သျှမ်းပြည်မြောက်ပိုင်း နမ့်ခမ်းမြို့နယ် မြို့နယ်စိုက်ပျိုးရေးဦးစီးမှူးသည် ဒေသခံလယ်သမားများအား စပါးအထူးအထွက်တိုးစခန်းအမှတ် ၃ တွင်တွေ့ဆုံဆွေးနွေးရေးအတွက် သော့မဖွင့်ပေးသဖြင့်ဟုဆိုကာ ဆန္ဒထုတ်ဖော်မှုပြုခဲ့ကြကြောင်းသိရသည်။

ဇွန်လ ၁၈ ရက် မနက် ၉ နာရီက စပါးအထူးအထွက်တိုးစခန်းအမှတ် ၃ တွင် စိုက်ပျိုးရေးဌာန ဦးစီးမှူးမှ ဂတိအတိုင်း ဆောင်ရွက်ခြင်းမရှိကြောင်း၊ စိုက်ပျိုးရေးအဖွဲ့အစည်းကိုလည်းမလိုလားကြောင်း ဒေသခံလယ်သမားများစုပေါင်းကာ အော်ဟစ်ဆန္ဒထုတ်ဖော်ခဲ့ကြခြင်းဖြစ်ကြောင်းသိရသည်။

နမ့်ခမ်းမြို့ လယ်သမားများအဖွဲ့အစည်း အတွင်းရေးမှူး စိုင်းအောင်မြင်က – “ကျနော်တို့ လယ်သမားများအဖွဲ့ ကနေပြီးတော့ ဒေသခံတောင်သူလယ်သမားတွေကို ပုံစံ ရ အကြောင်း ရှင်းလင်းပြောပြမလို့ ချိန်းထားတယ် ။ အဲဒီအတွက် ဒီ စခန်း ၃ ကိုအသုံးပြုခွင့်အတွက်လည်း ကျနော်တို့ စိုက်ပျိုးရေးဌာနမှာ စိုက်ပျိုးရေးဦးစီးမှူး ဦးအောင်စိုးဦးနဲ့သွားတွေ့ဆုံ ပြီးသား။ သူတောင်ပြောသေး တယ်မနေ့က ။ အဲဒီစခန်း ၃ မှာ မလှဲမကျင်းရတော့ ပေပွနေတာ အဲ့မှာလုပ်လို့မကောင်းပါဘူး ။စိုက်ပျိုး ရေးရုံးမှာသွားလုပ်ပါလားလို့တောင်အကြံပေးတယ်။ ကျနော်တို့က အဲ့မှာကျနော်တို့သွားပြီး သန့်ရှင်းရေး လုပ်ထားပြီးပြီလို့လည်း ဆွေးနွေးထားကြပြီးသား။ ဒီနေ့အစည်းအဝေးချိန်ရောက်မှ သူတို့ဘက်က သော့လာ မဖွင့် ပေးဘူး။ အသုံးပြုခွင့်လည်းမပေးဘူးလို့ အချိန်ကပ်မှ လာပြောတယ်။ ကျနော်တို့ကိုသုံးခွင့်မပေးရင် ဆန္ဒထုတ်ဖော်ရလိမ့်မယ် ဆိုတော့သူက ထုတ်ဖော်လည်းသူ့အပိုင်းမဟုတ်ဘူးတဲ့ ဆန္ဒပြလည်းသူ မတတ်နိုင်ဘူး သော့မဖွင့်ပေးနိုင်ဘူး ဆိုလို့ကျနော်တို့ ဒီမှာ ချိန်းထားတဲ့ရွာသားတွေနဲ့ ၀ုိင်းပြီးအော်ဟစ်ဆန္ဒထုတ်ဖော်ရတာဖြစ်တယ် ” – ဟု သျှမ်းသံတော်ဆင့်အားရှင်းပြသည်။

နမ့်ခမ်းမြို့တွင် ဒေသခံများလယ်ယာမြေများအား – ခြံမြေများ ပုံစံ ရ ရရှိရေးဆွေးနွေးရန်၊ ပြီးခဲ့သည့်မတ်လ ၅ ရက်နေ့ ၂၀၁၉ က သျှမ်းပြည်နယ်ဝန်ကြီးချုပ်နမ့်ခမ်းမြို့သို့ရောက်ရှိကာ ဒေသခံလယ်သမားများအား ပုံစံ ရ ပြုလုပ်ပေးရန်မှာထားကြောင်းများကိုပြန်လည်ရှင်းလင်းပြောပြရန်အတွက် – နမ့်ခမ်းမြို့နယ် တောင်သူလယ်သမားများအဖွဲ့က ခေါ်ယူဖိတ်ထားခြင်းဖြစ်ကြောင်း ထို့အတွက်ကြောင့်လူထု အင်အား ၂၀၀ ခန့် စခန်း ၃ သို့ရောက်ရှိနေချိန်ဖြစ်ကြောင်း သိရသည်။

“ဦးစီးမှူးက သော့မဖွင့်ပေးဘူးဆိုတော့ ကျနော်တို့က အဲ့ဆိုရင် အစည်းအဝေးပုံစံမလုပ်တော့ဘူး။ ပြန်လည်ရှင်းလင်းရေးဘဲလုပ်တော့မယ်ဆိုလည်းမရဘူး။ ကျနော်တို့ ဆန္ဒထုတ်ဖော်ပြီးတော့ နမ့်ခမ်းမြို့နယ် တောင်သူလယ်သမားများအဖွဲ့ ဥက္ကဌ စိုင်းယီထွန်းရဲ့ တဲမှာသွားပြီးအစည်းအဝေးလုပ်တယ်လေ ။ ဒီစိုက်ပျိုးရေးဌာနက ကျနော်တို့အပေါ် လုပ်နေတဲ့ဟာနဲ့ပတ်သက်ပြီး ကြေငြာချက်ထုတ်ပြန်တယ်”- ဟု စိုင်းအောင်မြင်က ဆိုပါသည်။

ထိုကြေငြာချက်တွင် – စခန်း ၃ အား စိုက်ပျိုးရေးဌာနက ပြုပြင်သန့်ရှင်းရေးလုပ်လိုပါက လယ်သမားများအဖွဲ့က လုပ်ခွင့်ပြုမည်မဟုတ်၊ ဆန့်ကျင်ကန့်ကွက်သွားမည်။ အဆိုပါ စခန်း ၃ အား နမ့်ခမ်းတောင်သူလယ်သမားများ၏လက်ထဲပြန်ရောက်အောင်အတွက် ပြန်လည်တောင်းဆိုသွားမည်။ အဆိုပါစခန်း ၃ အား တောင်သူလယ်သမားများအတွက်ပြန်မပေးပါက ဆန္ဒထုတ်ဖော်တောင်းဆိုသွားမည် – စသည်ဖြင့်ပါရှိပါသည်။

နမ်‌့ခမ်‌းမြို့ရှိ စပါးအထူးထွက်‌တိုးစခန်‌းများသည်‌ ‌တောင်‌သူလယ်‌သမားများစု‌ပေါင်‌းပြီး ၁၉၈၁ ခုနှစ်‌တွင်‌ တည်‌‌ဆောက်ခဲ့ကြောင်းသိရသည်။

‌မြေ‌နေရာကအစ အ‌ဆောက်‌အဦးအားလုံးကို ဓာ‌တ်‌‌မြေသြဇာ‌ရောင်‌းရ‌ငွေမှ အမြတ်‌များဖြင်ခဲ့ကြောင်း နမ့်ခမ်းမြို့နယ်တောင်သူလယ်သမားများအဖွဲ့အစည်းဥက္ကဌကပြောသည်။

‌နမ်‌့ခမ်‌း‌တောင်‌သူလယ်‌သမားအဖွဲ့ရုံးကို ‌ကောင်‌း‌နောင်‌မိုရပ်‌ကွက်‌ ကျားဖြူခန်းမအနီးတွင်ရှိပြီး စပါးအထွက်တိုး စခန်း ၁ အား မန့်ခမ်းရပ်ကွက်၊ စခန်း ၂ အားဟိုကတ်ရပ်ကွက် ၊ စခန်း ၃ အား ပေါက်တိုက်ရပ်ကွက်၊ စခန်း ၄ အား မန့်နားရပ်ကွက်တို့တွင် အသီးသီးတည်ရှိကြောင်း သိရသည်။ အဆိုပါစခန်းများအား ၁၉၈၈ ခုနှစ်က အစိုးရက သိမ်းယူလိုက်ကြောင်း၊ သို့သော် ၂၀၁၆ တွင်နမ့်ခမ်းမြို့နယ်တောင်သူလယ်သမားများအဖွဲ့ ပြည်လည်မှတ်ပုံတင်နိုင်ခဲ့ပြီး အဆိုပါစခန်းများကိုပါ ပြန်လည်အသုံးပြုခွင့်ရရေး ၂၀၁၇ တွင် ပြည်ထောင်စုအစိုးရသို့ တကြိမ် စာတင်ပြတောင်းဆိုခဲ့ကြောင်း၊ စခန်းများပြန်လည်ရရှိရေး ထပ်မံစာတင်တောင်းဆိုမည်ဖြစ်ပြီး မရရှိပါက ပြည်သူများအား အကြေင်းကြားကြေငြာကာ ဆန္ဒထုတ်ဖော် တောင်းဆိုသွားမည်ဖြစ်ကြောင်း နမ့်ခမ်းမြို့နယ်တောင်သူလယ်သမားများအဖွဲ့က ပြောဆိုပါသည်။