သျှမ်းပြည် မိုင်းဆတ်ခရိုင် မိုင်းယွင်း ကျေးရွာအုပ်စုအတွင်း အွန်လိုင်းငွေလိမ်ဂိုဏ်းများနေထိုင် အလုပ်လုပ်သည့် နေရာကို “ ဝ”တပ်ဖွဲ့ က ဝင်ရောက်စီးနင်းပြီး ဖမ်းဆီးသွားကြောင်း သတင်းရရှိသည်။
အဆိုပါ ဖြစ်စဥ်သည် အောက်တိုဘာ ၁၄ ရက် နံနက် ၃ နာရီဝန်းကျင်တွင် မိုင်းဆတ်မြို့နယ် မိုင်းယွင်းကျေးရွာအုပ်စု ပိန်းခမ်းရွာအတွင်း အွန်လိုင်းဖြင့် ငွေလိမ်လည်ခြင်း၊ လောင်းကစားပြုလုပ်နေသောဂိုဏ်းကို “ဝ” တပ်ဖွဲ့က ဝင်ရောက်ဖမ်းဆီးကြောင်း မိုင်းဆတ်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဖမ်းခံရသွားတဲ့သူတွေက အရမ်းများတယ်။ ခန့်မှန်းရခက်တယ်။ တရုတ်နိုင်ငံဘက်က သူဌေးတွေရော အလုပ်လုပ်နေတဲ့ မြန်မာနိုင်ငံသားရော၊ အဲ့ထဲမှာနေတဲ့သူအားလုံးပါသွားတယ်” ဟု ၎င်းက ဆိုသည်။
“ဝ”တပ်ဖွဲ့ ဝင်ရောက်စီးနင်းသည့် အွန်လိုင်း ငွေလိမ်ဂိုဏ်းနေထိုင်သည့်နေရာသည် တိုက်တန်းလျား တစ်ခုဖြစ်ပြီး၊ ထိုထဲတွင် တရုတ်လူမျိုး အများအပြားနေထိုင်ပြီး အခြားလူမျိုးဖြစ်သည့် သျှမ်းလူမျိုး၊ လီဆူးလူမျိုး၊ အာခါလူမျိုး နှင့် “ဝ” လူမျိုးများလည်း နေထိုင်ပြီး အလုပ်လုပ်နေကြကြောင်း သိရသည်။
ဖမ်းဆီးခံရသူများသည် ၃၀၀ ကျော်ရှိပြီး၊ ထိုထဲတွင် တရုတ်လူမျိုး (၁၀၀) ကျော် အပါအဝင် မြန်မာအလုပ်သမား စုစုပေါင်း ၃၀၀ကျော်ခန့်ရှိကြောင်း RFA သတင်းတွင် ရေးသားထားသည်။
“ အဲ့နေရာက အရင်ကတည်း တရုတ်တွေ ရောက်နေပြီးသား။ နောက် အိပ်ဖို့နေရာ၊ အွန်လိုင်းလုပ်ဖို့ စားဖို့ အဲ့မှာ အကုန်လုံးလုပ်ထားတယ်။ “ဝ” က ဝမ်ဟုန်ဘက်ကို ခေါ်သွားတယ်လို့ ပြောတာပဲ” ဟု အထက်ပါ အမျိုးသားက ထပ်လောင်းပြောသည်။
မိုင်းယွင်းကျေးရွာအုပ်စုသည် မိုင်းဆတ်မြို့မှ ကား၊ ဆိုင်ကယ်ဖြင့် နှစ်နာရီနီးပါး ခရီးသွားရကြောင်း သိရသည်။
စစ်တပ်က အာဏာသိမ်းပြီးနောက် နိုင်ငံရေး အခြေအနေ မငြိမ်မှုကြောင့် စီးပွားရေး၊ ပညာရေး နှင့် အလုပ်အကိုင် အခွင့်အလမ်း ရှားပါးလာရာ လူငယ်များသည် ဝင်ငွေ များသည်ဟု ယူဆသည့် အွန်လိုင်းဂိမ်းအလုပ်ကို ပိုလုပ်ကိုင်လာ ကြသည်။
ယခုလပိုင်းအတွင်း မြန်မာ – တရုတ်နယ်စပ်တလျှောက် ကိုးကန့် ဒေသ၊ “ဝ” ဒေသ နှင့် မူဆယ်မြို့ နယ်အတွင်း အွန်လိုင်း ငွေလိမ်ဂိုဏ်း များကို တရုတ် – မြန်မာ – ထိုင်း (၃) နိုင်ငံ ပူးပေါင်းပြီး ဖမ်းဆီးမှု ပြုလုပ်သွားမည်ဟု ကြေညာထားသည်။
ယခုလ (အောက်တိုဘာ) ၁၆ ရက်တွင်လည်း မြန်မာနယ်စပ်တလျှောက်တွင် အွန်လိုင်း ငွေလိမ်ဂိုဏ်း နှင့် ဆက်စပ်သည့် သံသယရှိသူ ၄၆၀၀ ကျော် ဖမ်းဆီးရမိကြောင်း တရုတ်နိုင်ငံပြည်သူ့လုံခြုံရေး ဌာန ထုတ်ပြန်ချက်အရ သိရသည်။
Leave a Comments