ထိုင်းနိုင်ငံချင်းမိုင်မြို့တွင် မေလလယ်အတွင်း PPST ၏ထိပ်သီးအစည်းအဝေးတရပ်ကျင်းပမည်

0

ထိုင်းနိုင်ငံချင်းမိုင်မြို့တွင် မေလလယ်အတွင်း PPST ၏ထိပ်သီးအစည်းအဝေးတရပ် ကျင်းပမည်ဖြစ်ကြောင်းသိရသည်။

Photo by – NCA-S EAO/ ယခင်က ချင်းမိုင်မြို့တွင်ပြုလုပ်သော PPST ထိပ်သီးအစည်းအဝေး မြင်ကွင်း (ဓါတ်ပုံဟောင်း)

မေလ ၁၄ မှ ၁၈ ရက်နေ့အထိ NCA အပစ်ရပ်လက်မှတ်ရေးထိုးထားသော တိုင်းရင်းသားလက်နက်ကိုင်တပ်ဖွဲဲ့ ၁၀ ဖွဲ့က ထိပ်သီးခေါင်းဆောင်များ ထိုင်းနိုင်ငံချင်းမိုင်မြို့တွင်တွေ့ဆုံကြမည်ဖြစ်ရာ နိုင်ငံတော်အတိုင်အပင်ခံပုဂ္ဂိုလ် ဒေါ်အောင်ဆန်းစုကြည်နှင့် တပ်ချုပ်ကြီးမင်းအောင်လှိုင်တို့ထံ RCSS နှင့် KNU တို့ ပေးပို့သော စာနှင့်ပတ်သက်ပြီးဆွေးနွေးမည်ဖြစ်ကြောင်း ထို့အတူ PPST ၏ ဖွဲ့စည်းပုံ တို့ကိုပါ ဆွေးနွေးမည်ဖြစ်ကြောင်းသိရသည်။

PPST ၏ အကြံပေးပုဂ္ဂိုလ် စဝ်ခင်းဆိုင် ကျိုင်ယင် က – “သူတို့ဆွေးနွေးမှာက NCA မှာပါတဲ့ စကားလုံးတွေ စကားစုတွေရဲ့ အဓိပ္ပါယ်တွေကို ပြန်လည်သုံးသပ်မယ်။ ပြည်နယ်နဲ့ ပြည်ထောင်စုကြား ၊ ဗဟိုအစိုးရနဲ့ ပြည်ထောင်စုအစိုးရကြား၊ တပ်မတော်ကြား အဓိပ္ပါယ်နားလည်မှု မတူတာကို တူအောင်လုပ်မယ်။” – ဟု သျှမ်းသံတော်ဆင့်အားပြောသည်။

အဆိုပါ ဆွေးနွေးချက်များကို ပြီးခဲ့သည့် ဧပြီလ ၁၁ ရက်နေ့ကလည်း KNU မှ ဖဒိုစောတာဒိုမူး က NRPC ထံတင်ပြထားပြီးဖြစ်ကြောင်း၊ NRPC မှလည်းဆွေးနွေးရန်သဘောတူ လက်ခံထားကြောင်း သိရသည်။

“အဲတာကြောင့် NCA လက်မှတ်ရေးထိုးထားတဲ့ ၁၀ ဖွဲ့က ဒီဆွေးနွေးဖို့ရည်မှန်းထားတဲ့ အချက် ၄ ချက်အတွက်ပြင်ဆင်ထားရမယ်။ ဥပမာ ပြည်ထောင်စုအတွက် ဘယ်လိုဆွေးနွေးမလဲ၊ အသေးစိတ်ရှိရမယ်လေ၊ NCA ထဲမှာ နားလည်မှုလွဲနေတဲ့စကားလုံးတွေကဘာတွေလည်း အသေးစိတ်ဆွေးနွေးရမယ်။ ” – ဟု စဝ်ခင်းဆိုင် ကျိုင်ယင်ကပြောသည်။

ထို့အပြင် PPST ၏ ဖွဲ့စည်းပုံ ကိုလည်း ဆွေးနွေးသွားမည်ဟုသိရသည်။

“အခု PPST ရဲ့အနေအထားက လှေကားထစ်လို။ အဲလိုဖြစ်နေတဲ့အနေအထားကနေ အထစ်တွေမရှိအောင် တပြင်တည်းဖြစ်သွားအောင် တန်းတူညီမျှသွားအောင် သူတို့ ဆွေးနွေးမယ်။ ဘယ်လိုဆွေးနွေးမယ် ဘယ်လို သဘောတူကြမယ်ဆိုတာတော့ စောင့်ကြည့်ရမှာပေါ့ ”- ဟုလည်း စဝ်ခင်းဆိုင် ကျိုင်ယင် ကပြောသည်။
၂၀၁၅ ခုနှစ်အောက်တိုဘာလ ၁၅ ရက်နေ့က NCA စာချုပ် ပထမအကြိမ်လက်မှတ်ရေးထိုးပွဲတွင် တိုင်းရင်း သားလက်နက်ကိုင်တပ်ဖွဲ့ ကရင် KNU/ KNLA-PC/ DKBA ၊ သျှမ်း RCSS ၊ ကျောင်းသား တပ်မတော် ABSDF ၊ ရခိုင် ALP ၊ ချင်း CNF ၊ ပအို၀်း PNLO စသည့် ၈ ဖွဲ့ကလက်မှတ်ရေးထိုးထဲ့ကြပြီး ၂၀၁၈ ဖေဖော် ဝါရီလ ၁၃ ရက်တွင်မူ မွန် NMSP နှင့်လားဟူ LDU ကလက်မှတ်ရေးထိုးခဲ့ပြန်ရာ လက်ရှိတွင် NCA လက်မှတ် ရေးထိုးပြီးသည့်တိုင်းရင်းသားလက်နက်ကိုင်တပ်ဖွဲ့ ၁၀ ဖွဲ့ရှိပြီဖြစ်ပါသည်။

ဢုပ်ႇဢူဝ်း ၽူႈတွႆႇႁွၵ်ႈ

SHARE