မနက် ရနာရီ အချိန်က သီပေါမြို့နယ် နားမခေါ်ကျေးရွာ၊ ဟိုနား၊ ဝမ်ဟုန်၊တုံကြိုက်၊ နိုင်းလုံ၊ နားစလောင်း၊နမ့်လန်းကျေးရွာ ဒေသခံ ရ၀၀ ကျော် က တာလုံကျေးရွာ ရှိ နမ္မတူမြစ်ကမ်းနံဘေးတွင် ရပ်ရွာဇာတာဆက် (ကံထပ်အလှူ) ဆုတောင်းပွဲ ပြုလုပ်ခဲ့ကြသည်။
နမ္မတူမြစ်ပေါ် တည်ဆောက်မည့်ရေကာတာ ကြောင့် တာလုံကျေးရွာ ရေလွှမ်းမိုးနိုင်သဖြင့် သီပေါမြိ့နယ် ဒေသခံ ရ၀၀ ကျော် သည် ဆန့်ကျင်ကန့်ကွက်ခဲ့ကြပြီး ဒေသခံများ ဘေးကင်းစေရေးအတွက် အလှူပြု ရခြင်းဖြစ်သည် ဟု သျှမ်းပြည်နယ် မြစ်ချောင်းများ ကွန်ရက် က ၄င်းတို့၏ ထုတ်ပြန်ချက်တွင် ရေးသားထားသည်။
ထို့ပြင် ရေကာတာ အလိုမရှိကြောင်း ဆိုင်းဘုတ် များကို ရပ်ရွာအတွင်း တပ်ဆင်ခဲ့ကြောင်း သိရသည်။
အထက်ရဲရွာ ရေကာတာ တည်ဆောက်ပါက တာလုံ ကျေးရွာ ရေလွှမ်းမိုးနိုင်ပြီး ယဉ်ကျေးမှု အမွေအနှစ် နှင့် အသက်မွေးဝမ်းကြောင်းများ ရေအောက် နစ်မြုပ်ပျောက်ကွယ်သွားနိုင်သည် ဟု ထုတ်ပြန်ချက်တွင်ရေးသားထားသည်။
တာလုံကျေးရွာနေ နန်းလောဝ်ခမ်းက“ကျမတို့ရပ်ရွာမှာ ကျမတို့ဘိုးဘွားစဉ်ဆက် ကတည်းက ရှောက်ချိုသီးတွေစိုက်ပျိုးခြင်းဖြင့်အသက်မွေးဝမ်းကျောင်းပြုတယ်။ ရွာသားတွေကို အကျိုးပြု ခဲ့တဲ့ ရှောက်ချိုသီးခြံတွေကို ရွာသားတွေက မြတ်နိုးတယ်။ ဒီရေကာတာ ကြောင့် ကျမတို့ရပ်ရွာကိုရေမလွှမ်းစေချင်ဘူး။ ” ဟု သျှမ်းသံတော်ဆင့်အားပြောသည်။
အထက်ရဲရွာ ရေကာတာ တည်ဆောက်နေသည့်နေရာသည် လက်ရှိ တွင်စစ်ရေးပဋိပက္ခဖြစ်ပွားသည့် နေရာဖြစ်သည်။ ရေကာတာ တည်ဆောက်မှုကို တရုတ်ကုမ္ပဏီ၊ ဆွစ်ဇာလန် နှင့် ဂျပန် ကုမ္ပဏီ များမှ ရင်းနှီးမြှပ်နှံ ထားပြီး ရေကာတာ ဆက်လက်လုပ်ဆောင်နေကြောင်း သိရသည်။
သျှမ်းပြည်နယ်မြောက်ပိုင်း နောင်ချို၊ ကျောက်မဲ၊ လားရှိုး၊ သိန္နီ၊ ကွတ်ခိုင်မြို့နယ်များတွင် သြဂုတ် ၁၅ ရက်နေ့မှ စတင်ကာ တိုင်းရင်းသားလက်နက်ကိုင်များနှင့် တပ်မတော်တို့ တိုက်ပွဲများဖြစ်ကြပြီး ပြည်သူလူထု(၃၀၀၀) ကျော် ထွက်ပြေးတိမ်းရှောင်ခဲ့ရကြောင်း အဆိုပါ ထုတ်ပြန်ချက်တွင် ရေးသားထားသည်။
နမ္မတူမြစ်ပေါ်တွင် အကြီးစားရေကာတာစီမံကိန်း (၃) ခုရှိပြီး အလယ်ရဲရွာ စီမံကိန်း ဖြစ်သည့် နောင်ချို မြို့နယ်အတွင်း စစ်ပွဲဖြစ်ပွားနေသည့် နေရာတွင် နော်ဝေးနိုင်ငံပိုင် SN Power ကုမ္ပဏီ ရင်းနှီးမြုပ်နှံမှုဖြင့် (၇၃၅) မီကာဝပ် ထွက်ရှိမည့် ရေအားလျှပ်စစ်စက်ရုံတည်ဆောက်မည်ဟု သိရသည်။
အဆိုပါ ကိစ္စ နှင့် ပတ်သက်ပြီး ရပ်ရွာဇာတာဆက် အလှူပြုအခမ်းအနားတွင် ပူပေါင်းပါ၀င်ခဲ့သူ စိုင်းထမ်းအိုက်မှ “တိုင်းရင်းသားလက်နက်ကိုင် များနှင့်တပ်မတော်တို့ တိုက်ပွဲရှိနေသ၍တော့ နမ္မတူမြစ်ပေါ်မှာ လုံးဝရေကာတာတွေ မဆောက်လုပ်သင့်ဘူး” ဟု ပြောဆိုလိုက်သည်။
တာ့လုံရွာ ၂ ရွာတွင် ဒေသခံလူထု ၁၀၀၀ နီးပါးနေထိုင်ပြီးရှောက်ချိုသီးစိုက်ပျိုးခြင်းဖြင့် အသက်မွေးဝမ်းကျောင်းပြုကြသည်။ ပျှမ်းမျှ လူတဦးလျှင် ရှောက်ချိုသီးခြံ ၂ ဧက ရှိနေပြီး ရှောက်ချိုသီးစိုက်ပျိုးမှုမှရသည့်ဝင်ငွေမှာ တနှစ်လျှင် ကျပ်သိန်း ၂၀ ခန့်အထိရှိကြောင်းတာလုံဒေသခံကပြောသည်။
