ထိုင်း ရောက် သျှမ်းရွှေ့ပြောင်းအလုပ်သမား၏ ကလေး ထိုင်းကျောင်းသားများကိုယ်စားပြုကာ အမေရိကန်တွင် သိပ္ပံဆိုင်ရာပြိုင်ပွဲဝင် ဆုများဆွတ်ခူးရရှိ

0

မေလ ၁၂ ရက်မှ ၁၇ ရက်နေ့အထိ အမေရိကန်နိုင်ငံ အရီဇိုးနားပြည်နယ် ဖီးနစ်မြို့တွင်ကျင်းပသော Intel ISEF 2019 ၏ Science Project Competition ပြိုင်ပွဲသို့ ထိုင်းနိုင်ငံ ချင်းရိုင်းခရိုင် ချင်းရိုင်းမြို့ရှိ ဒမ်းရုန်းရတ်ဆုံခရော့ အထက်တန်းကျောင်းမှ ကျောင်းဆရာနှင့်ကျောင်းသားလူငယ်လေးများလည်း ၀င်ရောက်ယှဉ်ပြိုင်ရာ သျှမ်းရွှေ့ပြောင်းအလုပ်သမား၏ သမီးဖြစ်သော နောင့်နမ့်ဖိန့် ပန်းယားနှင့်အဖွဲ့က ဆုဆွတ်ခူးရရှိခဲ့ကြောင်းသိရသည်။

Photo Credit to MGR- အမေရိကန်နိုင်ငံ Intel ISEF 2019 ၏ Science Project Competition ပြိုင်ပွဲမှဆုရရှိလာသော သျှမ်းလူမျိုး ထိုင်းကျောင်းသူလေး နောင့်နမ့်ဖိန့် ပန်းယား နှင့်အဖွဲ့

မျိုးစပါးစိုထိုင်းဆ အား သဘာဝသစ်စေးဖြင့်ထိန်းသိမ်းခြင်း (โครงงานการพัฒนาสารเคลือบเมล็ดพันธุ์อุ้มน้ำจากยางไม้ในท้องถิ่น) ဟူသည့် ပြိုင်ပွဲမှ Special Award ရရှိခဲ့သည့်အပြင် USAID from the American People အဖွဲ့မှလည်း ဆုငွေ ဒေါ်လာ ၃၀၀၀ တိတိချီးမြှင့်ခဲ့ကြောင်းသိရသည်။

ထိုင်းနိုင်ငံတွင် ပညာသင်ကြားနေသော ကျောင်းသူဖြစ်သော်လည်း ရွှေ့ပြောင်းအလုပ်သမား၏ သားသမီးဖြစ်ပြီး နိုင်ငံမဲ့ လူထုအနေဖြင့်သာထိုင်းအစိုးရထားရှိသဖြင့် ထိုင်းနိုင်ငံကိုယ်စားပြုကာ ပြည်ပနိုင်ငံသို့သွားရောက်ယှဉ်ပြိုင်ခွင့်ရရှိရေး အထူးနိုင်ငံကူးလက်မှတ် ထိုင်းမှထုတ်ပေးသော်လည်း အမေရိကန်သံရုံးမှ ငြင်းပယ်ခဲ့သည်။ သို့သော် ကျောင်းသူလေးမှာ အရည်အချင်းပြည့်မှီနေသဖြင့် ထိုင်းနိုင်ငံအစိုးရက ထိုင်းနိုင်ငံဥပဒေအတိုင်း ထိုင်းနိုင်ငံအတွင်းမွေးဖွားသောအထောက်အထားပြည့်စုံသည့်သူမ အား ထိုင်းနိုင်ငံသားမှတ်ပုံတင် ထုတ်ပေးကာ ထိုင်းကျောင်းသားကိုယ်စားပြုအနေဖြင့် သွားရောက်ယှဉ်ပြိုင်စေခဲ့သည်။

နောင့်နမ့်ဖိန် သည် သျှမ်းရွှေ့ပြောင်းအလုပ်သမား နန်းကိန် ဆိုသူ၏ သမီးဖြစ်ပြီး ထိုင်းနိုင်ငံတွင်ပင်မွေးဖွားကာ လက်ရှိတွင် (မြန်မာနိုင်ငံပညာရေး ၁၀ တန်းနှင့်အဆင့်တူသော) ထိုင်းပညာရေးကျောင်းမှ မော ၆ တက္ကသိုလ်ဝင်တန်း တက်နေသောကျောင်းသူဖြစ်သည်။

နောင့်နမ့်ဖိန် ကဲ့သို့သော အလားတူဖြစ်ရပ်မျိုး ထိုင်းနိုင်ငံတောင်ပိုင်း ရနောင်းမြို့မှ မြန်မာရွှေ့ပြောင်းအလုပ်သမား မိဘမှ ဖွားမြင်သော ကျောင်းသူလေး ယွန်းရတီသည်လည်းလာမည့် ဇွန်လအတွင်း အမေရိကန်နိုင်ငံသို့ Genius Olympaid in New York ပြိုင်ပွဲ ၀င်ရောက်ယှဉ်ပြိုင်နိုင်ရန် ထိုင်းအစိုးရက ထိုင်းနိုင်ငံသားမှတ်ပုံတင် ယခုလ ဆန်းကပင် ထုတ်ပေးလိုက်သည်။

ဢုပ်ႇဢူဝ်း ၽူႈတွႆႇႁွၵ်ႈ

SHARE