သျှမ်းပြည်နှင့်အဝှမ်း လူငယ်များအပြင် ရန်ကုန်၊ မန္တလေးနှင့်ကချင်ပြည်နယ်ရှိ သျှမ်းလူငယ်ကွန်ယက်မှ လူငယ်အဖွဲ့ဝင် ထောင်ဂဏန်းက မူးယစ်ဆေးဝါးကင်းစင်ရေး ၊ သဘာဝထိန်းသိမ်းရေးလှုပ်ရှားမှုအဖြစ် သမိုင်းဝင် မွေတော်ဟိုလိန်းဘုရားရှိရာ တောင်ပေါ်သို့ စုပေါင်းတက်ကြသည်ဟု သိရသည်။
သျှမ်းလူငယ် ကွန်ယက်အဖွဲ့ဝင် မြို့နယ် ၂၇ ခုမှ သျှမ်းလူငယ် တထောင်နီးပါးက ဖေဖော်ဝါရီလ ၁၈ ရက်နေ့က သျှမ်းပြည်အရှေ့ပိုင်း ကျိုင်းတုံခရိုင် မိုင်းပျဉ်းမြို့နယ် ပျက်ကန့်အုပ်စု အမြင့်ပေ ၁၀၉၀ ပေရှိမွေတော်ဟိုလိန်းစေတီတော် တည်ရှိရာတောင်အား တက်ရောက်ခဲ့ကြခြင်းဖြစ်သည်။
“၇၁ နှစ်ပြည် သျှမ်းပြည်အမျိုးသားနေ့အထိမ်းအမှတ်အနေနဲ့ပါ။ ကျနော်တို့ လူငယ်တွေအနေနဲ့ ဒီတောင်ကိုတက်ရခြင်းကနေရရှိတဲ့အကျိုးကျေးဇူးတွေကတော့ သဘာဝပတ်ဝန်းကျင် ကိုလေ့လာခွင့်ရခဲ့တယ်။ သစ်ပင်သစ်တောဖျက်ဆီးမှုကြောင့်ရရှိတဲ့အကျိုးကျေးဇူး တွေကိုလေ့လာခွင့်ရခဲ့တယ်။ သျှမ်းလူငယ်တွေ စုပေါင်းညီညွတ်မှုအင်အားကိုရရှိခဲ့တယ်။ အမျိုးသားရေးအတွက်ဘာတွေ လက်တွဲဆောင်ရွက်ရသလဲ ဆိုတာကိုလည်း သိရှိခဲ့ရတယ်။ ဒေသတွင်းလူထုကလည်း ကျနော်တို့ကို ကောင်းမွန်စွာ ဂရုစိုက်ပါတယ် ။ ”- ဟု TYN သျှမ်းလူငယ်ကွန်ယက်ပြောခွင့်ရစိုင်းဆုကပြောသည်။
အဆိုပါ တောင်တက်ခြင်းလှုပ်ရှားမှုတွင် ဘာသာစာပေအကြောင်းနှင့် အမျိုးသားရေးအကြောင်း ဟောပြောမှုလည်းရှိခဲ့ကြောင်း ဆိုပါသည်။
“၁၉ ရက်နေ့ မှာတော့ တောင်တက်လူငယ်တွေဟာ ကာလိမြို့နယ်ခွဲ လွယ်တိုင်းလီ မှာပြုလုပ်တဲ့ ဟောပြောပွဲကိုလာရောက်နားထောင်တယ်။ အဲဒီမှာ စာရေးဆရာ ခူးဟင်းကာယန်းက အမျိုးသားရေး ၊နိုင်ငံရေးအကြောင်း၊ စလေးကော်မိန်းက ဘာသာစကားနဲ့စာပေယဉ်ကျေးမှုအကြောင်း ဟောပြောပါတယ်။ ”- ဟု စိုင်ဆုကပြောသည်။
စာပေဟောပြောပွဲကျင်းပသော ကွန်ဟိန်းမြို့နယ် ကာလိမြို့ လွယ်တိုင်းလီမှာ တောင်ကြီးမြို့ အရှေ့ဘက် ၁၄၉ မိုင်အကွာတွင်ရှိပြီး မွေတော်ဟိုလိန်းမှာ ကာလိ မြို့အရှေ့ဘက် သံလွင်မြစ်ကူးတို့ဆိပ်မှ အထက်ဘက်သို့ ၁ နာရီခန့်အကြာစက်လှေစီးမှ သာရောက်ရှိကြောင်းသိရပါသည်။
မူးယစ်ဆေးဝါးကင်းဝေးစေရေး၊ သဘာဝပတ်ဝန်းကျင်ထိန်းသိမ်းစောင့်ရှောက်ရေးနှင့် လူငယ်များ ချစ်ခင်စည်းလုံးမှုရရှိရေးအတွက်ရည်ရွယ်ကာ သျှမ်းလူငယ်ကွန်ယက် TYN က တောင်တက်လှုပ်ရှားမှုများ ပြုလုပ်လာသည်မှာ ယခုတကြိမ်အပါအဝင် ၈ ကြိမ်မြောက်ရှိပြီဖြစ်ပါသည်။
Leave a Comments