ထိုင်းနိုင်ငံအတွင်း မြောက်ပိုင်း ထိုင်းမြန်မာနယ်စပ်တွင် မူးယစ်ဆေးဝါး သယ်ဆောင်သည့်အဖွဲ့နှင့် ထိုင်း နိုင်ငံ နယ်စပ်လုံခြုံရေး တပ်ဖွဲ့တို့ ထိတွေ့မှုဖြစ်ပွါးကာ မူးယစ်ဆေးဝါးသယ်ဆောင်သူ ၄ ဦးသေဆုံးကြောင်းသိရသည်။

ဇူလိုင်လ ၂၄ ရက်နေ့က ထိုင်းနိုင်ငံ ချင်းရိုင်း ခရိုင်၊ မယ့်ဖှာ့လုံ( Mae FaLong) မြို့နယ်အတွင်း တောတွင်း တနေရာသို့ ကျောပိုးအိတ်များဖြင့် လမ်းလျှောက်ဝင်လာသည့် အမျိုးသား ၁၅ ဦး အဖွဲ့ကို တွေ့ရှိသဖြင့် ထိုင်းနိုင်ငံ လုံခြံုရေး အဖွဲ့ မှ ရှာဖွေစစ်ဆေးရန် တားဆီးရာမှ ထိုသို့ ပစ်ခတ်မှုဖြစ်ပွါးခဲ့ခြင်းဖြစ်ကြောင်းသိရသည်။

၄င်းတို့သည် ၁၅ မိနစ်ခန့်အကြာ အပြန်အလှန်ပစ်ခတ်ခဲ့ပြီးနောက်ပိုင်း မူးယစ်သယ်ဆောင်သည့်အဖွဲ့မှ ၄ ီ ဦး သေဆုံးခဲ့ပြီး တခြား အဖွဲ့ဝင်များ ထွက်ပြေး လွှတ်မြောက်သွားကြောင်း ထိုင်းနယ်စပ်ရဲတပ်ဖွဲ့မှ သတင်းထုတ်ပြန်ချက်အရ သိရသည်။

အဆိုပါသေဆုံးသူ ၄ ဦးမှာ မြန်မာနိုင်ငံသားများဖြစ်ကြောင်း ထိုင်းသတင်းများတွင်ရေးသားဖော်ပြထားသည်။

ထို ပစ်ခတ်မှု ဖြစ်ပွါးသည့်နေရာတွင် AK 47 ရိုင်ဖယ် တလက်၊ အိုက်စ် (၂၀) ကီလို ဂရမ် ကို ထိုင်းရဲများ သိမ်းဆည်းရမိခဲ့ပြီး ထွက်ပြေးလွှတ်မြောက်နေသူများအား မြန်မာ နယ်စပ် တလျှောက် တွင် ထိုင်းတပ်ဖွဲ့ များက ပိုက်စိပ်တိုက် ရှာဖွေ နေကြောင်း မယ့်ဖှာ့လုံတွင်နေထိုင်သည့်ဒေသခံများပြောပြချက်အရသိရသည်။