သျှမ်းပြည်မြောက်ပိုင်းလားရှိုးမြို့တွင် လူထုအင်အားထောင်နှင့်ချီကာ ၂၀၀၈ ဖွဲ့စည်းပုံပြင်ဆင်ရေးအတွက် ဆန္ဒထုတ်ဖော်ခဲ့ကြကြောင်းသိရသည်။

မေလ ၁၁ ရက်နေ့က ဒေသခံလူထု၊ နိုင်ငံရေးပါတီ၊ လူမှုအခြေပြုအဖွဲ့အစည်းများ၊ သျှမ်းစာပေနှင့် ယဉ်ကျေးမှုကော်မတီ၊ လားရှိုးမြို့တွင်းနှင့်အနီးတဝိုက်ရှိ ၀ ၊ တအာင်း တိုင်းရင်းသားများ အင်အားထောင်နှင့်ချီကာ ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေးအတွက် ထောက်ခံကြောင်း လမ်းလျှောက်ဆန္ဒထုတ်ဖော်ခဲ့ကြခြင်းဖြစ်သည်။

၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေးအတွက် ထောက်ခံကြောင်း လမ်းလျှောက်ဆန္ဒထုတ်ဖော်မှုဖြစ်မြောက် ရေးကော်မတီဝင်စိုင်းခမ်းကော်က – “ဖွဲ့စည်းပုံပြင်ဆင်ရေးအတွက်ထောက်ခံအားပေးဖို့က ကျနော်တို့ပြည်သူလူထုအားလုံးနဲ့သက်ဆိုင်ပါတယ်။ ၂၀၀၈ ဖွဲ့စည်းပုံကိုကျနော်တို့အလိုမရှိပါဘူး။ အဲ့ထဲ့မှာဆိုရင်မိဘပြည်သူကို တဖက်သတ် ဖိနှိပ်ထားတာတွေချည်းဘဲ။ အဲ့ထဲမှာပါတာတွေကိုအသစ်ပြန်ပြင်ချင်တယ်။ ဒါကြောင့်ကျနော်တို့ကလာပြီး ဆန္ဒထုတ်ဖော်ခဲ့ကြခြင်းဖြစ်ပါတယ် ”- ဟု သျှမ်းသံတော်ဆင့်အားပြောသည်။

၎င်းဖွဲ့စည်းပုံပါဥပဒေများအနက် လူထုခံစားနေရသော လယ်ယာမြေ နှင့်ပတ်သက်သည့် ဥပဒေများ၊ လူထု၏ ဘိုးစဉ်ဘောင်ဆက်ကတည်းက စိုက်ပျိုးလုပ်ကိုင်စားသောက်လာသောလယ်ယာမြေများအား သိမ်းယူနိုင်ရန်ရေးဆွဲထားသည့်ဥပဒေများနှင့် လူထုမှ ပြန်လည်တောင်းယူ၍မရအောင်ရေးဆွဲထားသော ဥပဒေများ အားအထူပြင်ဆင်လိုကြကြောင်း စိုင်းခမ်းကော်က ဤကဲ့သို့ဆက်ပြောသည်။

“ကျနော်တို့ပြည်သူလူထုဟာ လယ်ယာစိုက်ပျိုးရေးကိုအဓိက လုပ်ကိုင်စားသောက်အသက်မွေးဝမ်းကြောင်းပြုကြတယ်။ လယ်ယာမြေနဲ့ပတ်သက်ပြီး ဥပဒေက တဖက်သတ်ဖိထားတာက ဥပဒေ ပုဒ်မ ၁၀၊ ၂၂၊ ၂၇ စတာတွေဖြစ်တယ်။ အဲ့မှာ ပုံစံ ၇ တွေ ပုံစံ ၁၀၅ တွေအတင်းလျှောက်ခိုင်းတာတို့၊ ဘိုးဘွားပိုင်စိုက်ပျိုးမြေတွေကို အချိန်မရွေး သိမ်းယူနိုင်မယ့်ဥပဒေတွေ၊ သူတို့သိမ်းသွားတဲ့မြေတွေကိုပြန်တောင်လို့မရအောင် ကန့်သတ်ထားတဲ့ဥပဒေတွေ အများကြီးရှိပါတယ် ပြင်ဆင်ဖို့လိုနေတာတွေက”- ဟု သျှမ်းသံတော်ဆင့်အားပြောသည်။

၂၀၀၈ ဖွဲ့စည်းပုံအခြေခံဥပဒေ ပြင်ဆင်နိုင်ရေးအတွက် ပြည်ထောင်စုလွှတ်တော်က ယခုနှစ်ဆန်းပိုင်းက ကော်မတီဖွဲ့စည်းထားကြောင်းလည်းသိရသည် ။

ပြီးခဲ့သည့်မတ်လကပင် တောင်ကြီးမြို့အတွင်း ဖွဲ့စည်းပုံပြင်ဆင်ရေးအတွက် ထောက်ခံကြောင်းဒေသခံလူထု ဆန္ဒထုတ်ဖော်ခဲ့ကြသေးသည်။