ငြိမ်းချမ်းရေး လုပ်ငန်းစဉ်တွင် ကြုံတွေ့နေရသည့် တစ်ဆို့မှု အဖြေနှင့် ဖက်ဒရယ်မူကို အခြေခံအရယူနိုင်ရေး အတွက် ဘုံသဘောတူညီမှု ရခဲ့ကြောင်း ချင်းမိုင် ထိပ်သီးညီလာခံတွင် ဆုံးဖြတ်ခဲ့သည်။
တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ် ( NCA ) လက်မှတ်ရေးထိုးထားသည့် တိုင်းရင်းသား လက်နက်ကိုင် အဖွဲ့ များ၏ ၄ ကြိမ်မြောက် ထိပ်သီးခေါင်းဆောင်များညီလာခံအားမေလ ၁၄ ရက်နေ့မှ ၁၈ ရက်နေ့ထိ ချင်းမိုင်မြို့ Khun Phu Come ဟိုတယ်တွင် ပြုလုပ်ခဲ့သည်။
“ အဓိက ငြိမ်းချမ်းရေး တစ်ဆို့မှုကို ဖြတ်ကျော်နိုင်ဖို့ နည်းလမ်း နဲ့ ဖက်ဒရယ်မူကို အခြေခံ အရယူနိုင်ဖို့ ကို ကို ဘုံသဘောတူညီမှု ရခဲ့ပါတယ်” ဟု မွန်ပြည်သစ် ပါတီ ( NMSP) ဒု ဥက္ကဌ နိုင်ဟံသာ က ယမန်နေ့ ပြုလုပ်သည့် သတင်းစာရှင်းလင်းပွဲ တွင် ပြောကြားခဲ့သည်။
NCA အကောင်အထည်ဖော်မှု အပါအဝင် ငြိမ်းချမ်းရေး လုပ်ငန်းစဉ်တွင် ကြုံတွေ့နေရသည့် တစ်ဆို့မှု များဖြေရှင်း ကျော်လွှား နိုင်ရေး အတွက် ဖက်ဒရယ် ပြည်ထောင်စု တည်ဆောက်ရေး လုပ်ငန်းစဉ် တရပ် စနစ်တကျ ရေးဆွဲ ချမှတ်ပြီး အစိုးရ ၊ တပ်မတော် ခေါင်းဆောင် များနှင့် ဆွေးနွေး သဘောတူညီမှု ရယူရန် သဘောတူခဲ့ကြောင်း ယမန်နေ့ NCA လက်မှတ်ရေးထိုးသည့် တိုင်းရင်းသားလက်နက်ကိုင် အဖွဲ့အစည်း ထိပ်သီးခေါင်းဆောင် စတုတ္ထအကြိမအ အစည်းအဝေး( ပထမပိုင်း) ထုတ်ပြန်ချက်တွင် ရေးသားထားသည်။
ထို့ပြင် ၅ ရက်သာ ကျင်းပသည့် အစည်းအဝေးတွင် NCA လက်မှတ်ထိုးထားသည့် တိုင်းရင်းသားလက်နက်ကိုင် အဖွဲ့၏ ငြိမ်းချမ်းရေး လုပ်ငန်းစဉ် ဦးဆောင် ကော်မတီ (PPST) ကို ငြိမ်းချမ်းရေး လုပ်ငန်းစဉ် ညှိနှိုင်းတိုင်ပင်ခြင်း အစည်းအဝေး ( PPCM) အဖြစ် ပြောင်းလဲဖို့ဆွေးနွေး ခဲ့ရာ ကွဲလွဲမှုများ ရှိနေကြောင်း သတင်းရရှိသည်။
တချို့ တိုင်းရင်းသားလက်နက်ကိုင် များ သည် PPST ကို ယခင် အတိုင်းသာ ထားရှိကြရန် ဆန္ဒရှိကြပြီး တချို့ မှာ PPCM အဖြစ် ပြောင်းလဲလိုကြောင်း၊ ထို့အတွက် အချင်းချင်းကြား သဘောထားကွဲလွဲမှု ရှိကြောင်း သိရသည်။
တဖက်တွင်လည်း ကရင် အမျိုးသား အစည်းအရုံး KNU က PPST မှ နုတ်ထွက်စာ ထား ကြောင်း၊ သို့သော် ၄င်းနှင့်ပတ်သက်ပြီး မဆွေးနွေးသေးဘဲ ဆိုင်းငံ့ထားပြီး လာမည့်အစည်းအဝေးမှသာ ဆွေးနွေးသွားမည်ဖြစ်ကြောင်းသိရသည်။
“နှုတ်ထွက်တာ ဆိုတာ အစည်းအဝေးမှာ တော့မရှိပါဘူး။ PPST လောလောဆယ် ဆွေးနွေးမှု မပြီးသေးဘူး။ PPST ကတော့ အတိုင်းအတာ တခု ဆက်လက်ရှိမှာပါ။ PPCM ဘယ်လို အခင်း အကျင်းနဲ့ လာမလဲ ဆိုတာတော့ ဆက်လက် ဆွေးနွေးနေတဲ့အနေအထားပါ။ အခု က ပထမပိုင်းပဲရှိသေးတယ်။ ဒုတိယ ပိုင်း ညီလာခံကျရင် ဆုံးဖြတ်ပါမယ်” ဟု RCSS/SSA အတွင်းရေးမှူး (၂) ဗိုလ်မှူးကြီး စိုင်းငင်းက သတင်းစာရှင်းလင်းပွဲတွင် ပြောခဲ့သည်။
မပြီးပြတ်သေးသည့် NCA လက်မှတ်ရေးထိုးထားသည့် တိုင်းရင်းသား လက်နက်ကိုင် တော်လှန်ရေး အဖွဲ့အစည်းများ၏ စတုတ္တ အကြိမ် ညီလာခံကို တလ အကြာ ကျင်းပနိုင်ရန် ကြိုးစားသွားမည် ဟု သတင်းရရှိသည်။
အဆိုပါ ထိပ်သီး ဆွေးနွေး ပွဲကို NCA လက်မှတ်ရေးထိုးထားသည့် တိုင်းရင်းသားလက်နက်ကိုင် ၁၀ဖွဲ့အပြင် ကချင်လွတ်မြာက်ရေး အဖွဲ့အစည်း (KIO) နှင့် ကရင်နီ အမျိုးသား တိုးတက်ရေးပါတီ (KNPP) တို့လည်း လေ့လာသူများအဖြစ် တက်ရောက်ခဲ့ကြသည်။
