သျှမ်းပြည်နယ် တောင်ပိုင်း မိုင်းပန်မြို့နယ်အတွင်း တပ်မတော်မှ လုံခြုံရေးတင်းကျပ်မည် ၊ ကင်းလှည့်မည်ဟု ပြောဆိုသတိပေးလာသဖြင့် လယ်ယာသွားမည့် မိုင်းပန်ဒေသခံများ ဘေးကင်းစေရေး သတိဖြင့်သွားလာကြရန် ၊ တားဆီးခေါ်ယူမေးမြန်းခံရပါက ရပ်တန့်ဖြေကြားပေးပါရန် ကျားဖြူလွှတ်တော်ကိုယ်စားလှယ် က ပြောဆို လိုက်သည်။
သြဂုတ် ၁၆ ရက်နေ့က မိုင်းပန်မြို့ အထွေထွေ အုပ်ချုပ် ရေးမှူး မှ တဆင့် မိုင်းပန်မြို့နယ် အတွင်းရှိ ကျေးရွာ အုပ်ချုပ်ရေးမှူးများကို ဆင့်ခေါ်ကာ အစည်းအဝေး ပြုလုပ်ခဲ့ကြောင်း ၊ လယ်ယာခြံသို့ သွားအိပ်စောင့် အလုပ်လုပ်မည့်ရွာသားများ စစ်တပ်ကင်းလှည့်အဖွဲ့နှင့်တွေ့ပါက ထွက်မပြေးကြရန် သတိပေးပြောဆိုသဖြင့် သျှမ်းစစ်သားနှင့်ထင်ယောင်ထင်မှားဖြစ်စေမည့် ပြောက်ကျားစစ်ဝတ်စုံ နှင့်ပတ်သက်ပြီး ပြည်နယ်လွှတ်တော်ကိုယ်စားလှယ် စိုင်းနောင့်က အစည်းအဝေးတွင်ထည့်သွင်းဆွေးနွေး လိုက်ခြင်းဖြစ်ကြောင်း သိရသည်။
“တပ်မတော်က လုံခြုံရေးအတွက်စစ်ဆေးတာလုပ်မယ်။ စစ်တပ်က စစ်ဆေးရင် ဒေသခံတွေကို ထွက်မပြေးဖို့ အစည်းအဝေးမှာပြောပါတယ်။ အပြင်မှာထွက်နေတဲ့ ကောလာဟာလ သတင်းအတိုင်း ပြောက်ကျားစစ်ဝတ်စုံ မဝတ်ရဘူးလို့တော့ အစည်းအဝေး မှာ မပြောကြရပါဘူး။ လုံခြုံရေးနဲ့ပတ်သက်ပြီး ဆွေးနွေးလာလို့ကျနော်က သတိရမိပြီး ထည့်သွင်းဆွေးနွေးတာပါ။ မိုင်းပန်ဒေသခံတွေက ပြောက်ကျားအကျီင်္ ကိုကြိုက်ကြတယ်။ ဘာဖြစ်လို့လဲဆိုတော့ အဲ့ဒီပြောက်ကျားအကျီင်္က တာရှည်ခံတယ်။ ချေးပေချေးစွန်းလည်းခံတော့ လူကြီးလူငယ်မရွေး အလုပ်သွားရင်ဝတ်ကြတယ် ။ အဲကြောင့် ပြောက်ကျားဝတ်စုံဝတ်တိုင်း လက်နက်ကိုင် အဖွဲ့မဟုတ်ဘူး။ မသင်္ကာရင် ရပ်ရွာသူကြီးကို အရင်မေးမြန်းဖို့ အာဏာပိုင်တွေကိုသတိပေးတင်ပြတာပါ။ ” ဟု စိုင်းနောင့် က ဆိုသည်။
ထို့အပြင် လုံခြုံရေးကင်းလှည့် တပ်မတော် သားများအနေဖြင့် ဒေသခံ အရပ်သားများကို စစ်ဆေးရာ တွင်လည်း ကိုယ်ထိ လက်ရောက် ရိုက်နှက်စစ်ဆေးခြင်းမပြုရန် ဆွေးနွေးပွဲတွင် ထည့်သွင်း မေတ္တာရပ်ခံထားကြောင်း စိုင်းနောင့်ကပြောသည်။
“အစည်းအဝေးလာတက်တဲ့ရပ်ရွာသူကြီးတွေကနေ ဒေသခံရွာသားတွေကို ပြန်သွားရှင်းပြဖို့ပေါ့နော်။ လမ်းမှာ ကင်းလှည့်အဖွဲ့နဲ့တွေ့ရင် တားဆီးစစ်ဆေးရင် ကောင်းကောင်းရပ်ပေးဖို့၊ ကောင်းကောင်းဖြေပေးဖို့ပေါ့နော်။ တကယ်လို့ ထွက်ပြေးရင် အန္တရာယ်ဖြစ်မှာစိုးလို့ ပါ။ နောက်ပြီး လယ်တွေယာတွေမှာ ညအိပ်ညနေသွားစောင့် မယ်ဆိုရင်လည်း ရပ်ရွာလူကြီးဆီမှာ သတင်းပို့ပြီးတော့မှဘဲ သွားကြပါ စတာတွေသတိပေးပါတယ်။ “ – ဟု ၄င်းက သျှမ်းသံတော်ဆင့်အားပြောသည်။
မိုင်းပန် တွင် အပစ်ခတ်ရပ်စဲရေး သဘောတူစာချုပ် ( NCA) လက်မှတ်ရေးထိုးထားသည့် သျှမ်းပြည်နယ် ပြန်လည် ထူထောင်ရေး ကောင်စီ၊ သျှမ်းပြည် တပ်မတော် RCSS/SSA သာ လှုပ်ရှားသွားလာပြီး လက်ရှိတွင်လည်း နိုင်ငံရေး စစ်ရေးအခြေအနေတည်ငြိမ်နေသည့်နေရာလည်း ဖြစ်သည်။
“ မိုင်းပန်မှာအခြေအနေက အဲလောက်မဆိုးပါဘူး ။လုံခြုံရေးတင်းကျပ်မယ် စစ်မယ်ဆေးမယ် ဆိုတော့ လူထုကိုနေရခက်အောင် အလုပ်သွားဖို့ ၀မ်းစာရှာစားဖို့ခက်အောင်လုပ်သလိုဖြစ်နေတယ်။ အဲ့ဘက်မှာ တိုက်ပွဲလည်း မရှိတော့ဘူး။ ပြည်သူတွေကို လုံခြံုရေးလို့ ပြောပြီး ကျနော်တို့အဖွဲ့ပါနေရခက်အောင် လုပ်နေတာပဲ” ဟု RCSS/SSA ၏ တောင်ကြီး အခြေစိုက် ဆက်ဆံရေးရုံး တာဝန်ခံ ဒုတိယ ဗိုလ်မှူးကြီး စိုင်းဦး က ပြောသည်။
လက်ရှိ မိုင်းပန်မြို့နယ်တွင် တပ်မတော် နှင် ရဲ တပ်ဖွဲ့တို့ပူးပေါင်းပြီး လုံခြံုရေး ယူနေကြောင်း မြို့ အဝင်၊ အထွက်ကားများကို စစ်ဆေးနေကြောင်း မိုင်းပန်မြို့မှ ရပ်မိရပ်ဖတဦးက ပြောသည်။
မိုင်းပန်မြို့သည် သျှမ်းပြည်တောင်ပိုင်း လင်းခေးခရိုင်အတွင်းပါရှိပြီး တောင်ကြီးမြို့အရှေ့ဘက် မိုင်ပေါင်း ၂၀၀ ခန့်အကွာတွင်တည်ရှိပါသည်။ သံလွင်မြစ်အနောက်ဘက်ခြမ်းတွင်ရှိပြီး RCSS/SSA ၊ အစိုးရတပ်မတော်နှင့် ရဲတပ်ဖွဲ့တို့ လှုပ်ရှားပါသည်။
