သျှမ်းပြည်နယ် မြောက်ပိုင်း လားရှိုးမြို့ မန်ဆူကားကွင်းအတွင်း ကျပ်သိန်းပေါင်း ၈၀၀ ကျော်တန်ဖိုးရှိ မူးယစ်ဆေးများ သိမ်းဆည်း ရမိကြောင်း သတင်းရရှိသည်။
သြဂုတ်လ ၁ ရက် မနက် ၁၀ နာရီ က လားရှိုးမြို့ မန်ဆူကားကွင်းရှိ ကားဂိတ်သို့ မသင်္ကာဖွယ်ရာ ဆာလာအိတ်တလုံး ရောက်ရှိလာသဖြင့် ဒေသအာဏာပိုင်များ စစ်ဆေးရာ အိတ်ထဲတွင် (ဒေသ ကာလ ပေါက်စျေး ၈၂၈ တန်ဖိုးရှိ) စိတ်ကြွဆေးပြား ၄၁၄၀၀ ပြား အားသိမ်းဆည်း ရမိကြောင်း မူးယစ်ရဲတပ်ဖွဲ့ ထုတ်ပြန်ချက်အရ သိရသည်။
အဆိုပါ မူးယစ်ဆေးဝါး နှင့် ပတ်သက်ပြီး ချိတ်ဆက်စုံစမ်းရာ စိတ်ကြွဆေးပြားများ လာရောက်ထုတ်ယူ မည့်သူမှာ သြဂုတ်လ ၁ ရက် ည ၆နာရီတွင် မန္တလေးမြို့ မဟာအောင်မြေမြို့နယ် အသက် ၂၈ နှစ် အရွယ် ကျော်မြင့်(ခ)ကျောက်ချီရှင် နှင့် စိတ်ကြွဆေးပြားများအား ထုတ်ယူခိုင်းသူ လားရှိုးမြို့နယ် ဖာဖိုင့်ကျေးရွာနေ အသက် ၃၀ နှစ် အရွယ် တုံစိမ်း ကိုလည်း ဖမ်းဆီးရမိခဲ့သည်။
လက်ရှိမှာ ဖမ်းဆီးရမိသည့် သူများကို လားရှိုးမြို့ မ ရဲစခန်း တွင် မူးယစ်ဆေးဝါး နှင့် စိတ်ကို ပြောင်းလဲ စေသော ဆေးဝါးများ ဆိုင်ရာ ဥပဒေ ဖြင့် အမှုဖွင့် အရေးယူပြီး ကွင်းဆင်းများဖော်ထုတ် စစ်ဆေးလျက်ရှိကြောင်းသိရသည်။
