Sunday, July 14, 2024

တိုက်ပွဲပြင်းထန်ဖြစ်ပွါးခဲ့သော သီပေါမြို့နယ်တွန်ကျိုင်းရွာတွင် ဒေသခံလယ်ယာသမားတဦး မိုင်းနင်းမိဒဏ်ရာရ

Must read

သျှမ်းပြည်မြောက်ပိုင်း သီပေါမြို့နယ်ရှိ မတ်လအတွင်းကတိုက်ပွဲပြင်းထန်ခဲ့သော နားမခေါ်အုပ်စု တွန်ကျိုင်းရွာတွင် ရွာသားတဦး လယ်ယာလုပ်ငန်းခွင်ဝင်ရာ မိုင်းပေါက်ကွဲထိမိဒဏ်ရာရရှိခဲ့ကြောင်းသိရသည်။

Photo by Shar Htat Paing-မိုင်းထိမှန်သည့် စိုင်းအဲန် အသက် ၁၉ နှစ်

မေလ ၂၀ ရက်က တွန်ကျိုင်းရွာသား စိုင်းအဲန် အသက် ၁၉ နှစ်သည် တွန်ကျိုင်းရွာအနောက်ဘက်ရှိ ၄င်း၏ လယ်ယာအတွင်း လုပ်ငန်းခွင်ဝင်နေစဉ် မိုင်းနင်းမိသဖြင့် ထိမှန်ဒဏ်ရာရရှိခဲ့ရာ သီပေါဆေးရုံသို့ပို့ဆောင်ဆေးကုခဲ့ရကြောင်းသိရသည်။

သီပေါမြို့နယ် SNLD ပါတီဝင်တဦးက-” ခြေထောက်၊ ကျော နဲ့ ပေါင်တွေမှာ ထိမှန်ဒဏ်ရာရတယ်။ ခုတော့ သီပေါဆေးရုံမှာ။ စိုးရိမ်ရတဲ့အနေအထားတော့မဟုတ်ပါဘူး။ ပရဟိတအဖွဲ့တွေ ၊ ကျားခေါင်းပါတီတွေ သွားရောက်ကြည့်ရှုပြီး ကူညီထောက်ပ့ံမှုတွေ ပေးပါတယ်။” – ဟု သျှမ်းသံတော်ဆင့်အားပြောသည်။

မိုင်းထိမှန်သည့် စိုင်းအဲန် အသက် ၁၉ နှစ်သည် ခိုင်းဟျိုးရွာသား လုံးစိုင်းပန် ၏ သားဖြစ်ပြီး တွန်ကျိုင်းရွာသူ နန်းဆိုင်မွမ်းနှင့်အိမ်ထောင်ပြုကာ တွန်ကျိုင်းရွာတွင်နေထိုင်ပါသည်။

နားမခေါ်ဒေသခံတဦးကလည်း-” ဘယ်အဖွဲ့ရဲ့မိုင်းလည်းတော့မသိဘူး။ သူတို့ပြန်ဖြုတ်သွားဖို့မေ့တာလား သို့မဟုတ် တမင်တကာမဖြုတ်ဘဲထားတာလားတော့မသိဘူး။ ဒီနှစ်ဆန်းက ကျနော်တို့ သျှမ်းတပ် ၂ ဖွဲ့က လှုပ်ရှားသွားလာတယ် ပစ်ခတ်တိုက်ခိုက်တယ်လေဒီဒေသမှ ာ “– ဟု သျှမ်းသံတော်ဆင့်အားပြောသည်။

၄င်းတို့ကြားပြင်းထန်သည့်တိုက်ပွဲများကြောင့်ဒေသခံလူထုထောင်နှင့်ချီနေရပ်မှ စွန့်ခွါထွက်ပြေးခဲ့ရသည်။ လက်ရှိတွင် သျှမ်းတပ် ၂ ဖွဲ့လုံး အပစ်ရပ်ရေး ၂ ဦးသဘောတူပူးပေါင်းကြေငြာချက်ထုတ်ပြန်ပြီး ၂ ဖက်တပ်များလည်း အဆိုပါဒေသမှ ဆုတ်ခွါနေကြောင်းသိရသည်။ သို့သော် မိုင်းများရှိနေသေးသဖြင့် မိမိမိုင်းများပြန်လည်ဖြုတ်သိမ်းပေးရန်ဒေသခံများက တောင်းဆိုနေကြပါသည်။

Leave a Comments

- Advertisement -spot_img

Latest article