သျှမ်းပြည်မြောက်ပိုင်း နမ္မတူမြို့နယ်အတွင်းရှိ မန်စံအုပ်စု မိုင်းမုရွာတွင် ဒေသခံလယ်သမားတဦး လယ်ယာအသွားလမ်းတွင် မိုင်းနင်းမိသဖြင့် ဒဏ်ရာအပြင်းအထန်ရရှိကာ လားရှိုးဆေးရုံအပို့ လမ်းတွင်သေဆုံးသွားခဲ့သည်။
မေလ ၂၀ ရက်နေ့က မိုင်းမု ရွာသား လုံးဆန်ကျန် အသက် ၅၀ နှစ်သည် မိုင်းမုရွာအနောက်ဘက်ရှိ တောင်ကြောပေါ်ရှိ ယာခင်းသို့အသွား လမ်းတွင် မိုင်းနင်းမိ ပေါက်ကွဲသဖြင့် ခြေထောက်၊ ဗိုက်၊ လက်၊ မျက်နှာတို့တွင် ထိမှန်ဒဏ်ရာရရှိကာ လားရှိုးဆေးရုံအပို့လမ်းတွင်သေဆုံးသွားခဲ့ခြင်းဖြစ်သည်။
“မိုင်းပေါက်ကွဲပြီးပြီးချင်း သူ့ကို နွံစမ်ဟွမ် လူမှုကူညီရေးအဖွဲ့ကားနဲ့ လားရှိုးဆေးရုံပို့ပါတယ်။ ဒါမယ့်မိုင်းမုရွာအလွန် နားကေးရွာနားမှာ သူဆုံးသွားတယ်။ ဆုံးသွားတော့ မိုင်းမုကိုပြန်သယ်လာပြီးတော့ အဲ့နေ့မှာဘဲ မီးသဂြိုဟ်လိုက်တယ်။ ” – ဟု မိုင်းမုတွင် လူမှုကူညီရေးလှုပ်ရှားနေသည့်လူငယ်နန်းယိင်း ကပြောသည်။
လုံးဆန်ကျန်မိုင်းနင်းမိသော တောင်ကြောသည် မတ်လက မြောက်ပိုင်းမဟာမိတ်တပ်ဖွဲ့များနှင့် RCSS ၊ အစိုးရတပ်မတော်တို့ကြားတိုက်ပွဲများဖြစ်ပွါးသည့် လွယ်ဟန်းဘက်အသွားလမ်းတွင်တည်ရှိပါသည်။အဆိုပါ တောင်ကြောသည် လက်နက်ကိုင်တပ်ဖွဲ့များ လှုပ်ရှားသွားလာ နားခိုသည့်နေရာဖြစ်ကြောင်း မိုင်းမုဒေသခံများပြောပြချက်အရသိရသည်။ ထို့အတွက်ကြောင့်အဆိုပါ နင်းမိသောမိုင်းသည်မည်သည့်အဖွဲ့ထောင်ထားသည့်မိုင်း လည်းမသိရပေ။
မန်စံဒေသခံ ပါ့နန်းက -“ မနှစ်ကလည်း တနှစ်ပတ်လုံးတိုက်ပွဲတွေဖြစ်ခဲ့တယ်။ အခုလည်း ကျမတို့ရွာသူရွာသားတွေ လယ်ယာသွားဖို့ လုံခြုံဘေးကင်းမှုမရှိဘူး။ မိုင်းတွေအရမ်းများနေတယ်။ သက်ဆိုင်ရာကနေ လာပြီး သိမ်းပေးပါကြပါလို့ တောင်းဆိုချင်ပါတယ်။” – ဟုလည်းသျှမ်းသံတော်ဆင့်အားပြောသည်။
မိုင်းနင်းမိသေဆုံးသော လုံးဆန်ကျန်သည် မိုင်းမုတွင်အိမ်ထောင်ကျသည့်လားရှိုးဒေသခံဖြစ်ကြောင်းသိရသည်။
Leave a Comments