ထိုင်းနိုင်ငံ သို့ တရားမဝင် ၀င်ရောက် အလုပ်လုပ်သူများတွင် အသက်မပြည့်သေးသည့် ကလေးငယ်များ ပါဝင်နေကြောင်း သိရသည်။

မေ လ အတွင်း အသက်မပြည့်ဘဲ ထိုင်းနိုင်ငံသို့ တရားမဝင် ၀င်ရောက်သည့် ကလေးငယ် ၁၀ ဦးကျော် ဖမ်းဆီးရမိသည်ဟု ကူညီဆောင်ရွက်ပေးသူများ ပြောကြားချက် အရ သိရသည်။

မေလ ၁၇ ရက်နေ့က ထိုင်းနိုင်ငံ လမ်းပွန်းခရိုင်တွင် တရားမဝင် ၀င်ရောက်သည့် အသက် ၁၈ နှစ်အောက် ယောကျင်္ားလေး ၂ ဦး၊ မိန်းကလေးငယ် ၆ ဦး ဖမ်းဆီးရမိခဲ့ပြီး၊ မေလလယ်တွင်လည်း ချင်းမိုင်မြို့တွင် အသက်မပြည့်သည့် ယောင်္ကျားလေး ၂ ဦး၊ မိန်းကလေးငယ် ၁ ဦးကိုလည်း ဖမ်းဆီးရမိခဲ့သည်။

“ မေ ၁၇ ရက်က မယ်ဆိုင်ကနေ ၁၄ ယောက်လာတယ်။ ဘန်ကောက်ကို သွားအလုပ်လုပ်ဖို့ပြောတယ်။ လမ်းမှာ ဖမ်းမိတာ အဲ့ထဲမှာ အသက်မပြည့်တာ ၈ ဦးပါတယ်။ ကလေးတွေ များတော့ ခေါ်စစ်ပြီး မြန်မာပြည် ပြန်ပို့လိုက်တယ်။” ဟု ဘာသာပြန်လိုက်ကူလုပ်ပေးသည့် စိုင်းတိုင်း က ပြောပြသည်။

အဆိုပါ အဖမ်းခံရသူများသည် ထိုင်းနိုင်ငံ ဘန်ကောက်တွင် အလုပ်သွားလုပ်မည့် သူများဖြစ်ပြီး၊ ဖမ်းခံရသည့် အများစုသည် သျှမ်းပြည်နယ် မှ ကလေးငယ်များဖြစ်ကြောင်း၊ လက်ရှိတွင် မြန်မာပြည်သို့ပြန်လည်ပို့ဆောင်ပေးလိုက်ကြောင်း၊ ကလေးငယ်များကို ထိုင်းနိုင်ငံသို့ ခေါ်ဆောင်လာသည့် ကားသမားတဦး ကိုသာ ဖမ်းဆီး စစ်ဆေးနေကြောင်း လည်း စိုင်းတိုင်း က ပြောပြသည်။

“ မေ ၂၃ ရက်နေ့ က ကျမ တရားမဝင်တဲ့ မြန်မာနိုင်ငံသား ၁၃ ယောက် ကို သွားဘာသာပြန်ပေးတယ်။ အဲ့ထဲမှာ အသက်မပြည့်တဲ့ ကလေး ၃ ယောက်ပါတယ်။ အသက်က ၁၆ ၊ ၁၇ နှစ်တွေပါ။ အဲ့သူတွေက ပတ္တရား ဘက်ကနေ ချင်းမိုင် ကို ပြောင်းလာတာ” ဟု လိုက်လံ ကူညီပေးသည့် အမျိုးသမီး တဦး ကပြောသည်။

ယခုနောက်ပိုင်း ထိုင်းနိုင်ငံကို တရားမဝင် လာပြီး အလုပ်လုပ်ကာ ဖမ်းဆီးခံရသူ များသည် သျှမ်းပြည်တောင်ပိုင်း မှာလာကြသည့်သူများဖြစ်ကြသည် ဟုလည်း ၎င်း က ပြောသည်။

သျှမ်းပြည်နယ် တွင် အလုပ်အကိုင် ရှားပါးမှု ၊ မကြာခဏ တိုက်ပွဲများ ဖြစ်ပွားမှုကြောင့် နေရာရွှေ့ပြောင်းနေရမှုများနှင့် လယ်ယာမြေများ သိမ်းဆည်းခံရမှု တို့ကြောင့် နယ်စပ်ဒေသသို့ စွန့်ခွာ အလုပ်လုပ်နေကြရကြောင်း သိရသည်။

ထိုင်းနိုင်ငံ ချင်းမိုင် တွင် ယခု မေလ အတွင်း တရားမဝင် ရွှေ့ပြောင်းအလုပ်သမား ၃၀ ခန့် ဖမ်းဆီးရမိကြောင်း သိရသည်။