သျှမ်းပြည်မြောက်ပိုင်း နမ့်ခမ်းမြို့နယ် မန့်ဟိုင်းကျေးရွာတွင် နေထိုင်သည့် အသက် (၅၀) ကျော် အမျိုးသားတစ်ဦးကို အမည်မသိ လက်နက်ကိုင်တစ်စုက နေအိမ်တွင် လာရောက်ဖမ်းဆီးခေါ်ဆောင်သွားပြီး ငွေကျပ်သိန်း (၂) ထောင် တောင်းခံလာကြောင်း စုံစမ်းသိရှိရသည်။
မတ်လ (၇) ရက် (၆) နာရီခွဲခန့်တွင် အသက် (၅၀) ကျော်အရွယ် ဦးဆမ်မောင် ၏ နေအိမ်မှာ လက်နက်ကိုင်တစ်စု က ရောက်လာပြီး စစ်ဆေးမေးမြန်းရန်ရှိသည်ဟု ပြောဆိုကာ ဖမ်းဆီးခေါ်ဆောင်သွားကြောင်း စုံစမ်းသိရှိရသည်။
“ဘယ်အဖွဲ့က လာဖမ်းသွားလဲဆိုတာ ကျနော်တို့မသိရဘူး။ လက်နက်အပြည့်နဲ့ သူတို့ (၄) ယောက်လာတယ်။ စစ်ဆေးမေးမြန်းစရာ ရှိတယ်ဆိုပြီး ကားနဲ့ လာခေါ်သွားတာ။ ငွေသား သိန်း (၂) ထောင်ကို ၂ ရက်အတွင်း မလာပေးရင် သတ်ပစ်မယ်လို့ပြောတယ်။ ဖုန်းဆက်လာတိုင်း ကျနော်တို့လည်း တောင်းပန်တယ်။ ငွေသိန်း (၂) ထောင်ဆိုတာ မတတ်နိုင်ဘူး” ဟု ဦးဆမ်မောင်၏ သားအကြီးဆုံးဖြစ်သူ စိုင်းဆိုင်လှိုင်း က သျှမ်းသံတော်ဆင့် ကိုပြောသည်။
ဖမ်းဆီးခေါ်ဆောင်သွားပြီး မေ (၉) ရက်မှာ ဦးဆမ်မောင်က ထွက်ပြေးလာနိုင်ခဲ့သော်လည်း ထိုဖမ်းဆီးသွားသည့် အဖွဲ့မှ မိသားစုထံ ငွေကြေးထပ်မံ တောင်းလာခဲ့သေးကြောင်း သားဖြစ်သူက ထပ်လောင်းပြောသည်။
“မန့်ဟိုင်းက ဆိုင်တစ်ခုမှာ ငွေသား သိန်း (၅၀) သွားထားခိုင်းတယ်။ကျနော်တို့လဲ သွားထားပေးတယ်။ ၁၀ ရက်နေ့ မနေ့ညတုန်းက ဖုန်းဆက်လာပြီးတော့ ပိုက်ဆံထပ်တောင်းလာတယ်။ သိန်း (၁)ထောင် လာပို့ခိုင်းတယ်။ မလာပို့ရင် မိသားစုတွေကိုပါ ဖမ်းမယ်လို့ ခြိမ်းခြောက်လာတာ။ ခုတော့ ကျနော်တို့ တစ်မိသားစုလုံး ထွက်ပြေးနေရတယ်။ကျနော်တို့ မိသားစုက ဘယ်အဖွဲ့မှလည်း မပတ်သက်ဘူး” ဟု သားဖြစ်သူ စိုင်းဆိုင်လှိုင်း က ဆိုသည်။
ဦးဆမ်မောင်ကို လာရောက်ဖမ်းဆီးသွားသည်မှာ မည်သည့် တိုင်းရင်းသား လက်နက်ကိုင်တပ်ဖွဲ့က ဖမ်းဆီးသွားခြင်း မသိရကြောင်း ဦးစံမောင် ကပြောသည်။
“တောထဲက ကျနော့်ကို သစ်ပင်အောက်မှာပဲ ထားတယ်။မိုးထဲ လေထဲ နေရတယ်။တောထဲ လက်ထိပ်ခတ်ထားပြီး ခွေးလို ဝက်လိုနေရတယ်။ ကျနော့်ကိုခေါ်သွားတာ ဘယ်အဖွဲ့လည်းဆိုတာ မသိရဘူး။ သူတို့မှာ လက်နက်ရှိတာပဲသိတယ်။ မေးခွန်းတွေ ပြန်မေးရင် ရိုက်တယ်။ မေးတာပဲဖြေရတယ်” ဟု ဦးဆမ်မောင် ကပြောသည်။
နမ့်ခမ်းမြို့နယ်သည် စစ်ကောင်စီအပြင် တိုင်းရင်းသားလက်နက်ကိုင် တပ်ဖွဲ့များဖြစ်ကြသော တအာင်း(ပလောင်) လွတ်မြောက်ရေးတပ်မတော် (TNLA)၊ ကချင်လွတ်မြောက်ရေးတပ်မတော် (KIA) ၊ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) ၊ ပြည်သူ့စစ်အဖွဲ့ နှင့် သျှမ်းမြောက် ပြည်သူ့လုံခြုံရေး နှင့် ကာကွယ်ရေးတပ်ဖွဲ့ တို့ လှုပ်ရှားရာ ဒေသဖြစ်သည်။
Leave a Comments