တရုတ်ပြည်သူ့သမ္မတ နိုင်ငံ တွင် ကျင်းပသည့် Miss Friendship International ၂၀၁၉ ပြိုင်ပွဲတွင် မြန်မာနိုင်ငံကိုယ်စားပြု ၀င်ရောက်ယှဉ်ပြိုင်သည့် သျှမ်းတိုင်းရင်းသူ နန်းမွေခမ်း လည်း ဆု ၂ ခု ဆွတ်ခူးခဲ့ကြောင်း သိရသည်။

အဆိုပါ ပြိုင်ပွဲ တွင် နိုင်ငံပေါင်း ၆၀ နိုင်ငံ မှ အလှမယ် များ ပါဝင် ယှဉ်ပြိုင်ခဲ့ပြီး မြန်မာ နိုင်ငံကိုယ်စားပြုအနေဖြင့် သျှမ်း တိုင်းရင်းသူ နန်းမွေခမ်း မှ ပါဝင်ယှဉ်ပြိုင်ခဲ့ကာ Miss Congeniality Award နှင့် Miss Popular Vote ဆု တို့ကို ရရှိခဲ့သည်။

“ ကျမ ကို vote ( အွန်လိုင်း မှ မဲပေး) ကြတဲ့ အတွက် ကျေးဇူးတင်ပါတယ်။ ပရိသတ်တွေအနေနဲ့ ကျမ ကို Vote မပေးခဲ့ရင် ဒီဆုကို ရမှာ မဟုတ်ပါဘူး။ ဆုရတဲ့ အတွက် အရမ်းလည်း ဝမ်းသာပါတယ် ” ဟု နန်းမွေခမ်း က သျှမ်းသံတော်ဆင့်ကို ပြောသည်။

နန်းမွေခမ်းသည် မြန်မာနိုင်ငံ ကိုယ်စားပြု သွားရောက်ယှဉ်ပြိုင်ရန် ရွေးချယ်ခံရခြင်းမှာ သူမ အနေဖြင့် ဘာသာစကား ၅ မျိုး ဖြစ်သည့် မြန်မာ၊ သျှမ်း၊ ထိုင်း၊တရုတ် နှင့် အင်္ဂလိပ် တို့ကို ပြောဆိုနိုင်ခြင်းကြောင့်ဖြစ်ကြောင်း သူမက ဆိုသည်။

အလှမယ် နန်းမွေခမ်းသည် ၂၀၁၈ ခုနှစ်တွင်လည်း မြန်မာနိုင်ငံ ကိုယ်စားပြု အလှမယ် အဖြစ် တရုတ်နိုင်ငံ နန်ကျင်းမြို့ တွင် ကျင်းပခဲ့သည့် Miss All Nations ပြိုင်ပွဲ ကို သွားရောက် ယှဉ်ပြိုင်ရာ Miss Ecotourism ဆု နှင့် Dream of Read Mansions Twelve Nobile- Miaoyu Title ဆုတို့ကို ဆွတ်ခူးရရှိခဲ့သည်။

နန်းမွေခမ်းသည် သျှမ်းပြည် မြောက်ပိုင်း နမ့်ခမ်းမြို့တွင် မွေးဖွားပါသည်။ ၂၀၁၃ ခုနှစ်တွင် B.A (History) ဘွဲ့ ရရှိခဲ့ပြီး ၂၀၁၇ ခုနှစ်တွင် Miss Golden Land ၀င်ရောက်ယှဉ်ပြိုင်ရာမှ သျှမ်းပြည်မြောက်ပိုင်းမယ်အဖြစ် ရွေးချယ်ခံပြီးနောက် Model လုပ်ငန်းသို့ စတင်ဝင်ရောက်လာခဲ့ပါသည်။