သျှမ်းပြည် သီပေါမြို့ ဈေးအရှေ့ဘက်ရှိ ရွှေရတနာဆိုင်တစ်ခုသည် ယနေ့ (စက်တင်ဘာလ ၆ ) ရက် နံနက်အစောပိုင်းက ဓားပြတိုက်ခံရပြီး ရွှေ ၃ ကျပ်သားခန့်ပါသွားကြောင်း သတင်း သိရှိရသည်။
.
ယနေ့ (စက်တင်ဘာလ ၆) ရက် နံနက် ၇ နာရီခွဲအချိန်တွင် သီပေါ မြို့မဈေးအရှေ့ဘက်ရှိ ရွှေရတနာဆိုင်ကို ဆိုင်ကယ်တစ်စီး နှင့် အမည်မသိ မျက်နှာဖုံးစွပ်ထားသည့် အမျိုးသားနှစ်ဦးက သေနတ်ကို မိုးပေါ်ပစ်ဖောက် ခြိမ်းခြောက်ပြီး ရွှေတန်ဖိုး စုစုပေါင်း ၃ ကျပ်သားခန့်ကို ဓားပြတိုက် ယူဆောင်သွားခဲ့သည်။
“ဒီနေ့ မနက် ၇ နာရီခွဲလောက်က လာတိုက်သွားတာ။ ဦးထုပ်ဆောင်းပြီး မျက်နှာဖုံးစွပ်တော့ ဘယ်သူဖြစ်မှန်း မသိဘူး။ ဆိုင်ကယ် နဲ့ နှစ်ယောက်စီးလာတယ် “ ဟု ရွှေရတနာဆိုင်ပိုင်ရှင်ဖြစ်သူ အမျိုးသမီးတစ်ဦးက ပြောသည်။
အဆိုပါ ဓားပြတိုက်ခံရပြီးနောက် ဓားပြတိုက်သူ အမျိုးသားနှစ်ဦး ထွက်ပြေးလွတ်မြောက်သွားပြီး ရဲတပ်ဖွဲ့များက ရောက်ရှိလာကာ စစ်ဆေးမေးမြန်းမှု ပြုလုပ်နေကြောင်း သိရသည်။
လက်ရှိ ပြင်ပ ခေါက်ရွှေ ပေါက်ဈေးသည် ၁ ကျပ်သားကို ၃၇ သိန်းကျော်အထိ ရှိနေပြီး အဆိုပါ ဓားပြတိုက်ခံရ၍ ပါသွားသည့် ရွှေတန်ဖိုး စုစုပေါင်း ၃ ကျပ်သားမှာတော့ ကျပ်ငွေ သိန်း ၁၀၀ ကျော် တန်ဖိုးရှိကြောင်း ဒေသခံများ၏ ပြောပြချက်အရ သိရသည်။
“အခုက ရှာစားရတာ ခက်တယ်လေ။ မူးယစ်ဆေးဝါး လုပ်တဲ့သူတွေကလည်း ပိုက်ဆံရှိတာနဲ့ သေနတ်ကို လွယ်လွယ် ရနေတယ်။ အဲ့လို သေနတ်ကို လွယ်လွယ်ဝယ်လို့ရနေတော့ ဒီလို သေနတ်ပြပြီး ဓားပြတိုက်တာက ပိုများလာတာ။ ပြည်သူတွေအတွက်တော့ လုံခြုံရေး မရှိတော့ဘူးပေါ့ “ဟု အသက် ၄၀ နှစ်အရွယ် ဒေသခံ အမျိုးသား တစ်ဦးကပြောသည်။
ပြီးခဲ့သည့် ဖေဖော်ဝါရီ ၂၁ ရက်တွင်လည်း သီပေါမြို့ ရီရှင်းရွှေဆိုင် ပိုင်ရှင် မိသားစုဝင် (၃) ဦး အိမ်အပြန် ဓားပြတိုက်ခံရပြီး ရွှေ ၆ ပိသာကျော် ပါသွားကာ ယခုနှစ်အတွင်း သီပေါမြို့ ရွှေအရောင်းဆိုင်များသည် နှစ်ကြိမ် ဓားပြတိုက်ခံနေရပြီဖြစ်ကြောင်း သိရသည်။
