သျှမ်းပြည်တောင်ပိုင်းကျေးသီးမြို့လယ် စျေးတန်းရပ်ကွက်ရှိရွှေဆိုင်တဆိုင်အား အမည်မသိလူ ၂ ဦးက ၀င်ရောက်ဓါးပြတိုက်ရာ ရွှေထည်ပစ္စည်းနှင့်ငွေသားများ ပါသွားကြောင်းသိရသည်။

မေလ ၃ ရက်နေ့ ညနေ ၅ နာရီအချိန်ခန့်က အမည်မသိအမျိုးသား ၂ ဦးသည် ကားတစီးဖြင့် စိုင်းခမ်းလူ နန်းခင်ငွေတို့၏ ရွှေဆိုင်သို့ရောက်ရှိလာပြီး ဗုဒ္ဓဆင်းထုတော်လာရောင်းရာမှ ဓါးပြတိုက်မှုဖြစ်ပွါးခဲ့ခြင်းဖြစ်ကြောင်း သိရသည်။

ကျေးသီးမြို့နယ် ပြည်နယ်လွှတ်တော်ကိုယ်စားလှယ် စိုင်းစံမိန်းက အဆိုပါဓါးပြတိုက်မှုမှာ အမှန်တကယ်ဖြစ်ပွါးခဲ့ကြောင်း အတည်ပြုပြောဆိုသည်။

“ကျနော်ကြားသိရသလောက်တော့ လူ ၂ ယောက်ကရောက်လာပြီးတော့ ဘုရားဆင်းထုတော် ၀ယ်မလား ကျပ်သိန်း ၃၀၀ လောက်ပေးပါ လို့ပြောတယ်။ ဆိုင်ရှင်က မဝယ်ဘူး။ ပြောင်းစျေးကျလို့ အရောင်းအဝယ်လည်းမကောင်းတော့ပိုက်ဆံမရှိဘူးလို့ပြောတော့ ဓါးပြက သိန်း ၁၀၀ တောင်းတယ်။ သေနတ်ပြပြီးတောင်းတယ်။ ငွေသား ၁၀ သိန်းနဲ့ ရွှေ ၈ ကျပ်သားလောက်ရသွားတယ်လို့ကြားမိပါတယ်။ ”- ဟု သျှမ်းသံတော်ဆင့်အားပြောသည်။

ဓါးပြနှင့်အတူ ရွှေနှင့်ငွေသားစုစုပေါင်းတန်ဖိုး ကျပ်သိန်း ၁၀၀ ခန့်ပါသွားကြောင်းလည်း ရွှေဆိုင်ပိုင်ရှင်နှင့်နီးစပ်သည့် ကျေးသီးမြို့ခံ အမျိုးသမီးတဦးကပြောသည်။

“ဓါးပြက ကားနဲ့လာတယ်။ သျှမ်းစကားပြောတယ်။ သေနတ်တော့ထုတ်ပြတယ်။ ဒါမယ့် စစ်သားတော့ မဖြစ်နိုင်ဘူးလို့ကျမတို့ထင်တယ်။ ကေဒါတပ်သားဆိုရင် ကားနဲ့လာနိုင်မှာမဟုတ်ဘူး။ အထက်အကြီးဆိုရင်လည်း မြို့လယ်မှာ အဲလိုဓါးပြမတိုက် စားရဲလောက်ဘူး။ လူကြောက်အောင် သေနတ်ထုတ်ပြတာဘဲဖြစ်မယ် ”- ဟု သျှမ်းသံတော်ဆင့်အား ပြောသည်။

ယနေ့တိုင် အဆိုပါ ဓါးပြ ၂ ယောက်အားမဖမ်းမိသေးကြောင်း မည်သည့်အဖွဲ့အစည်းမှလာသည်ကိုလည်းမသိရကြောင်း ၊ ရွှေဆိုင်ပိုင်ရှင်မှလည်း ကျေးသီးမြို့ရဲတပ်ဖွဲ့ထံတွင် တိုင်ကြားထားပြီဖြစ်ကြောင်းလည်း သိရပါသည်။