သျှမ်းပြည် အရှေ့ပိုင်း တာချီလိတ်မြို့နယ် မဲခေါင်ရပ်ကွက် ရှိ “ နန်းနန်းဘွန်းကျောက်” ရွှေဆိုင်သည် ဇွန်လ ၃ ရက်နေ့ မွန်းလွှဲ ၂ နာရီတွင် အနုကြမ်းစီး တိုက်ခံရကြောင်း သတင်းရရှိသည်။
ဖြစ်စဉ်မှာ ယမန်နေ့ မွန်းလွှဲပိုင်း ၂ နာရီ ၄၅ မိနစ်တွင် ဆိုင်ရှင် ဦးအိုက်ဘွန်း ၏ အဒေါ် ဖြစ်သူ ဒေါ်နန်းမိုး နှင့် အရောင်းဝန်ထမ်းများ ဆိုင်အတွင်းရှိနေစဉ်တွင် မျက်နှာဖုံးစွပ် ထားသည့် အမျိုးသား ၂ ဦး ဆိုင်ထဲသို့ ဝင်လာကာ သေနတ်ဖြင့် ချိန်ရွယ်ပြီး ခြိမ်းခြောက်ကာ ရွှေထည်များ ယူဆောင်သွားကြောင်း တာချီလိတ်မြို့မ ရဲစခန်းမှ တာဝန်ရှိသူက ပြောသည်။
“ မျက်နှာဖုံး စွပ်ပြီး ဆိုင်ကယ်စီးလာတဲ့ အမျိုးသား ၂ ဦးပါ။တဦးကတော့ သေနတ်အတို (၁)လက်ကိုင်ဆောင်ထားတယ်။တယောက်ကတော့ သံတူ (၁)ချောင်းကိုင်တယ်။ ၂ယောက်ကတော့ ဆိုင်ထဲဝင်လာပြီး သေနတ်နဲ့ ချိန်တယ်။ ခြိမ်းခြောက်ပြီး ပစ္စည်းတွေ ယူသွားတယ်” ဟု ၎င်း က ဆိုသည်။
အမျိုးသား ဓါးပြ ၂ ဦးသည် မဲခေါင်ရပ်ကွက်ရှိ “ နန်းနန်းဘွန်းကျောက်” ရွှေဆိုင် ( အမှတ် (၂) ) အတွင်း ရွှေဆွဲကြိုး ၁၃၀ ကုံး၊ ဟန်းချိန်း ၁၆ ခု၊ စုစုပေါင်း တန်ဖိုး ငွေကျပ် (၂၄၉,၄၁၀,၀၀၀) တန်ဖိုးရှိ ရွှေထည်ပစ္စည်းတို့အား လုယက်ယူဆောင်သွားခဲ့ကြောင်း သိရသည်။
အဆိုပါ ကိစ္စနှင့် ပတ်သတ်ပြီး ရွှေဆိုင်ပိုင်ရှင် ဦးအိုက်ဘွန်း မှ ဓားမြတိုက်သည့် အမျိုးသား ၂ဦး (စိစစ်ဆဲ)အား တာချီလိတ်မြို့မရဲစခန်း(ပ)၂၉၉/၂၀၁၉၊ ရာဇသတ်ကြီး ပုဒ်မ ၃၉၂ ဖြင့် အမှုဖွင့်ထားကာ တရားခံများအား ဖော်ထုတ်ဖမ်းဆီးနိုင်ရေး ဆောင်ရွက်နေကြောင်း တာချီလိတ်မြို့ ရဲစခန်းမှ သိရသည်။
တာချီလိတ်တွင် မကြာခဏ အနုကြမ်းစီးမှု နှင့် လမ်းမပေါ်တွင် သေနတ်ပစ်ခတ်မှုများဖြစ်ပွားသဖြင့် တာချီလိတ်ဒေသခံများအတွက် လုံခြုံရေး မှာ စိုးရိမ်နေရသည်။
ထိုနည်းတူ ဆန်ဆိုင်း(က) ရပ်ကွက် ဗိုလ်ချုပ် လမ်းမကြီးဘေးရှိ “ နန်းနန်းဘွန်းကျောက်” ရွှေဆိုင် (အမှတ် ၁ ရွှေဆိုင်) ကိုလည်း ပြီးခဲ့သည့် မတ် ၂၉ ရက်နေ့တွင် လက်နက်ကိုင် ထားသည့် အမျိုးသား ၆ ဦး က ဝင်ရောက် အနုကြမ်းပြီး ရွှေ (၈၀) ကျပ််သားဝန်ကျင်၊ စိန်ထည် ပစ္စည်း ဘတ်သိန်း(၂၀) ဖိုး၊ ထိုင်းဘတ် ငွေ သိန်း (၂၀)နှင့် လက်ကိုင်ဖုန်း (၇) လုံးတို့ ယူဆောင်သွားခဲ့သည်။
လွန်ခဲ့သည့် မတ် ၂၉ ရက်နေ့ က “ နန်းနန်းဘွန်းကျောက် ” ရွှေဆိုင် အနုကြမ်းစီးမှုတွင် ပါဝင်သူ နှင့် ဆက်စပ်သည်ဟု ယူဆသူ (၃) ဦးကို ရဲများကဖမ်းဆီးထားပြီး၊ ထိုထဲတွင် ထိုင်းနိုင်ငံသား တဦး ပါဝင်နေကြောင်းသိရသည်။
