သျှမ်းပြည်နယ် မြောက်ပိုင်း နောင်ချို မြို့နယ် မန်ပန်ရွာ နှင့် ပန်မိုလု ရွာကြား တအာင်း(ပလောင် ) အမျိုးသားလွတ်မြောက်ရေး တပ်မတော် TNLA နှင့် သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော် RCSS/SSA တို့ ရင်ဆိုင်တိုက်ပွဲဖြစ်ပွါးခဲ့ကြောင်းသိရသည်။

သြဂုတ်လ ၁၅ ရက် ညနေ ၅ နာရီအချိန်ခန့်က နောင်ချိုတိုက်ပွဲအပြီး တပ်ဆုတ်သွားသည့် TNLA နှင့် မဟာမိတ်တပ်ဖွဲ့များသည် RCSS/SSA ၏စစ်ကြောင်းနှင့် ပက်းပင်းတိုးမိပြီး ပစ်ခတ်မှုဖြစ်ပွါးခဲ့ကြောင်း ၊ TNLA မှ တပ်သားတဦး ကျဆုံးခဲ့ကြောင်း TNLA ပြောရေးဆိုခွင့်ရပုဂ္ဂိုလ် ဗိုလ်မှူး တားအိုက်ကျော် က သျှမ်းသံတော်ဆင့် သို့ ပြောသည်။

“ ကျနော်တို့ နောင်ချို တိုက်ပွဲ ကနေ အပြန် မှာ RCSS/SSA နဲ့ ထိခိုက်မှု တွေဖြစ်ပွားတယ်။ ကျနော်တို့ ဘက်က လူတယောက် ကျတယ်” ဟု ဗိုလ်မှူး တားအိုက်ကျော် က ဆိုသည်။

အဆိုပါ တိုက်ပွဲ နှင့် ပတ်သတ်ပြီး RCSS/SSA မှ ပြောရေး ဆိုခွင့်ရ ပုဂ္ဂိုလ် ဗိုလ်မှူး စိုင်းဆိုင်မိန်း က “ ကျနော်တို့အတည်မပြုနိုင်သေးဘူး။တိုက်ပွဲဖြစ်ကြောင်းတော့ ကြားထားတယ်။ ကျနော် စုံစမ်းနေတုန်းပါ။ ညနေပိုင်းမှာ ဖြစ်တာလို့ သိရပါတယ်” ဟု သျှမ်းသံတော်ဆင့် ကို ဖြေကြားခဲ့သည်။

RCSS/SSA သည် နောင်ချိုမြို့နယ်၊ သီပေါမြို့နယ်၊ ကျောက်မဲမြို့နယ် အတွင်း လှုပ်ရှားနေသည့် တပ်ဖွဲ့များ ရှိသည် ဟုလည်း ဗိုလ်မှူး စိုင်းဆိုင်မိန်း က ပြောသည်။

RCSS/SSA ဌာနချုပ်မှ အရာရှိတဦးကမူ – “ စစ်မြေပြင်ကနေသတင်းပေးပို့ချက်အရ နောင်ချိုတိုက်ပွဲမတိုင်ခင် တရက်က မြောက်ပိုင်းမဟာမိတ်တပ်ဖွဲ့က အင်အားစုဆောင်းနေတယ်။ ကျောက်မဲမြို့ ဟူးဆွန်အုပ်စုမှာရှိတဲ့ RCSS တပ်တွေကို တိုက်ခိုက်မယ် လို့သတင်းတွေထွက်လာတယ်။ RCSS ကသတိနဲ့နေနေတုန်း သူတို့က DSTA ကျောင်းနဲ့ နောင်ချိုတိုးဂိတ်တွေကိုသွားတိုက်လိုက်တာ။ သူတို့ပြန်ဆုတ်လာတော့ RCSS စစ်ကြောင်းနဲ့ပြန် လာတိုးမိလို့ ပစ်ခတ်မှုဖြစ်ပွါးရတာပါ။” – ဟု ပြောဆိုသည်။

သျှမ်းပြည်နယ်မြောက်ပိုင်း အတွင်း TNLA နှင့် RCSS/SSA သည် လွန်ခဲ့သည့် ၂၀၁၅ ခုနစ်မှ စတင်ကာ တိုက်ပွဲများ မကြာခဏ ဖြစ်ပွားခဲ့သည်။ယနေ့တိုင်တိုက်ပွဲဖြစ်ပွားမှုကာလ ကြာရှည်လာသော်လည်း ၄င်းတို့ကြား တွေ့ဆုံ ဆွေးနွေးမှု တကြိမ်တခါ မျှ မရှိသေးပေ။

သြဂုတ် ၁၅ ရက်နေ့ က ဖြစ်ပွားသည် တိုက်ပွဲနှင့် ပတ်သတ်ပြီး နိုင်ငံရေး လေ့လာသုံးသပ်သူ ဦးမောင်မောင်စိုး က – “ မနေ့က ဖြစ်ပွားတဲ့ တိုက်ပွဲက အကြီးဖြစ်ပုံ တော့မရပါဘူး။ RCSS/SSA နယ်မြေကို ဖြတ်လို့ တိုက်ပွဲ ဖြစ်တယ်လို့ ထင်ပါတယ်။ အသေးစိတ်ကို မသိရှိသေးလို့ ပြောရခက်ပါတယ် ” ဟု သျှမ်းသံတော်ဆင့် ကို ပြောသည်။

RCSS/SSA နှင့် TNLA ကြား တွေ့ဆုံ ညှိနှိုင်းမှု မရှိသည့် အတွက် တိုက်ပွဲအသေးစားများ ဆက်လက်ရှိ နေဦးမည်ဖြစ်ပြီး၊ လက်နက်ကိုင် ပဋိပက္ခ အဖွဲ့တွေဖြစ်ပွား ပါက တွေ့ဆုံ ညှိနှိုင်းမှုသည် အကောင်းဆုံး နည်းလမ်းဖြစ်သည် ဟုလည်း ဦးမောင်မောင်စိုး က သုံးသပ်ပြောဆိုလိုက်သည်။

သျှမ်းတပ် ၂ တပ်ဖြစ်သည့် RCSS/SSA နှင့် သျှမ်းမြောက် တပ်မတော် SSPP/SSA တို့ကြား တွေ့ဆုံ ညှိနှိုင်းမှု ကြောင့် တိုက်ပွဲများ ရပ်ဆိုင်သွားကြောင်းလည်း ဦးမောင်မောင်စိုး က ထပ်လောင်းပြောသည်။

သျှမ်းပြည်နယ် မြောက်ပိုင်း နောင်ချို မြို့နယ် နှင့် မန္တလေးတိုင်း ပြင်ဦးလွင် တပ်မတော် နည်းပညာ တက္ကသိုလ် (DSTA) အပါအဝင် နေရာ ၅ နေရာကို သြဂုတ် ၁၅ ရက် မနက် ၅ နာရီ ကျော်က TNLA နှင့် မဟာမိတ်တပ်များ ၀င်ရောက်ပစ်ခတ်သဖြင့် မြန်မာ့ တပ်မတော် နှင့် ပစ်ခတ်မှုများဖြစ်ပွါးခဲ့သည်။

ထိုစစ်ဆင်ရေး ကြောင့် လုံခြုံရေး တပ်ဖွဲ့ဝင်များနှင့် အရပ်သား စုစုပေါင်း သေဆုံးသူ ၁၄ ဦး ရှိကာ ဒဏ်ရာရရှိသူ ၁၅ ဦးခန့်ရှိကြောင်းသိရသည်။