သတင်းများဖော်ပြရာတွင် သွေးကွဲမှုဖြစ်ပေါ်စေသောအသုံးအနှုန်းများ ရှောင်ရှားပေးနိုင်ရန်အတွက် ထိုင်းနိုင်ငံ ချင်းမိုင် မြို့မှ သျှမ်းစာပေနှင့်ယဉ်ကျေးမှုထိန်းသိမ်းရေးအသင်းနှင့် ထိုင်းနိုင်ငံမြောက်ပိုင်း ဌာနေတိုင်းရင်းသားများကွန်ယက် တို့က ထိုင်းနိုင်ငံမြောက်ပိုင်း သတင်းမီဒီယာအစည်းအရုံး ထံ အိတ်ဖွင့်ပေးစာတစောင်ပေးပို့ခဲ့သည်။

ဇွန်လ ၂၁ ရက် မနက်ပိုင်း ရ နာရီအချိန်က ထိုင်းနိုင်ငံ ချင်းမိုင်မြို့ရှိ သျှမ်းစာပေနှင့် ယဉ်ကျေးမှုထိန်းသိမ်းရေးအသင်း နှင့် ထိုင်းနိုင်ငံမြောက်ပိုင်း တိုင်းရင်းသားများအဖွဲ့ချုပ်တို့ပူးပေါင်းကာ ထိုင်းနိုင်ငံမီဒီယာများမှ သတင်းရေးသား ဖော်ပြမှုများတွင် အတူတကွပူးတွဲနေထိုင်ရေးကို ထိခိုက်ပျက်စီးလာစေမည့်အနေအထား ဖြစ်သဖြင့် အသုံး အနှုန်းများ အထူးသတိပြုစေလိုကြောင်း သတင်းစာရှင်းလင်းမှုတခု ပြုလုပ်ခဲ့ပြီး အဆိုပါ အကြောင်းအရာများ ရေးသားထားသော စာအား ထိုင်းနိုင်ငံမြောက်ပိုင်း ဌာနေတိုင်းရင်းသား များကွန်ယက်နှင့် ချင်းမိုင် ၊ လမ်းပွန်းရောက်သျှမ်းရွှေ့ပြောင်းအလုပ်သမားများ စုစုပေါင်းအင်အား ၅၀ ခန့်က သတင်းမီဒီယာအစည်းအရုံး( ထိုင်းနယူးရုံးချုပ်) ထံသွားရောက်ပေးပို့ ခဲ့ခြင်းဖြစ်သည်။

ချင်းမိုင်မြို့ရှိ ထိုင်းနိုင်ငံမြောက်ပိုင်း ဌာနေတိုင်းရင်းသားများကွန်ယက် ဥက္ကဌ စိုင်းဆိုင်မိန်း မန်းကွန်းက – “အခုလိုအဖြစ်အပျက်မျိုး ချင်းမိုင်မှာ ပထမဆုံးအကြိမ် ဖြစ်ခဲ့တာမဟုတ်ပါဘူး။ အရင်တုန်းကလည်း အကြိမ်ကြိမ်ဖြစ်ခဲ့ဖူးပါတယ်။ ဖြစ်ခဲ့တိုင်းမှာလည်း ထိုင်းနိုင်ငံမှာလာရောက်ခိုလှုံအလုပ်လုပ်နေတဲ့ သျှမ်းရွှေ့ပြောင်းအလုပ်သမားတွေအပေါ် အပြစ်တွေချည်းမြင် လာစေမယ့်အသုံးအနှုန်းတွေကို ထိုင်းသတင်းမီဒီယာတွေက သုံးနှုန်းပြောဆိုရေးသားခဲ့တယ်။ ဒီလိုသုံးနှုန်း ပြောဆိုခဲ့ခြင်းအားဖြင့် မဖြစ်မနေအတူယှဉ်တွဲနေထိုင်နေရတဲ့ လူမှုအသိုင်းအဝိုင်းမှာ ခွဲခြားဆက်ဆံမှုတွေ ဖြစ်ပေါ်လာစေတယ်။ ဒီအသေးအဖွဲကအစ ကျနော်တို့သတိချပ်ပြီးမလုပ်ဆောင်ခဲ့ရင် လှုမှုအသိုင်းအဝိုင်း မှာသာမက နောက်ဆုံး နိုင်ငံတော်တည်ငြိမ်အေးချမ်းမှုကိုပါ ထိခိုက်လာနိုင်မှာဖြစ်တဲ့အတွက်ကျနော်တို့က အခုလို အသုံးအနှုန်းလေးတွေသတိထားပြီးသုံးစေချင်တယ်ဆိုပြီး စာတစောင်ရေးပြီး ပေးပို့ရတာဖြစ်ပါတယ် ”- ဟု သတင်းစာရှင်းလင်းပွဲတွင်ပြောကြားခဲ့သည်။

ဇွန်လ ၁၈ ရက်နေ့မနက် ၃ နာရီအချိန်ခန့်က ထိုင်းနိုင်ငံချင်းမိုင်မြို့ ပတူထာ့ဖဲတွင် ချင်းမိုင်မြို့ နည်းပညာ အထက်တန်းကျောင်းသားများအဖွဲ့နှင့် သျှမ်းရွှေ့ပြောင်းအလုပ်သမား လူငယ်အဖွဲ့တို့ စကားများ ခိုက်ရန် ဖြစ်ပွါးပြီး အပြန် ထိုင်းကျောင်းသားလေးများအဖွဲ့၏ ဆိုင်ကယ်တစီး (သတ်မှတ်နှုန်းထက်မြန်သော အရှိန်ဖြင့် မောင်းရာမှ) တိမ်းမှောက်သွားပြီး ကျောင်းသားလူငယ် ၂ ဦး ပွဲချင်းပြီးသေဆုံးခဲ့သည်။

၄င်းသေဆုံးမှုမှာ သျှမ်းလူငယ်များအဖွဲ့ ဆာမူရိုင်းလူဆိုးဂိုဏ်းမှ လိုက်လံကာ ဓါးဖြင့်ခုတ်သဖြင့်သေဆုံး ခြင်းဖြစ်ကြောင်း ချင်းမိုင်နယူး၊ ထိုင်းရတ် အစရှိထိုင်းသတင်းမီဒီယာများက ရေးသားဖော်ပြခဲ့သည်။

သို့သော် အဆိုပါသေဆုံးမှုအား အနီးတဝိုက်ရှိစီစီတီဝီများကို ထိုင်းရဲများစစ်ဆေးကြည့်ရှုရာတွင် ထိုင်းကျောင်းသားများ ဆိုင်ကယ်အမောင်းကြမ်းသဖြင့် တိမ်းမှောက်ကာသေဆုံးခြင်းသာဖြစ်ကြောင်း ၊ သေဆုံးသူများမှာ ဓါးခုတ်သည့်ဒဏ်ရာမရှိကြောင်း ထိုင်းရဲများပြောဆိုခဲ့သည်။

ထိုနောက်ပိုင်း အခင်းဖြစ်ပွါးရာအနီးတဝိုက်နေထိုင်သည့် ရွှေ့ပြောင်းအလုပ်သမားများကိုထိုင်းရဲများက ၀င်ရောက်စစ်ဆေးရာတွင် နေထိုင်အလုပ်လုပ်ခွင့်လက်မှတ်မရှိသော သျှမ်းလူငယ် ၃ ဦးအားဖမ်းမိကြောင်း၊ ထိုလူငယ်များမှာ ဆာမူရိုင်း သျှမ်းလူငယ် လူဆိုးဂိုဏ်းအဖွဲ့ဝင်များဖြစ်ကြောင်း၊ ခေါင်းဆောင်ဖြစ်သူတဦး ထွက်ပြေး လွတ်မြောက်နေကြောင်းသတင်းများက ထုတ်ပြန်ရေးသားထားသည်။

၄င်းရေးသားချက်များကြောင့် လူမှုကွန်ယက်တွင် သျှမ်းရွှေ့ပြောင်းအလုပ်သမားများအား သိမ်းကြုံး ဆဲဆိုကြိမ်းမောင်းသည့် ကွန်မန့်များ ရေးသားကြသည့်အပြင် လုပ်ငန်းခွင်နှင့် လူမှုအသိုင်းအဝိုင်းတွင်လည်း အလုပ်လုပ်ရခက်ခဲစေသည့်ခွဲခြားဆက်ဆံမှုမျိုးများရှိလာသည်ဟု ရွှေ့ပြောင်းအလုပ်သမားအရေး ဆောင်ရွက်နေသည့် အဖွဲ့အစည်းကလည်းပြောပါသည်။

“မှားတဲ့သူကိုဘဲ ညွှန်းဆိုပါ ဖမ်းဆီးအပြစ်ပေးပါ။ သူက သျှမ်းမို့လို့ သျှမ်းလူမျိုး လူဆိုးဂိုဏ်း စသည့်ဖြင့် ရေးသားဖော်ပြတာဟာ သတင်းကျင့်ဝတ်နဲ့လည်းမညီပါဘူး။ ဒါကြောင့် သတိထားစေချင်တာပါ။ ထိုင်းရဲ များဖမ်းထားတဲ့ သျှမ်းရွှေ့ပြောင်းအလုပ်သမား ၃ ယောက်ကိုလည်း သူတို့ ရုံးထုတ်စစ်ဆေးချိန် ပြင်ပလူနဲ့ တွေ့ခွင့်ပေးချိန်မှာကျနော်တို့ သျှမ်းစာပေယဉ်ကျေးမှုကော်မတီအနေနဲ့သွားရောက်တွေ့ဆုံပြီး အဖြစ်မှန် သိရအောင် စကားပြောဆွေးနွေးကြည့်ပါမယ် ” – ဟု စိုင်းဆိုင်မိန်း မန်းကွန်းကပြောသည်။

ထိုင်းနိုင်ငံမြောက်ပိုင်း တိုင်းရင်းသားများအဖွဲ့နှင့် ချင်းမိုင်မြို့ သျှမ်းစာပေနှင့်ယဉ်ကျေးမှုကော်မတီ တို့ မှပေးပို့သောစာတွင် – ပြသနာတခုဖြစ်ပေါ်တိုင်း မှားသည့်သူကိုသာ ဖော်ပြခြင်းမပြုဘဲ လူမျိုးအမည်၊ တိုင်းရင်းသားအမည်တို့ကို သတင်းများတွင် ထည့်သွင်းရေးသားဖော်ပြခြင်းသည် သတင်းကျင့်ဝတ်နှင့် မညီသည့်အပြင် လူမှုအသိုင်းအဝိုင်းအား ခွဲခြားဆက်ဆံမှုဖြစ်အောင်လှုံ့ဆော်နေသကဲ့သို့ဖြစ်စေသဖြင့် ထိုင်းနိုင်ငံမြောက်ပိုင်း ဌာနေတိုင်းရင်းသားများကွန်ယက်မှ အထူးစိုးရိမ်မိပါကြောင်း ၊ မိမိတို့၏ တောင်းဆို ချက်များကို သုံးသပ်ပြုပြင်ခြင်းမပြုဘဲ သွေးကွဲစေမည့်စကားလုံးအသုံးအနှုန်းဆက်လက်သုံးသွားမည်ဆိုပါက တရားဥပဒေအတိုင်း ဆက်လက်အရေးယူဆောင်ရွက်သွားမည်ဟု ပါရှိပါသည်။