သျှမ်းပြည်မြောက်ပိုင်း နမ့်ခမ်းမြို့နယ်အတွင်း ကုမ္မဏီကြီး ၃ ခုမှ မာဘယ်ကျောက်များ ဒေသခံလူထုထံမှ ခွင့်ပြုချက်မရှိဘဲ တူးဖော်ကာ တရုတ်ဘက်ခြမ်းသို့ တင်ပို့နေသည့်အပေါ် အရေးယူပေးရန် နိုင်ငံတော်သမ္မတအား နမ့်ခမ်းဒေသခံလူထုကိုယ်စား အဖွဲ့အစည်း ၅ ခု ကစာရေးတင်ပြတောင်းဆိုလိုက်သည်။
နမ့်ခမ်းမြို့မြို့ဖများအဖွဲ့၊ ကျားဖြူပါတီ၊ UP လူမှုညီညွတ်ရေးအသင်း၊ရှေးဟောင်းအမွေအနှစ်နဲ့ သမိုင်းဝင်နေရာများကိုထိန်းသိမ်းကာကွယ်စောင့်ရှောက်ရေးအသင်း ၊မြို့နယ်တောင်သူလယ်သမားအဖွဲ့တို့စုပေါင်းစာရေးကာ နိုင်ငံတော်သမ္မတနှင့် သယံဇာတနှင့် သဘာဝပတ်ဝန်းကျင်ထိန်းသိမ်းရေးဆိုင်ရာကော်မတီ ထံ လိပ်မူကာ ဇွန်လ ၃ ရက်နေ့က ပေးပို့လိုက်သည်။
ရှေးဟောင်းအမွေအနှစ်နဲ့ သမိုင်းဝင်နေရာများကိုထိန်းသိမ်းကာကွယ်စောင့်ရှောက်ရေးအသင်း နမ့်ခမ်းမြို့နယ် ဥက္ကဌ ဆရာစိုင်းအောင်ဝင်းက – “ဒီကုမ္မဏီကြီး ၃ ခုကနေ ဟင်လုံအုပ်စုမှာ မာဘယ်ကျောက်တူးနေတာဟာ တူးခွင့်လိုင်စင်ရှိလားမရှိလားဆိုတာ ဒေသခံတွေက မသိရဘူး။ အခုလိုသူတို့ခိုးယူတူးဖော်တင်ပို့နေတာကို ဒေသခံတွေလည်းမလိုလားဘူး။ အခုက ဒီမိုကရေစီနိုင်ငံတော်သွားနေတဲ့ နေရာမှာ သူတို့တွေဟာ ဒေသခံရဲ့မှတ်ချက်သဘောထား ယူသင့်တယ်။ အခုက ဒေသခံသဘောထားမယူဘဲနဲ့ ပွင့်လင်းမြင်သာမှုမရှိဘဲနဲ့ ခိုးလုပ်နေတယ်။ အဲဒါဟာနိုင်ငံတော်ရဲ့ ဘဏ္ဍာကိုလည်းအလွန်ထိခိုက်စေတယ်ဆိုတာ အစိုးရကိုသိစေချင်တယ်။ ဒါကြောသင့် သမ္မတကြီးကိုလိပ်မူပြီး စာကို ဇွန်လ ၃ ရက်နေ့မှာ တင်လိုက်တယ်။ ” – ဟု သျှမ်းသံတော်ဆင့်အားပြောသည်။
ဟင်လုံအုပ်စုတွင် မာဘယ်ကျောက်များကိုအတုံးလိုက် အတုံးကြီးများဖြတ်ထားပြီး ၁၀ ဘီးကားကြီးဖြင့် တနေ့ ၅ စီးထက်မနည်း တရုတ်ပြည်သို့တင်ပို့နေသည်ဆိုသော ကုမ္မဏီ ၃ ခုမှာ မြန်မာ့မြှားဦးကုမ္မဏီ၊ တိုးပွါးအောင်ကုမ္မဏီ၊ နှင်းနှင်းခိုင်ကုမ္မဏီ တို့ဖြစ်ကြောင်း ရွာသားများပြောပြချက်အရသိရသည်။
“သူတို့ခိုးထုတ်နေတာကို ဒေသအာဏာပိုင်တွေက မသိတာလား၊ သိရက်နဲ့မသိချင်ယောင်ဆောင်နေလားမသိပါဘူး။ အရေးယူတာလည်းမရှိဘူး။” – ဟု ဟင်လုံအုပ်စုသားတဦးကလည်းပြောသည်။
၄င်းကုမ္မဏီသည် ၂၀၁၅ ခုနှစ်က မာဘယ်ကျောက်များကို နေပြည်တော်မှခွင့်ပြုချက်ဖြင့် စတင်တူးဖော်ခဲ့ကြခြင်းဖြစ်ကြောင်း၊ တူးဖော်စဉ်ကလည်း သဘာဝပတ်ဝန်းကျင်စစ်တမ်းကောက်ချက်များ မရှိခဲ့ကြောင်း၊ လက်ရှိတွင်လည်း မာဘယ်ကျောက် တူးဖော် သယ်ယူရာတွင် ရွှေလီမြစ်အတွင်းသို့ အညစ်အကြေး မြေစ ကျောက်စ များ ကျသဖြင့် မြစ်တိမ်ကောခြင်းဖြစ်စေနိုင်ကြောင်း၊ ထို့အပြင် လူထုအားထားရသော ရွှေလီမြစ်ရှိ မန့်တတ်ရေအားလျှပ်စစ်ကိုလည်း ထိခိုက်စေနိုင်ကြောင်း နမ့်ခမ်းမြို့နယ် စုပေါင်း လူထုအဖွဲ့အစည်းများက ထောက်ပြပြောဆိုသည်။
“မာဘယ်ကျောက်တွေကို သူတို့ကအတုံးလိုက်ဖြတ်ထားတယ်။ အတုံးက တော်တော်ကြီးပါတယ်။ ဆယ်ဘီးကားတစီး က တတုံးဘဲတင်နိုင်တယ် ။ ကားမောင်းတဲ့လူတွေလည်း ဗမာစကား သျှမ်းစကားမပြောတတ်ဘူး။ တရုတ်စကားတမျိုးတည်းသာပြောတတ်တဲ့ တရုတ်ဘက်ခြမ်းကလူတွေဖြစ်တယ်။ ကျောက်တင်ကားတွေဟာ မန့်ဝိန်းဂိတ်ကနေ တရုတ်ကို၀င်တာမဟုတ်ဘဲ နောင်နုတ် နောင်လူမ်ကျေးရွာဘက်ကနေ ခိုးဝင်တယ်လို့ရွာသားတွေပြောတယ်။ ရွာသားတွေကို ထိခိုက်စေမယ့်၊ သဘာဝပတ်ဝန်းကျင်ကိုထိခိုက်ပျက်စီးစေမယ့်စီမံကိန်းကြီးကို ရပ်တန့်ပိတ်သိမ်းသွားသည်အထိ ကျနော်တို့က လူထုဘက်ကနေရပ်တည်ပြီးတော့မှ ကာကွယ် သွားမယ် ဆန့်ကျင်ကန့်ကွက်သွားမှာဖြစ်ပါတယ်။”- ဟု ဆရာစိုင်းအောင်ဝင်းကပြောသည်။
မာဘယ်ကျောက်များတူးဖော်သည့်လုပ်ကွက်သည် ကျေးရွာ ၃-၄ ရွာ ၊ လူဦးရေ ၃၀၀ ကျော်ရှိ ဟင်လုံအုပ်စုအတွင်းတည်ရှိပါသည်။ နမ့်ခမ်းမြို့အနောက်ဘက် ၅ မိုင်ခန့်အကွာတွင်တည်ရှိပြီး သျှမ်း-ကချင်ဆက်သွယ်သည့်ပြည်ထောင်စုလမ်းမ တွင်တည်ရှိပါသည်။
