သျှမ်းပြည် မြောက်ပိုင်း နမ့်ခမ်းမြို့ တွင် မိုး ရွာသွန်းသဖြင့် နမ့်ခမ်းမြို့ နယ် အတွင်း ရေကြီး ရေလျှံမှုများဖြစ်ပွားခဲ့ကြောင်း သတင်းရရှိသည်။
ယနေ့ နေ့လည် ၁ နာရီ ဝန်းကျင်တွင် မိုးရွာသွန်းမှုကြောင့် နမ့်ခမ်းမြို့ ဝိန်းကန် ကျေးရွာ ရှိလူနေအိမ်များ၊ လယ်ယာများ ထဲသို့ ရေများဝင်ရောက်ခြင်း၊နမ့်ခမ်းမြို့မ စျေးတွင်းသို့ ရေများဝင်ရောက်ခြင်း ဖြစ်ပွားခဲ့ကြောင်း နမ့်ခမ်းဒေသခံ စိုင်းခေး က သျှမ်းသံတော်ဆင့် သို့ ပြောသည်။
“ ဝိန်းကန် ကျေးရွာကတော့ ဒီနှစ်မှ နေအိမ်တွေ လယ်တွေ ထဲရေဝင်တာ။ နေ့လည်ဖြစ်လို့တော်သေးတယ်။ ညအချိန် ရေတွေ ဝင်ရင်တော့ အန္တရာယ်များနိုင်တယ်။ မိုးစရွာခါစ မှာ ရေတွေ ကြီးနေပြီ၊ မိုးများရင်တော့ ဒီထက် ရေကြီးနိုင်တယ်” ဟု စိုင်းခေး က ဆိုသည်။
နေအိမ်တွင်း ၊ လယ်ယာ အတွင်း သို့ ရေများ ဝင်ရောက်လာသည့် အတွက် ဒေသခံများအတွက် အခက်အခဲဖြစ်နေကြောင်း၊ လမ်းသွားလမ်းလာများအတွက်လည်း အထူးသတိထားရန် လိုအပ်ကြောင်း စိုင်းခေး က ပြောသည်။
ထိုနည်းတူ ယနေ့ နေ့လည် ပိုင်းတွင် မိုးရွာသွန်းမှုကြောင်း နမ့်ခမ်းမြို့မ စျေးအတွင်း ရေများလျှံကာ စျေးသည်များ အခက်ကြံုတွေ့နေရကြောင်း၊ မိုးရွာပါက ထိုသို့ရေကြီး ရေလျှံမှုဖြစ်ပွားလာသည်မှာ ၃ နှစ် ခန့်ရှိပြီဖြစ်ကြောင်း နမ့်ခမ်းစျေးသည် စိုင်းပန် က ပြောပြသည်။
“ မိုးရွာလိုက်တာနဲ့ စျေးထဲ တချို့ နေရာက ခြေမျက်စိ လောက်ရေ ကျော်တယ်။ တချို့နေရာ က ဒူးထိ ရောက်တယ်။ ရေမြောင်း အမှိုက်များလို့ပါ။ မိုးတွင်းရောက်ရင် ဆိုင်ခင်းမယ့် ခုံအောက်ခြေကို ကျောက်ခဲတွေ ခံရတယ်” ဟု စိုင်းပန် ကဆိုသည်။
နမ့်ခမ်းမြို့မစျေး ရှိ စျေးရေမြောင်းများကို စည်ပင် မှ အမှိုက်များဆယ်ခြင်း၊ ရေမြောင်းများ ရေသွားရေလာကောင်အောင် ပြုလုပ်ပေးခြင်း မရှိကြောင်းလည်း နမ့်ခမ်းဒေသခံများပြောပြချက် အရသိရသည်။
နမ့်ခမ်းမြို့မ စျေး ရေကြီးရေလျှံမှုကြောင်း စျေးသည်များ ၊ စျေးဝယ်သူများ အတွက် ခက်ခဲနေသဖြင့် သက်ဆိုင်ရာလာရောက်ဖြေရှင်းပေးရန် လည်း နမ့်ခမ်းဒေသခံများက တောင်းဆိုလိုက်သည်။
ယခုနှစ် မိုးဦးရာသီ ကာလ တွင် နမ့်ခမ်းမြို့တွင် မကြံုစဖူး နေအိမ်ထဲ သို့ ရေများဝင်ရောက်ခြင်း၊ လယ်ထဲ ရေများဝင်ရောက်ကာ လယ်ယာ ပျက်စီးခြင်းများဖြစ်ပွား ကြောင်း စိုင်းခေး ကပြောသည်။
နမ့်ခမ်းမြို့သည် တရုတ်နယ်စပ် ဒေသ တောင်ပေါ် မြို့ ဖြစ်သော်လည်း တောင်ပေါ် သစ်ပင်များ အလွန်အကျွံ ခုတ်ဖြတ်ခြင်း ၊ ကျောက်များ စည်းကမ်းမဲ့ တူးဖော်ခြင်း တို့ကြောင့် သဘာဝပတ်ဝန်းကျင် ထိခိုက်မှုများစတင်ခံစားနေရသည် ဟု နမ့်ခမ်းဒေသခံများ ပြောကြားချက် အရ သိရသည်။
