သျှမ်းပြည်နယ် မြောက်ပိုင်း ကွတ်ခိုင်မြို့ နမ့်ဖတ်ကာရွာအဝင်တွင်ဖြစ်ပွားခဲ့သည့် ညီနောင်မဟာမိတ် ၃ ဖွဲ့ နှင့် မြန်မာ့တပ်မတော်တိုက်ပွဲတွင် မြန်မာ့တပ်သား ၆ ဦး ကျဆုံးခဲ့သည်ဟု သတင်းရရှိသည်။

သြဂုတ် ၁၇ ရက်နေ့ ကဖြစ်ပွါးသော တိုက်ပွဲကြောင့်ကျဆုံးသွားသည့် မြန်မာ့တပ်မတော် စစ်သား (၆) ဦးကို မေတ္တာရှင် လူမှုကူညီရေး အသင်း (နမ့်ဖတ်ကာ) မှ သြဂုတ် ၁၇ ရက်နေ့က နမ့်ဖတ်ကာကျေးရွာ အဝင် တောင်ကုန်းတွင် သွားရောက်သယ်ဆောင်ခဲ့ပြီး နမ့်ဖတ်ကာ တိုက်နယ်ဆေးရုံသို့ ပို့ဆောင်ပေးခဲ့သည် ဟု မေတ္တာရှင် လူမှုကူညီရေး အသင်း မှ အဖွဲ့ဝင် အမျိုးသား တဦး က သျှမ်းသံတော်ဆင့် သို့ ပြောသည်။

“ အဲ့နေ့က တပ်ဘက်က ကျနော်တို့ကို အကူအညီတောင်းလာလို့ ကျနော်တို့ အဖွဲ့ သွားခေါ်တာပါ။ စစ်သား ၆ဦး အလောင်းပါ။ အဲ့နေ့က ကျနော်တို့ လူမှုကူညီရေး ကားတောင် ပစ်ခံရသေးတယ်” ဟု ၎င်း အဖွဲ့ဝင် အမျိုးသား က ဆိုသည်။

အဆိုပါ မြန်မာ့တပ်မတော် စစ်သား(၆) လောင်း ကို သြဂုတ် ၁၉ ရက်နေ့နေ့လည် ၁၂ နာရီတွင် မီးသဂြိုလ်ခဲ့ကြောင်းသိရသည်။

မေတ္တာရှင် လူမှု ကူညီရေး အသင်းသည် သြဂုတ် ၁၇ ရက်နေ့ နေ့လည် ၂ နာရီဝန်းကျင်တွင် စစ်သား ၆လောင်း ကို သွားရောက် သယ်ယူစဉ် လူမှုကူညီရေး ကား ပစ်ခံရကာ ယာဉ်မောင်း တဦး နှင့် ယာဉ်နောက်လိုက် ကျည်စ အနည်းငယ် ထိမှန်ခဲ့သည်။