သျှမ်းပြည် မြောက်ပိုင်း မူဆယ်မြို့နယ် တရုတ်နယ်စပ် ဆင်ဖြူ ဂိတ်ပေါက်တွင် ယနေ့ မနက် ပိုင်းက ရုန်းရင်းဆန်ခတ် ဖြစ်ပွားခဲ့ကြောင်း သတင်းရရှိသည်။

မေလ ၁၇ ရက် မြန်မာစံတော်ချိန်မနက် ၆ နာရီခွဲကျော်က မြန်မာဘက်ခြမ်းမှ ကား၂ စီး ဆင်ဖြူပေါက်ကို ပိတ်ရပထားသဖြင့် တရုတ်ဘက်ခြမ်းမှ ကားများ မြန်မာဘက်သို့ ဝင်၊ထွက်မရ ဖြစ်ရသည်ဟုဆိုကာ တရုတ်ရဲများ ဝင်ကာ ကားဖယ်ခိုင်းရာမှ ရုန်းရင်းဆန်ခတ် ဖြစ်ပွါးခဲ့ခြင်းဖြစ်ကြောင်း အဆိုပါနေရာသို့ ရောက်ရှိမြင်တွေ့ခဲ့သည့် မူဆယ်ဒေသခံများက ပြောဆိုကြသည်။

“ မြန်မာပြည်ဘက်ခြမ်းမှာ ကား၂ စီးက ဂိတ်ပေါက် ပိတ်ရပ်ထားလို့ တရုတ်ဘက်က ကားတွေ ၀င်၊ထွက်မရဘူးဆိုပြီး တရုတ်ရဲက မြန်မာဘက်ကို ဝင်လာပြီး ကားသမားကို ဆွဲရမ်း သလိုဖြစ်သွားတယ်။ အဲ့နားမှာကလည်း တရုတ်ဘက်ကို ဝင်မယ့် လူအုပ်က များတော့ ရုန်းရင်းဆန်ခတ်ဖြစ်သွားတာပေါ့” ဟု တရုတ်ပြည်ဘက်သို့ ဝင်ရန် စောင့်ဆိုင်းနေသည့် စိုင်းအိုက် က ပြောပြသည်။

တရုတ်ပြည်ဘက်မှ တာဝန်ကျရဲများ မြန်မာပြည်ဘက်ဝင်ကာ မြန်မာဘက်မှ ပြည်သူအား ဆွဲရမ်းသည့် အပေါ် အမြင်ဆိုးကြောင်း၊ မြန်မာပြည်ဘက်မှ ပြသနာ တစုံတရာဖြစ်ခဲ့ပါက မြန်မာပြည် မှ သက်ဆိုင်ရာ ကိုသာ အကြောင်းကြားပြီး ဖြေရှင်းသင့်ကြောင်း စိုင်းအိုက် ပြောပြသည်။

တရုတ် ရဲ ၂ ဦးမှ ကားသမားကို ဆွဲရမ်းပြုမူသည့် ကိစ္စသည် လူမှုကွန်ရက် စာမျက်နှာပေါ်တွင် ပြန်နှံ့ နေပြီး၊ တရုတ်ရဲများ မြန်မာပိုင်နက်ကို ကျူးကျော်ကာ ထိုကဲ့သို့ ပြုမူမှုကို မြန်မာပြည်သူများက ကန့် ကွက်ရှုတ်ချကာ သက်ဆိုင်ရာမှ ဝင်ရောက်ဖြေရှင်းစေလိုကြောင်းလည်း မူဆယ် ဒေသခံများက ပြောဆိုလိုက်သည်။

“ တရုတ်တွေက မြန်မာကို လုပ်ချင်တိုင်းလုပ်လို့ရတယ်ဆိုတဲ့သဘောဖြစ်နေတယ်။ ဒါတောင် လူများ ရှေ့မှာဖြစ်နေတာ။ ကျနော်တို့နယ်စပ်ပြည်သူတွေ နေ့တိုင်း ဘယ်လိုခံစားနေရလဲဆိုတာ အစိုးရရော သက်ဆိုင်ရာရော သိစေချင်တယ်” ဟု မူဆယ် ဒေသခံ စိုင်းလုံ ကဆိုသည်။

အဆိုပါ ကိစ္စ နှင့် ပတ်သတ်ပြီး မူဆယ်မြို့သက်ဆိုင်ရာ အာဏာပိုင် နှင့် မူဆယ်မြို့မှ ပြည်နယ် လွှတ်တော် ကိုယ်စားလှယ်များ မည်ကဲ့သို့ဖြေရှင်းပေးမည်ကို သျှမ်းသံတော်ဆင့် အနေဖြင့် ဆက်သွယ်မေးမြန်းသော်လည်း ဆက်သွယ်မှု မရခဲ့ပေ။

“ ကျနော်တို့နေ့စဉ် တဘက်ကမ်း( တရုတ်ပြည်)ဘက်ကို အလုပ်သွားလုပ်ရ၊ ပစ္စည်းဝယ်ရတာ အဆင်မပြေဘူး။ တရုတ်ဘက်ကလည်း စည်းကမ်းတွေ တင်းကြပ် ဝင်၊ထွက် ခက်အောင်လုပ်တယ်။ ဒါတွေ ကျနော်တို့သက်ဆိုင်ရာ ကလည်း ဝင်ရောက်ဖြေရှင်းပေးဖို့ လိုအပ်တယ်။ ညှိနှိုင်းပေးဖို့လိုတယ်” ဟု တရုတ်ပြည်သို့ အလုပ်သွားလုပ်သည့် အမျိုးသားတဦးက ပြောသည်။

မေ ၁၅ ရက်မှ စတင်ကာ ကုန်တင်ယာဉ်များနှင့် လူဝင် လူထွက်ပြုလုပ်သည့် မန့်ဝိန်းပေါက်ကို မြန်မာ စံတော်ချိန် ည ၉ နာရီခွဲအထိသာခွင့်ပြုတော့မည်ဖြစ်ကြောင်းနှင့် အိမ်စီးတော်ယာဉ်များ၊ ယာဉ်ငယ်များ လူဝင်လူထွက်ပြုလုပ်သည့် ဆင်ဖြူပေါက် နှင့် နန်းတော်ပေါက်ကို ည ၈ နာရီ အထိသာ ဝင်၊ထွက် ခွင့်ပြုသည်။

ယခင်တွင် အဆိုပါ နယ်စပ်ဂိတ် ၃ ဂိတ်ကို မြန်မာ စံတော်ချိန် ည ၁၀ နာရီ ထိ ဖွင့်ပေးခဲ့ကြောင်း သိရသည်။

တရုတ်အစိုးရ အနေဖြင့် တင်းကြပ်သည့် စည်းကမ်းများကိုဖြေလျော့ပေးရန် နှင့် တရုတ်ပြည်ဘက်သို့ အလုပ်သွားလုပ်သည့် မြန်မာနိုင်ငံသားများ အဆင်ပြေမှု အတွက် မြန်မာအစိုးရ အနေဖြင့်လည်း တရုတ်အစိုးရ ကို ညှိနှိုင်းဆွေးနွေးဖို့လည်း လိုအပ်သည် ဟု မူဆယ်တွင် နေထိုင်သူများ က တောင်းဆိုကြသည်။