သျှမ်းပြည်နယ် အရှေ့ပိုင်း မိုင်းဆတ်မြို့နယ် အတွင်း ကျပ်သိန်း ၃၈၀၀ တန်ဖိုးရှိ ဘိန်းဖြူ များကို ဖမ်းဆီးရမိကြောင်း သတင်းရရှိသည်။
ဇူလိုင် ၁၂ ရက်နေ့ နေ့လည် ၁၁နာရီ ကျော်တွင် မိုင်းဆတ်မြို့နယ် မိုင်းတွမ်း တောင်ပေါ် ကျေးရွာ အုပ်စု၊ နမ့်ခမ်းကျေးရွာ တွင် နေထိုင်သည့် အသက် ၅၈နှစ် အရွယ် ရှိ ဦးလီခယ်နှင့် ဒေါ်မီပြ တို့ နေအိမ် မီးဖိုခန်း ကြမ်းပြင် အောက်တွင် သိုဝှက်ထားသည့် ဘိန်းဖြူ အလေးချိန် ၂၃.၇၆ ကီလို (ဒေသ ကာလ ပေါက်စျေးကျပ်သိန်းပေါင်း ၃၈၀၁.၆) သိန်း အား သိမ်းဆည်းရမိကြောင်း မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့ ထုတ်ပြန်ချက် အရသိရသည်။
အဆိုပါ ဘိန်းဖြူကို ဖမ်းဆီးမိချိန်တွင် ဒေါ်မီပြ တဦးသာ တွေ့ရှိကြောင်း၊ ထို့ကြောင့်ဒေါ်မီပြကို မိုင်းတွမ်းနယ်မြေရဲစခန်းတွင် မူးယစ်ဆေးဝါး နှင့် စိတ်ကို ပြောင်းလဲစေသော ဆေးဝါးများ ဆိုင်ရာ ဥပဒေ ဖြင့် အမှုဖွင့် အရေးယူပြီး ကွင်းဆက်များဖော်ထုတ် စစ်ဆေးလျက်ရှိကြောင်း မူးယစ်ဆေးဝါး တားဆီးနှိမ်းနင်ရေး ရဲတပ်ဖွဲ့ ထုတ်ပြန်ချက်တွင်ရေးသားထားသည်။
လွန်ခဲ့သည့် ဇွန် ၁၄ရက် တွင် တာချီလိတ်မြို့ နယ် အတွင်း ပိုင်ရှင်မဲ့ မူးယစ်ဆေး ကျပ်သိန်း ၄ သောင်းကျော် နှင့် လက်နက်များ သိမ်းဆည်းရမိခဲ့သည်။
ထို့ပြင် ယခုရက်ပိုင်း သျှမ်းပြည်နယ် တခွင်မူးယစ်ဆေးဝါး များ မကြာခဏဖမ်းဆီးရမိပြီး ၊ ဖမ်းဆီးရမိသူများသည် ပစ္စည်းလက်ခံသည့် သူနှင့် မူးယစ်ဆေးဝါး သယ်ယူသူများသာ ဖြစ်ကြောင်း၊ မူးယစ်ရာဇာ ဂိုဏ်းခေါင်းဆောင် များကို မဖမ်းဆီးနိုင်ခဲ့ပေ။
