သျှမ်းပြည် လွိုင်လင်မြို့နယ် ပင်လုံမြို့ရှိ ဈေးအတွင်းဖွင့်လှစ်ထားသော “မခင်ဦး”ရွှေဆိုင် ဓားပြတိုက်ခံရကြောင်း စုံစမ်းသိရသည်။
ယနေ့ (ဇန်နဝါရီလ ၈ ရက်) နေ့လယ် ၁၂ နာရီကျော်ခန့်က ပင်လုံမြို့ ဈေးအနောက်ဘက်တွင် ဖွင့်လှစ်ထားသော “မခင်ဦး” ရွှေဆိုင်ကို အမည်မသိ အမျိုးသားတစ်ဦးက သေနတ်ပြ ခြိမ်းခြောက်ပြီး လက်စွပ်နှင့်ရွှေဆွဲကြိုး ၃ ကျပ်သားကျော်ကို ဓားပြတိုက်လုယူသွားကြောင်း ပင်လုံမြို့ဒေသခံများက ပြောသည်။
“ဆိုင်ရှင်အမျိုးသားက အသုဘ သွားနေတဲ့အချိန် သူ့အမျိုးသမီးပဲ ဆိုင်စောင့်ကျန်ခဲ့တော့ မျက်စိမျက်နှာ အုပ်ထားတဲ့ လူစိမ်းတစ်ယောက် ရောက်လာပြီး လက်စွပ်နဲ့ ရွှေဆွဲကြိုး ၃ ကျပ်သားကျော် လုယူသွားတယ်။ သူက သေနတ်လဲပါတော့ ဆိုင်ရှင်ကလည်း ကြောက်တော့ ဘာမှ ပြန်မလုပ်ရဲဘူး။ ဒီနေ့က ဈေးထဲမှာလည်း လူပါးတယ်လေ။ အခု ဝန်တင်တပ်နဲ့ ပြည်သူ့စစ်တွေ ဈေးနားမှာ လာစစ်နေတယ်”ဟု ပင်လုံမြို့မှ ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ပင်လုံဈေးအတွင်း ရွှေဆိုင်ဓားပြတိုက်ခံရသည့် ယခုဖြစ်စဉ်ကြောင့် ဈေးသူဈေးသားများမှာ စိုးရိမ်ကြောက်လန့်ပြီး အချို့မှာ ဆိုင်ပိတ်သိမ်းလိုက်ကြောင်း ပင်လုံမြို့မှ ၎င်းအမျိုးသားက ဆက်ပြောသည်။
လက်ရှိအချိန်ထိ ပြစ်မှုကျူးလွန်သည့် အမျိုးသားကို ဖမ်းဆီးရမိခြင်း မရှိသေးဘဲ ထွက်ပြေးလွတ်မြောက်နေဆဲဖြစ်ကြောင်း သိရသည်။
ပြီးခဲ့သည့် ဇန်နဝါရီလ ၃ ရက်က လဲချားမြို့ရှိ ဈေးအရှေ့ဘက်တွင် ဖွင့်လှစ်ထားသော “ခမ်းလီ”ရွှေဆိုင်ကို အမည်မသိ အမျိုးသားတစ်ဦးက သေနတ်ဖြင့်ခြိမ်းခြောက်ပြီး ဆိုင်အတွင်းရှိ ရွှေ ၃ ကျပ်သားခန့်နှင့် ငွေသားများကို ဓားပြတိုက် လုယူသွားကြောင်း လဲချားမြို့ ဒေသခံများက ပြောသည်။
ထို့အပြင် ဒီဇင်ဘာလ (၂၇) ရက်ကလည်း လွိုင်လင်မြို့နယ် ပင်လုံမြို့ရှိ စျေးအရှေ့ဘက်တွင် ဖွင့်လှစ်ထားသော လျှပ်စစ်ပစ္စည်းနှင့် ဖုန်းအပိုပစ္စည်းအရောင်းဆိုင်ကို အမည်မသိ လူတစ်စုက သေနတ်ဖြင့် ဝင်ရောက်ပစ်ခတ်ခဲ့ရာ ဆိုင်ရှင်အပါအဝင် (၄) ဦး ပွဲချင်းပြီး သေဆုံးသွားခဲ့ကြောင်း ပင်လုံမြို့ဒေသခံများက ပြောသည်။
လားရှိုးမြို့နယ်ရှိ ရွှေဆိုင်များလည်း နိုင်ငံရေးနှင့် ရွှေဈေးမတည်ငြိမ်မှုတို့အပြင် ခြိမ်းခြောက်ဓားပြတိုက်မှုများလည်း ပေါများလာခြင်းကြောင့် ဇန်နဝါရီ လဆန်းပိုင်းမှ စတင်၍ ရွှေဆိုင်များကို ပိတ်သိမ်းထားခဲ့ကြောင်း ရွှေလုပ်ငန်းအသိုင်းအဝိုင်းများထံမှ သိရသည်။
