သျှမ်းပြည်တောင်ပိုင်း မြို့နယ်တော်တော်များများတွင်ယခုနှစ် ရေပြတ်လပ်မှုများနှင့်ကြုံတွေ့နေကြောင်း သိရသည်။

သောက်သုံးရေအဓိကပြတ်လပ်နေသော မြို့နယ်များမှာ မိုးနဲ ၊ ကလော ၊ညောင်ရွှေ၊ ရွာငံ ၊ ပင်းတယမြို့နယ်များဖြစ်ပြီး ဒေသဆိုင်ရာ လွှတ်တော်အမတ်များ ၊လူငယ်များအဖွဲ့နှင့် ဌာနဆိုင်ရာတချို့တို့မှ ရေရရှိရေး ဆောင်ရွက်ပေးနေကြကြောင်းသိရသည်။

“မိုးနဲမြို့နယ် ပြည်နယ်နယ်လွှတ်တော် မဲဆန္ဒနယ်အမှတ် ၁ မှ လွှတ်တော်ကိုယ်စားလှယ် စိုင်းမွန်းလိန်က – ကျနော်တို့မိုးနဲမှာဆိုရင် အခုရေအခက်အခဲဖြစ်နေတာက ၀မ့်ယေး၊ ၀မ့်ကွန်းလုံ နဲ့ဝမ့်လွယ်ချိုရွာတွေဘက်မှာဖြစ်တယ်။ ၀မ့်ယေးရွာအတွက် အခုကျနော်တို့ ဆောင်ရွက်နေပါတယ်။ ကျေးလက်ဖွံ့ဖြိုးရေးအဖွဲ့နဲ့အတူ အရင်က ရှိခဲ့ဖူးတဲ့ နမ့်ဟူး- ၀မ့်ယေး ရေပိုက်၊ ပျက်စီးနေတာတွေကိုအခု အသစ်ပြန်ထည့်ပေးတယ်။ ဟိုးအရင်ကတည်းကရှိခဲ့တဲ့ ရေလှောင်ကန်ကလည်း အခုပျက်စီးနေပြီမို့ အသစ်ပြန်တူးပေးမယ် ရေလှောင်ကန် ” – ဟု သျှမ်းသံတော်ဆင့်အားပြောသည်။

မိုးနဲမြို့တွင် သောက်သုံးရေအခက်ခဲဆုံးမှာ ၀မ့်ကွန်းလုံဖြစ်ကြောင်း၊ ကုန်းပေါ်တွင်တည်ရှိသဖြင့် ရေရှားပါးခက်ခဲရခြင်းဖြစ်ကြောင်း စိုင်းမွန်းလိန် က ပြောသည်။

“မနှစ်က ၀မ့်ကွန်းလုံရွာမှာ ကျနော်တို့ ရေတွင်းသွားတူးပေးတယ်။ အဲတာက မအောင်မြင်တော့ ဒီနှစ် ၂ တွင်းထပ်သွားတူးပေးတယ်။ တတွင်းဘဲရေထွက်တယ်။ အဲတာတောင် ခပ်ခပ်နားနားလုပ်ရတယ်။ တရွာလုံးအတွက် အလုံအလောက်မပေးနိုင်ဘူး။ နမ့်ဟူးကန်ကနေ ရေထပ်သွယ်ပေးရမယ်။ ၁၀ မိုင်လောက်ဝေးတယ် ဒီဝမ့်ကွန်းလုံရွာနဲ့ နမ့်ဟူးနဲ့က။ သျှမ်းပြည်နယ်ဝန်ကြီးချုပ်ကွင်းဆင်းမယ်လို့ကြားတယ်။ ကျနော် တင်ပြပါဦးမယ် ၀န်ကြီးချုပ်ဆီမှာလည်း။ နမ့်ဟူး – ၀မ့်ကွန်းလုံ ရေသွယ်ပြီးတာနဲ့ နမ့်ဟူး ၀မ့်လွယ်ချို လည်းချက်ချင်းရေသွယ်ပေးမယ် ”- ဟု စိုင်းမွန်းလိန်က ပြောသည်။

လက်ရှိတွင် မိုးနဲမြို့နယ်အတွင်း သောက်သုံးရေပြတ်လပ်နေသောရွာများမှာ အိမ်ထောင်စု ၅၀-၆၀ ခန့်ရှိ ၀မ့်ယေးရွာ ၊ အိမ်ထောင်စု ၁၀၀ ခန့်ရှိ ၀မ့်ကွန်းလုံရွာ၊ အိမ်ထေင်စု ၂၅ စုခန့်ရှိ ၀မ့်လွယ်ချိုရွာတို့ဖြစ်ကြောင်းသိရသည်။

သျှမ်းပြည်သဘာဝပတ်ဝန်းကျင်ထိန်းသိမ်းရေးလှုပ်ရှားနေသည့်လူငယ်အဖွဲ့က ယခုနှစ် သျှမ်းပြည်နယ်အတွင်း သစ်တော သစ်ပင်ပြုန်းတီးမှုကြောင့် ရာသီဥတုလည်း ယခင်နှစ်များထက်ပိုမိုပူပြင်းခြောက်သွေ့ကြောင်း၊ အမြင့်ပေ ၄၀၀၀ ကျော်ရှိတောင်ကြီးမြို့တွင်ပင် ယခုနှစ် ပန်ကာဖွင့်ရသည်အထိပူကြောင်း၊ သောက်သုံးရေမှာလည်း ယခင်နှစ်များထက်ပိုမိုရှားပါးလာကြောင်းပြောဆိုလိုက်သည်။