စစ်အာဏာသိမ်းခေါင်းဆောင် မင်းအောင်လှိုင်အနေဖြင့် နိုင်ငံတော်သမ္မတအဖြစ် ရွေးကောက် တင်မြှောက်ခံရပြီးနောက် ဂုဏ်ပြုဝမ်းမြောက်ကြောင်း သဝဏ်လွှာကို ‘ဝ’ပြည်သွေးစည်းညီညွတ်ရေး တပ်မတော် (UWSA) မှ ပေးပို့ခဲ့ကြောင်း ထုတ်ပြန်ချက်အရ သိရသည်။
ယနေ့ (ဧပြီလ ၃ ရက်) နေပြည်တော်၌ ကျင်းပခဲ့သည့် ပြည်ထောင်စုလွှတ်တော် အစည်းအဝေးတွင် အတုအယောင် ရွေးကောက်ပွဲမှတဆင့် လွှတ်တော်အမတ် ဖြစ်လာသူများက စစ်အာဏာသိမ်း ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို မြန်မာနိုင်ငံ၏ (၁၁) ယောက်မြောက် သမ္မတအဖြစ် ရွေးချယ်တင်မြှောက်ခဲ့ကြသည်။
ထိုသို့ စစ်ခေါင်းဆောင် မင်းအောင်လှိုင်ကို နိုင်ငံတော်သမ္မတအဖြစ် ရွေးကောက်တင်မြောက်ခံရခြင်းကို ကြားသိရသည့်အတွက် ‘ဝ’ပြည်သွေးစည်းညီညွတ်ရေးပါတီ ဗဟိုကော်မတီ၊ ‘ဝ’ပြည်သွေးစည်းညီညွတ်ရေးတပ်မတော် ဗဟိုဌာနချုပ် (UWSP/UWSA) နှင့် ‘ဝ’ဒေသရှိ ပြည်သူများအားလုံးမှ လှိုက်လှဲစွာ ဂုဏ်ပြုကြောင်း ထုတ်ပြန်ချက်တွင် ဖော်ပြထားသည်။
ထိုအပြင် “ဝ”ဒေသသည် ပြည်ထောင်စုမြန်မာနိုင်ငံတော်မှ ခွဲထွက်မရသည့် အစိတ်အပိုင်း တစ်ခုဖြစ်ပြီး နိုင်ငံတော်မှ ခွဲထွက်ခြင်းနှင့် သီးခြားလွတ်လပ်ရေးကို ကြေညာခြင်း မရှိစေရန် အခိုင်အမာ ရပ်တည် ထားကြောင်း UWSA ထုတ်ပြန်ချက်တွင် ဖော်ပြထားသည်။
“ဝ”ဒေသသည် ငြိမ်းချမ်းသော ဖွံ့ဖြိုးတိုးတက်မှုလမ်းစဉ်ကို လျှောက်လှမ်းရန် စွဲမြဲစွာ ဆောင်ရွက်သွားမည်ဖြစ်ပြီး တိုင်းရင်းသား တန်းတူညီမျှရေး၊ စည်းလုံးညီညွတ်ရေးနှင့် ပြည်သူများ၏ လူမှုဘဝဖွံ့ဖြိုးတိုးတက်ရေးကို မြှင့်တင်ဆောင်ရွက်ကာ နယ်စပ်ဒေသ၏ တည်ငြိမ်အေးချမ်းမှုကိုလည်း ဆက်လက်ထိန်းသိမ်းသွားမည်ဖြစ်ကြောင်း ဆိုထားသည်။
ပြည်ထောင်စု နိုင်ငံတော်၏ မူဘောင်အောက်တွင် ပြည်ထောင်စုအစိုးရနှင့် ဆက်လက် ဆက်သွယ်ညှိနှိုင်း ပူးပေါင်းဆောင်ရွက်သွားမည်ဖြစ်ကြောင်း၊ ငြိမ်းချမ်းသော ဆွေးနွေးညှိနှိုင်းမှုမှ တစ်ဆင့် မိမိတို့၏ နိုင်ငံရေး ဆန္ဒများကို အကောင်အထည် ဖော်သွားမည်ဖြစ်ကြောင်း၊ ပြည်ထောင်စု မြန်မာနိုင်ငံတော်၏ ငြိမ်းချမ်းရေးတည်ဆောက်မှု နှင့် ရေရှည်ဖွံ့ဖြိုးတိုးတက်မှုကို အတူတကွ တွန်းအားပေး ဆောင်ရွက်သွားမည် ဖြစ်ကြောင်းကိုလည်း ထုတ်ပြန်ချက် ဆက်လက်ဖော်ပြထားသည်။
ထို့အပြင် သမ္မတဖြစ်သွားသည့် စစ်ခေါင်းဆောင် မင်းအောင်လှိုင် ၏ ဦးဆောင်မှု အောက်တွင် နိုင်ငံတော် ငြိမ်းချမ်းတည်ငြိမ်မှု၊ တိုင်းရင်းသား စည်းလုံးညီညွတ်မှု၊ လျင်မြန်စွာ ဖွံ့ဖြိုးတိုးတက်မှု နှင့် တိုင်းရင်းသား ပြည်သူအားလုံး သာယာဝပြောမှုတို့ကို အမြန်ဆုံးရရှိလိမ့်မည်ဟု အခိုင်အမာ ယုံကြည်ကြောင်း UWSA ထုတ်ပြန်ချက်တွင် ရေးသားထားသည်။
အလားတူ မတ်လ (၃၀) ရက်တွင် စစ်ခေါင်းဆောင် မင်းအောင်လှိုင်၏ တပ်မတော်ကာကွယ်ရေးဦးစီးချုပ် ရာထူးကို ဗိုလ်ချုပ်ကြီး ရဲဝင်းဦးထံသို့ တာဝန်လွှဲအပ်စဉ်ကလည်း ‘ဝ’တပ်ဖွဲ့ UWSA နှင့် မိုင်းလားတပ်ဖွဲ့ NDAA တို့မှ ဂုဏ်ပြုသဝဏ်လွှာ အသီးသီး ပေးပို့ခဲ့ကြသည်။
Leave a Comments