သျှမ်းပြည်နယ် မြောက်ပိုင်း မူဆယ်မြို့ရှိ သျှမ်း၊ ကချင်၊ တအာင်း(ပလောင်) စာပေ နှင့် ယဉ်ကျေးမှု မှ လူငယ် ၄၃ ဦးသည် သျှမ်းပြည်နယ် လွှတ်တော် ကို ပထမဆုံး အကြိမ် သွားရောက်လေ့လာခဲ့ကြကြောင်း သတင်းရရှိသည်။
သျှမ်းပြည်နယ် မူဆယ်မြို့ မဲဆန္ဒနယ် အမှတ်(၁) ပြည်နယ်လွှတ်တော် ကိုယ်စားလှယ် စိုင်းကျော်သိန်း နှင့် မူဆယ်မြို့ မဲဆန္ဒနယ် အမှတ်(၂) ပြည်နယ် လွှတ်တော် ကိုယ်စားလှယ် ဦးကိန်မိုင် ၏ ဖိတ်ကြားချက် အရ မူဆယ်မြို့ရှိ သျှမ်းလူငယ် ၁၅ ဦး၊ ကချင်လူငယ် ၁၄ ဦးနှင့် တအောင်း (ပလောင်)လူငယ် ၁၄ ဦး တို့ ဇွန်လ ၁၂ ရက်နေ့က သွားရောက်လေ့လာခဲ့ကြကြောင်း သိရသည်။
“ သျှမ်းပြည်နယ် လွှတ်တော် ထဲကို ဒါက ကျနော် အတွက် ပထမဆုံးအကြိမ်ပါ။ လွှတ်တော်ကိုယ်စားလှယ်တွေ လွှတ်တော်ထဲမှာ ဘယ်လိုတွေလုပ်ဆောင်နေကြတာတွေ လေ့လာခဲ့ရတယ်။ တရက်တည်း လေ့လာရတဲ့အတွက် သိပ် အားမရခဲ့ဘူး” ဟု မူဆယ်မြို့ သျှမ်းစာပေနှင့် ယဉ်ကျေးမှု မှ စိုင်းဆိုင်လှိုင်း က သျှမ်းသံတော်ဆင့် ကို ပြောသည်။
သျှမ်းပြည်နယ် လွှတ်တော် အတွင်း မေးမြန်းမှုတွေ ကိုလည်း မျက်မြင်တွေ့ရှိခဲ့ရကြောင်း၊ လူငယ်များအနေဖြင့် ပိုပြီး လာရောက်လေ့လာသင့်ကြောင်း ၄င်းက ဆိုသည်။
“ ကျနော် လွှတ်တော်ထဲမှာ ဘာမြင်ရလဲဆိုရင် သျှမ်းပြည်နယ် လွှတ်တော် ကိုယ်စားလှယ်တွေရဲ့ ကြယ်ပွင့်ပြ မေးခွန်းတွေ မှာ အများစုက လမ်းပန်းဆက်သွယ်ရေးနဲ့ ပတ်သတ်တဲ့ မေးခွန်းတွေဖြစ်တယ်။ ဒီမေးခွန်းကို ကြည့်လိုက်ရင် သျှမ်းပြည်နယ်တွင် လမ်းပန်း ဆက်သွယ်ရေး အလွန်လိုနေတာကိုတွေ့ရတယ်” ဟု စိုင်းဆိုင်လှိုင်းက ဆိုသည်။
ထို့ပြင် လမ်းပန်းဆက်သွယ်ရေး နှင့် ပတ်သတ်ပြီး လုပ်ပေးရန် အစီစဉ်မရှိသေးကြောင်း ဆိုသည့် အဖြေ များနေကြောင်း၊ ထိုအဖြေကို ကျေနပ်မှု သိပ်မရှိကြောင်းလည်း သျှမ်းလွှတ်တော်ကို သွားရောက်လေ့လာသည့် စိုင်းဆိုင်လှိုင်းက ပြောသည်။
လူငယ်များအနေဖြင့် သျှမ်းပြည်နယ် လွှတ်တော် ၊ ပြည်ထောင်စုလွှတ်တော် ကို သွားရောက်လေ့လာသင့်ကြောင်း၊ ထိုမှသာ ကိုယ့်ပြည်နယ် လိုအပ်ချက် နှင့် လွှတ်တော်ဆောင်ရွက်ချက်တွေကို ပိုမိုသိလာနိုင်သည် ဟု လည်း စိုင်းဆိုင်လှိုင်းက မှတ်ချက်ပြုလိုက်သည်။
အဆိုပါ မူဆယ် တိုင်းရင်းသားလူငယ်များသည် မိုင်းပွန်မြို့ရှိ မိုင်းပွန်စော်ဘွားကြီး စဝ်စံထွန်း ဟော်နန်း၊ ပင်လုံကျောက်တို်င်၊ပင်တယ တို့ကို ဆက်လက် ပြီးသွားရောက်လေ့လာ ကြမည် ဟု သိရသည်။
